MITALO 4 - Biblia Ilagho Jiboie Kwa Wandu Wose

Kazi ra Walawi wa Kivalwa cha Kohathi

¹ Nao BWANA ukawizera Musa na Haruni,

² “Tala kivalwa cha Kohathi wiko aghadi ya wana wa Lawi kunughana na vichuku na nyumba rawo,

³ kufuma irika ja miaka mirongo idadu hata mirongo misanu, awo wose widimagha kudumika kwa kazi iko andenyi ya Hema ekwania.

⁴ Kazi ya kivalwa cha Kohathi andenyi ya Hema ekwania ni ya vilambo vieleshero kuchumba.

⁵ Kawona Hema yakakulwa, Haruni na wana wake wichangia wisere kitambaa cha pazia, na kuifinikira Sanduku ya Ilaghano.

⁶ Niko wiifinikire mrongo ghwa mburi, na kuala nguwo ya buluu aighu yaro, ima wijingire midi yaro.

⁷ Na iyo meza ya mkate ghufunyiro kwa Mlungu, wichaala nguwo ya buluu; na kuwikiria sahani, dishi ra marumba, bakuli na njaghi kwa wundu ghwa mafunyo gha kunywa; ugho mkate ghwa matuku ghose wori ghuchawikirilwa ahoeni.

⁸ Niko wichaala nguwo itinikie aighu yaro, na kufinikira mrongo ghwa mburi, ima wingire midi yaro.

⁹ Nawo wichawada nguwo ya buluu, na kufinikira kinara cha taa, na taa raro, vishawaro va wutambi, na sahani raro, na vilambo vose vitumilwagha kwa kuidunga mavuda;

¹⁰ nawo wichaifunganya chiaimweri na vilambo varo vose na mrongo ghwa mburi na kuiwika aighu ya kilambo cheiduka.

¹¹ Wichaala nguwo ya buluu aighu ya madhabahu ya dhahabu, na kuifinikira mrongo ghwa mburi, ima wingire midi yaro.

¹² Nawo wichavitumbanya vilambo vose vitumilwagha kwa wutasi andenyi ya Andu kwa wueli, na kuvifunga na nguwo ya buluu, na kuvifinikira na mrongo ghwa mburi; ima wingire midi yaro eduka.

¹³ Madhabahu wichaifunya ivu, na kuala nguwo ya zambarau aighu yaro;

¹⁴ nawo wichawikiria aighu yaro vilambo vose va madhabahu vitumilwagha aho; chuwigha, miiko, uma, mikulupo na beseni, vilambo vose va madhabahunyi, nao wiale mrongo ghwa mburi aighu yaro ima wingire midi yaro.

¹⁵ Hata iji Haruni na wana wake wameria kufinikira Andu kwa Wueli na vilambo varo, niko wana wa Kohathi wichacha na kuviduka ngelo kambi yakahamishwa; ela wiseadade ivo vilambo vieleshero, wichefwa. Ivo nivo vilambo va Hema ekwania vichaakaia vikidukwa ni wana wa Kohathi.

¹⁶ “Eleazari, uo mwana wa mkohani Haruni, uchakaia ukizighana mavuda ghekora taa, marumba ghinukie nicha, mafunyo gha viro gha toe, mavuda gheshinga wandu na wuzighaniri ghose ghwa Hema chiaimweri na vilambo vose vieleshero.”

¹⁷ BWANA ukamzera Musa na Haruni,

¹⁸ “Msakesigha nyumba ra kichuku cha kivalwa cha Kohathi ritotesho aghadi ya Walawi;

¹⁹ ela muwitesie wisesoghode kaavui na vilambo vieleshero kuchumba, wichefwa. Haruni na wana wake wingie andenyi, na kuwipangia kazi rawo kula umu na msigo ghwake;

²⁰ ela wisengie andenyi hata kutini kuzighana ivo vilambo vieleshero; wichefwa.”

Kazi ra Walawi wa kivalwa cha Gershoni

²¹ BWANA ukamzera Musa,

²² “Wokoni kutale wana wa Gershoni, kunughana na vichuku na nyumba rawo,

²³ awo wivikie irika ja miaka mirongo idadu hata mirongo misanu, awo wose widimagha kudumika kwa kazi riko andenyi ya Hema ekwania.

²⁴ Ughu nigho wudumiki ghwa nyumba ra kivalwa cha Gershoni iji wakabonya kazi na kuduka misigo:

²⁵ wichaduka pazia ra Hema, na kifuniko cha nandenyi na cha shighadi, kifuniko charo cha mrongo ghwa mburi, icho chiko aighu yaro; na pazia ya mnyangonyi ghwa Hema ekwania,

²⁶ na wurigha ghwa nguwo ghwa wazenyi ghumarishiro mbai mbai ya Hema na madhabahu, na pazia ya mnyango ghwa wazenyi na kamba raro, na vilambo vose vitumilwagha kwa wudumiki; nawo wichabonya ghose ghifwanagha kwa wundu ghwa vilambo ivo.

