RUTHU 1 - Biblia Ilagho Jiboie Kwa Wandu Wose

Elimeleki na wandu wake kughenda Moabu

¹ Ngelo imu, iji watanyi wa Israeli werekoghe wikibonya nguma, korekoghe na njala isangenyi; na mndumu wa muzi ghwa Bethlehemu isanga ja Juda ukaghenda kukaia kiwughenyi isanga ja Moabu, andwamweri na mkake, na wana wake wa womi wawi.

² Irina ja uo mundu orewangwagha Elimeleki, na irina ja mkwake orewangwagha Naomi; marina gha wana wake ni Mahaloni na Kilioni, wandu wa kichuku cha Efrata, wa Bethlehemu isanga ja Juda. Wikaghenda isanga ja Moabu, na kukaia aho.

³ Ela Elimeleki mumi wa Naomi ukafwa, Naomi ukasighwa uekeri na wana wake wawi.

⁴ Awo wana wikalowua wai wa Wamoabu, irina ja mwai umu jerekoghe Orpa, na irina ja uja mzima Ruthu. Wikakaia aho sa kwa miaka ikumi;

⁵ Mahaloni na Kilioni wose wikafwa, na Naomi ukasighwa uekeri usewadie mndwawomi hata wana.

Naomi na Ruthu kuwuya Bethlehemu

⁶ Konyuma Naomi ukasikira angu BWANA wamerie kuwirasimia wandu wake kwa vindo, ukakutumbanya kusigha isanga ja Moabu chiaimweri na waka wa wana wake.

⁷ Nao ukazoya charo chiaimweri na waka wa wana wake wawi kufuma andu orekoghe kuwuya cha isanga ja Juda.

⁸ Ela chienyi Naomi ukawizera waka wa wana wake, “Wuyenyi kula mundu nyumbenyi kwa mae; BWANA ndemneke kuwona mecha sa iji koni morenibonyereghe ini na womi wenyu wori.

⁹ BWANA ndemneke kulowolwa, m'bonye mizi.” Niko Naomi ukawisusugha na kulaghana nawo. Ela wikawoka kulila kwa chwaka mbaa,

¹⁰ wikamzera, “Hata! Isi diaghendanya kwa wandu wako.”

¹¹ Ela Naomi ukawizera, “Wuyenyi wana wapo, kwaki mghendanyagha nani? Kwani naduagha ova wana widimagha kuwuya womi wenyu?

¹² Wuyenyi cha mzenyu wana wapo; angu ini nakekua, siwuyalowolwa sena. Uko ngera nedelowolwa ichi kio na kuva wana

¹³ welee, mwawiweseragha hata wizoghuo? Mwadimagha kukumazira mkaie mselowolo? Ii hata wana wapo, neko na kuwawa kubaa kwa wundu ghwa wasi ghonyu, angu nakabilo ni BWANA.”

¹⁴ Nao wikawoka kulila sena; niko Orpa ukamsusugha mkekwake, ukalaghana nao, ukaghala; ela Ruthu ukawadana nao.

¹⁵ Naomi ukamzera Ruthu, “Zighana mrio wako waghenda kwa wamzawo na kwa milungu ya mzawo; nugha mrio wako.”

¹⁶ Ela Ruthu ukatumbulia, “Kusesindenishingira wei nikusighe angu wei niseghendanye na oho, kwa kukaia andu kuchaaghenda oho, na ini nichaghenda; na andu kuchaakaia, niko koni nichaakaia; wandu wako wichawuya wandu wapo, na Mlungu wako uchawuya Mlungu wapo;

¹⁷ andu kuchaafuya niko koni nichaafuya, na aho niko koni nichaarikilwa. Mlungu ndenikabe na kuchumba, ikakaia si kifwa tu chichaanitanya na oho.”

¹⁸ Naomi uendawona angu Ruthu wakata shauri wighendanye, ukanyama kima.

¹⁹ Wikaghenda wose wawi hata wikavika Bethlehemu. Hata iji wavika Bethlehemu, muzi ghose ghukanyavurika, na waka wa ugho muzi wikakotia, “Sena ni Naomi uhu?”

²⁰ Naomi ukawizera, “Mseniwange Naomi, ela muniwange Mara; angu Uo-Uko-Aighu-Nandighi wanibonyere maza ribirie.

²¹ Nerefumieghe aha nichue vilambo, ela BWANA waniwunja mduu, muniwanga wada Naomi, ikakaia BWANA wanitanyire, na Uo-Uko-Aighu-Nandighi waningirie andenyi ya wasi m'baa?”

²² Niko Naomi ukawuya andwamweri na Ruthu M'moabu mka-mwanwake kufuma isanga ja Moabu; wikacha Bethlehemu ngelo ezoya kukuwida shairi.