NEHEMIA 11 - Biblia Ilagho Jiboie Kwa Wandu Wose

Awandu werekoghe wikikaia Jerusalemu

¹ Vilongozi va wandu werekoghe wikikaia Jerusalemu, na wandu wazima wose wikakaba kura wipate kinyumba chimweri aghadi ya vinyumba ikumi vikaie Jerusalemu ugho muzi ghwa wueli, na vinyumba ikenda kwa ikumi wikaieghe andenyi ya mizi mizima.

² Wandu wikawikuma awo wandu wose werekufunyireghe kukaia Jerusalemu.

³ Wandu wamu wa Israeli, wakohani, Walawi, Wadumiki wa Hekalu na kivalwa cha wadumiki wa Solomoni werekaieghe aighu ya andu kwawo koni andenyi ya mizi yawo cheni. Awo winughagha ni vilongozi va isanga werekaieghe Jerusalemu:

⁴ Wandu wa kichuku cha Juda werekoghe Athaia mwana wa Uzia wawae Zekaria. Wamu wa weke ndee werekoghe Amaria, Shefatia, na Mahalaleli wa kivalwa cha Juda mwana wa Perezi.

⁵ Maaseia mwana wa Baruku, wawae Kolhoze. Wamu wa weke ndee werekoghe Hazaia, Adaia, Joiaribu, na Zekaria wa kivalwa cha Shela mwana wa Juda.

⁶ Kivalwa cha Perezi, wandu maghana ana na mirongo irandadu na wunyanya werekoghe wikikaia Jerusalemu.

⁷ Wandu wa kivalwa cha Benjamini niwo awa: Salu mwana wa Meshulamu, wawae Joedi. Wamu wa kivalwa chake ni Pedaia, Kolaia, Maaseia, Ihieli, na Jeshaia.

⁸ Gabai, na Salai werekoghe kichuku cha kaavui; wandu maghana ikenda, na mirongo iwi na wunyanya werekoghe wikikaia Jerusalemu.

⁹ Joeli mwana wa Zikri orekoghe kilongozi wawo, na Juda mwana wa Hasenua orekoghe wa kawi wa wubaa ghwa muzi.

¹⁰ Wakohani werekoghe Jedaia mwana wa Joiaribu na Jakini;

¹¹ Seraia mwana wa Hilkia, wawae Meshulamu. Kichuku chake cherekoghe Zadoku, Meraiothi, na Ahitubu, Mkohani M'baa wa Hekalu,

¹² na waruna awo werekoghe wikibonya kazi Hekalunyi wandu maghana wunyanya na mirongo iwi na wawi; na Adaia mwana wa Jehoramu wawae Polaia wa kivalwa cha Amzi, Zekaria, Pashuri, na Malkija,

¹³ na waruna, wabaa wa vichuku wandu maghana awi na mirongo ina na wawi; na Amashisai, mwana wa Azareli wawae Ahzai. Wamu wa kivalwa chake ni Meshilemothi, na Imeri.

¹⁴ Werekoghe wandu ighana na mirongo iwi na wunyanya wiwadie ndighi, wimanyikie, na m'baa wawo orekoghe Zabdieli mwana wa Haggedolimu.

¹⁵ Walawi werekoghe ni; Shemaia mwana wa Hashubu wawae Azrikamu. Wamu wa kivalwa chake ni Shabia na Buni.

¹⁶ Shabethai na Jozabadi werekoghe wabaa wa Walawi werekoghe wazighaniri wa kazi ya shighadinyi ya Hekalu.

¹⁷ Matania mwana wa Mika wawae Zabdi wa kivalwa cha Asafu uo orekoghe kilongozi oboresha chumbo ra malombi ghefunya chawucha, na Bakbukia ukakaia mtesia wake; na Abda mwana wa Shamua, wawae Galali wa kivalwa cha Jeduthuni.

¹⁸ Walawi wose werekoghe andenyi ya muzi ghwa Jerusalemu muzi ghwa wueli maghana awi na mirongo wunyanya na bana.

¹⁹ Walindiri wa Hekalu werekoghe Akubu, Talmoni, na waruna; wandu ighana na mirongo mfungade na wawi.

²⁰ Waisraeli wazima, na wakohani na Walawi, werekoghe wikikaia mizi mizima yose ya Juda, kula mundu andu kwake.

²¹ Ela wabonyi kazi wa Hekalunyi, werekoghe wikikaia andu kuwangwagha Ofeli; Ziha na Gishpa wikakaia wazighaniri wawo.

²² Mnyapara wa Walawi awo werekoghe wikibonya kazi andenyi ya Hekalu ya Mlungu Jerusalemu, orekoghe Uzi mwana wa Bani, wawae Hashabia wa kivalwa cha Metamia na Mika wa kichuku cha Asafu uo orekoghe m'boreshi.

²³ Angu korekoghe na malaghiro gha mzuri aighu yawo, seji ifwane wilongoze mabori kula izughe kwa kunekeriana.

²⁴ Pethaya mwana wa Meshezabeli, wa kivalwa cha Zera wa kivalwa cha Juda, orekoghe mnjama wa mzuri wa Pashia kwa maza rose ra wandu wa Israeli.

Wandu werekoghe wikikaia andenyi ya mizi mizima

²⁵ Wandu wengi werekoghe wikikaia mizinyi iko kaavui na mbuwa rawo. Awo werekoghe wa kichuku cha Juda werekaieghe Kiriath-araba, na Diboni, na Jakabzeli, na andenyi ya mizi mitini iko kaavui na mizi.

²⁶ Wokoni wikakaia andenyi ya mizi ya Jeshua, Molada na Beth-peleti,

²⁷ na Hazari-shuali na Beer-sheba na mizi ya mbai mbai,

²⁸ na andenyi ya Ziklagi, na Mekona na mizi yaro,

²⁹ na andenyi ya Enrimoni na Zora, na Jarmuthi,

³⁰ andenyi ya Zanoa, na Adulamu na mizi iko kaavui nayo. Lakishi na mbuwa raro ra kaavui, na Azeka na mizi yaro. Huwo ni kughamba wandu wa Juda werekaieghe masanga gha Hinomu cha kaskazinyi.

³¹ Wandu wa kichuku cha Benjamini werekaieghe Geba Mikmashi, na Ai, na Betheli na mizi mitini iko kaavui.

³² Na Anathothi, na Nobu, na Anania,

³³ na Hazoru, na Rama, na Gitaimu,

³⁴ na Hadidi, na Zeboiimu, na Nebalati,

³⁵ na Lodi, na Ono na andenyi ya Vololo ya Mafundi.

³⁶ Kipughi chimu cha Walawi, awo werekaieghe isanga ja Juda, werewaghiloghe wikaianye na wandu wa Benjamini.