²⁷ Wudumiki ghose ghwa wana wa kivalwa cha Gershoni ghuchakaia aisi ya wuzighaniri ghwa Haruni na wana wake; ghwa ivo vilambo vose wichaaduka, na kazi rose wichaabonya; na oho kuchawipangia ivo vilambo vose wichaaduka.

²⁸ Ughu nigho wudumiki ghwa nyumba ra wana wa kivalwa cha Gershoni andenyi ya Hema ekwania; kazi yawo ichakaia aisi ya wuzighaniri ghwa Ithamari mwana wa mkohani Haruni.

Kazi ra Walawi wa kivalwa cha Merari

²⁹ “Kuwitale wana wa Merari kunughana na vichuku na nyumba rawo;

³⁰ awo wivikie irika ja miaka mirongo idadu, hata irika ja miaka mirongo misanu, awo wose widimagha kudumika kwa kazi riko andenyi ya Hema ekwania.

³¹ Na wudumiki ghwawo ghose andenyi ya Hema ekwania ghuchakaia ni kuduka vilambo ivi: fremu ra Hema, mbau raro, nguro na vishawalata va nandonyi,

³² nguro ra wurigha ghwa waza iko mbai mbai, na vishawalata varo va nandonyi, vigingi na kamba chiaimweri na vilambo varo vose. Na oho kuchawipangia vilambo kwa marina gharo ivo iwifwanagha wividuke.

³³ Ughu nigho wudumiki ghose ghwa nyumba ra wana wa Merari andenyi ya Hema Ekwania; nagho ghuchakaia aisi ya wuzighaniri ghwa Ithamari mwana wa mkohani Haruni.”

Mtalo ghwa Walawi

³⁴ Nao Musa na Haruni chiaimweri na vilongozi va izungu ja wandu, wikawitala wana wa kivalwa cha Kohathi kunughana na vichuku na nyumba rawo,

³⁵ awo wivikie irika ja miaka mirongo idadu hata irika ja miaka mirongo misanu, awo wose widimagha kudumika kwa kazi riko andenyi ya Hema ekwania.

³⁶ Na mtalo ghwawo kunughana na nyumba rawo ghorekoghe elfu iwi maghana mfungade na mirongo misanu.

³⁷ Ughu nigho mtalo ghwa kivalwa cha Kohathi wose werekoghe wikidumika andenyi ya Hema ekwania, awo Musa na Haruni werewitalieghe, sa iji koni BWANA oremlaghirieghe Musa.

³⁸ Mtalo ghwa wana wa Gershoni kunughana na vichuku na nyumba rawo,

³⁹ awo wivikie irika ja miaka mirongo idadu hata irika ja miaka mirongo misanu, awo wose widimagha kudumika kwa kazi riko andenyi ya Hema ekwania,

⁴⁰ kunughana na vichuku na nyumba rawo, ghorekoghe elfu iwi maghana arandadu, na mirongo idadu.

⁴¹ Ughu nigho ghorekoghe mtalo ghwa wana wa Gershoni kunughana na nyumba rawo, awo wose werekoghe wikidumika andenyi ya Hema ekwania, awo Musa na Haruni werewitalieghe sa iji koni BWANA oremlaghirieghe Musa.

⁴² Mtalo ghwa wana wa Merari kunughana na vichuku na vinyumba vawo,

⁴³ awo wivikie irika ja miaka mirongo idadu hata irika ja miaka mirongo misanu, awo wose widimagha kudumika kwa kazi riko andenyi ya Hema ekwania,

⁴⁴ na mtalo ghwaro kunughana na nyumba rawo ghorekoghe elfu idadu na maghana awi.

⁴⁵ Awo niwo wandu wa nyumba ra wana wa Merari weretaliloghe, awo Musa na Haruni werewitalieghe sa iji koni BWANA oremlaghirieghe Musa.

⁴⁶ Awo Walawi wose weretaliloghe ni Musa na Haruni na vilongozi va Israeli, kunughana na vichuku vawo na nyumba rawo,

⁴⁷ awo wivikie irika ja miaka mirongo idadu hata irika ja miaka mirongo misanu, awo wose widimagha kudumika kwa kazi riko andenyi ya Hema ekwania na kuduka misigo,

⁴⁸ werekoghe elfu wunyanya maghana masanu na mirongo wunyanya.

⁴⁹ Nawo werepangiloghe, kula mundu kwa kazi yake, ngera ni edumika, angu eduka; wikatalwa sa iji koni BWANA oremlaghirieghe Musa.