MITALO 34 - Biblia Ilagho Jiboie Kwa Wandu Wose

Mano ya Isanga

¹ BWANA ukamzera Musa,

² “Laghira wandu wa Israeli kuwizere huwu, Iji mwangia isanga ja Kanaani, (isanga ja Kanaani jose nijo jichaakaia ifwa jenyu)

³ luwaru lwa kusinyi lwa mwano ghonyu, luchakaia kufuma kireti cha Sini, kuanana na Edomu, na mwano ghonyu ghwa kusinyi ghuchakaia kufuma kutua kwa Bahari ya Chumbi chia ya Mashariki;

⁴ nagho ghuchaghaluka cha kusinyi kuseria Akrabimu, na kuruwuka cha Sini; nagho ghuchatuya kusinyi ya Kadesh-barnea. Ghuchaenda imbiri hata kuvika Hazada, na kuida hata Azmoni;

⁵ ghukaghaluka kufuma Azmoni ghuvike kamoda ka Misri na kutua Bahari ya Mediterania.

⁶ “Mwano ghonyu ghwa magharibi ghuchakaia Bahari ya Mediterania, na mbai-mbai yaro, ugho nigho mwano ghonyu ghwa magharibi.

⁷ “Mwano ghonyu ghwa kaskazinyi, mchaghubonya kufuma Bahari ya Mediterania hata Mghondi ghwa Hori.

⁸ Kufuma mghondi ghwa Hori, mwano ghuchaenda hata ghungie Hamathi, ghuvike Zedadi,

⁹ na kutua ghusirie Hazari-enani; ugho nigho ghuchaakaia mwano ghonyu ghwa kaskazinyi.

¹⁰ “Mwano ghonyu ghwa mashariki mchaghubonya kufuma Hazari-enani ghuende ghuvike Shefamu,

¹¹ ghusee kufuma Shefamu ghuvike Ribla iichia cha mashariki ya Aini, na kusea hata ghuvike Ribla iichia cha mashariki ya Aini, na kusea hata ghuvike bahari ya Galilaya iichia cha mashariki.

¹² Mwano ghuchurie kusea ghungie Jordani na kusiria Bahari ya Chumbi. Ijo jichakaia isanga jenyu na mwano ghwaro mbai-mbai kose.”

¹³ Musa ukawilaghira Wandu wa Israeli ukighamba, “Ijo nijo isanga mchaajipata ifwa kwa kura, ijo BWANA ulaghirie kurineka mbari ikenda na nusu.

¹⁴ Mbari ya Reubeni, na mbari ya Gadi, wamerie kupata ifwa jawo kunughana na nyumba ra weke ndee; na wokoni nusu ya mbari ya Manase.

¹⁵ Iro mbari iwi na nusu, wameria kupata ifwa jawo Jordani nakimonu kulangaya Jeriko, ichia cha mashariki andu iruwa jibukiagha.”

Vilongozi vifwanagha kuwagha isanga

¹⁶ Nao BWANA ukamzera Musa,

¹⁷ “Agha ni marina gha wandu awo wichaammbaghia isanga jikaie ifwa jenyu: mkohani Eleazari, na Joshua mwana wa Nuni.

¹⁸ Kuwade kilongozi chewagha ifwa, chimweri kwa kula mbari.

¹⁹ Wandu awo marina ghawo ni agha: wa mbari ya Juda ni Kalebu mwana wa Jefune.

²⁰ Wa mbari ya Simeoni ni Shemueli mwana wa Amihudi.

²¹ Wa mbari ya Benjamini ni Elidadi mwana wa Chisiloni.

²² Wa mbari ya Dani, kilongozi ni Buki mwana wa Jogili.

²³ Wa mbari ya Josefu: mbari ya Manase, kilongozi ni Hanieli mwana wa Efodi.

²⁴ Mbari ya Efraimu, kilongozi ni Kemneli mwana wa Shifutani.

²⁵ Wa mbari ya Zebluni, kilongozi ni Elizafani mwana wa Parnaki.

²⁶ Wa mbari ya Isakari, kilongozi ni Paltieli mwana wa Azani.

²⁷ Wa mbari ya Asheri, kilongozi ni Ahihudi, mwana wa Sheloni.

²⁸ Wa mbari ya Naftali, kilongozi ni Pedaheli mwana wa Amihudi.”

²⁹ Awo niwo wandu BWANA ulaghirie wiwaghie wandu wa Israeli ifwa andenyi ya isanga ja Kanaani.