NEHEMIA 6 - Biblia Ilagho Jiboie Kwa Wandu Wose

Nehemia kubonywa njama

¹ Sanbalati, na Tobia, na Geshemu Muarabu, na wamaiza wedu wazima wikaghorelwa kukaia damerie kughuagha wurigha na ilanga jingi ndejisigharikie hata ngera derekoghe disengirie minyango ya mbengenyi ngelo rija.

² Sanbalati na Geshemu wikanidumia memu wikighamba, “Choo dikwanie kirindinyi cha Orpa, andenyi ya muzi ghumu.” Ela wedekunda kunibonya kiwiwi.

³ Nani ngaduma wadumwa kuwizera, “Neeka na kazi ya suti sidimagha kusea. Sidimagha kuisigha kazi nichekuwona.”

⁴ Wikanidumiria mando ana kwa chia ihi cheni, nani ngawitumbulia wokoni.

⁵ Sanbalati ukaduma mdumiki wake kwapo na barua iari kwa chia iyo cheni.

⁶ Barua erendikiloghe huwu: “Geshemu wanizera wei wandu wiko kaavui nesi wawuyaghora kukaia oho na Wayahudi mookunda kubonya sheshe, kedi niko mwawuyaagha wurigha. Na wei oho kookunda mzuri wawo, kunughana na malagho agho.

⁷ Na wokoni wei kwawikie walodi weghora malagho ghako andenyi ya Jerusalemu kukaia oho ko mzuri andenyi ya Juda. Mzuri usikira agho malagho, kwa huwo choo dibonye njama.”

⁸ Niko ngamuandikira na kumzera, “Ndejiko ilagho jingi jibonyekie sa ijo; agho malagho koodunga kumoni na chongo chako.”

⁹ Wedekunda widituruse wikighesha, wei dichasigha iyo kazi. Ngalomba, “Kunineke ndighi ee Mlungu.”

¹⁰ Ngelo sa iyo cheni nereghendieghe kummbona Shemaia mwana wa Delaia wawae Mehetabeli, uo orekurughieghe nyumbenyi kwake. Ukaghamba, “Oho na ini suti dikuvise Andu kwa Wueli Hekalunyi, kwa kukaia wichacha kukubwagha. Kio icho chose kufuma idana wichakubwagha.”

¹¹ Ela ngatumbulia, “Mundu sa ini nadima kukimbia na kukuvisa? Kuaghesha nadima kutima kwendakira irangi japo kwa kukuvisa Hekalunyi? Sibonyagha huwo kungi.”

¹² Ela nacheemanya kukaia Mlungu nderemdumieghe Shemaia kungi; odetuwa ni Tobia na Sanbalati unituruse kwa ugho wulodi.

¹³ Wedemkodisha unituruse nibonye kaung'a, eri winone ishima japo na kunifusha waya.

¹⁴ Ngalomba, “Kumbuka agho Tobia na Sanbalati wibonyere ee Mlungu wapo, kuwikabe. Wokoni kuwikabe mlodi wa waka Nodia, na walodi wazima wose awo werekundeghe kuniturusa.”

Kumeria kazi

¹⁵ Nyuma ya matuku mirongo misanu na awi gha kazi, wurigha ghose ghukamerelwa ituku ja mirongo iwi na isanu ja mori ghwa Eluli.

¹⁶ Wamaiza wedu wa mbari ra wandu widimarie wiendasikira huwo, wikaobua na kufwa waya; angu werewonieghe worinyi kukaia kazi ihi edemerelwa kwa wutesia ghwa Mlungu odu.

¹⁷ Ngelo ihi yose vilongozi va Kiyahudi werekoghe wikiandikiana na Tobia.

¹⁸ Wandu wengi wa Juda wedewadana nao kwa wundu ghwa mghosi wake wa Kiyahudi Shekania mwana wa Ara. Wokoni na mdawana wake uwangwaghwa Jehohanani odelowua mwai wa Meshulamu mwana wa Berekia.

¹⁹ Wandu wedeeka wikija malagho mecha maduu gha Tobia imbiri yapo, na kumghenjera malagho ghapo. Niko Tobia oreniandikiagha barua reniturusa.