MITALO 3 - Biblia Ilagho Jiboie Kwa Wandu Wose

Wana wa Haruni

¹ Ivi nivo vivalwa va weke Haruni na Musa, seji verekoghe ingelo BWANA oreghorieghe na Musa aighu ya Mghondi ghwa Sinai.

² Haruni orekoghe na wana bana: wa imbiri ni Nadabu, na waruna ni Abihu, Eleazari, na Ithamari;

³ awo wereshingiloghe mavuda na kuwikwa wakfu wikaie wakohani.

⁴ Ela Nadabu na Abihu werefueghe imbiri ya BWANA, iji werefunyireghe modo ghwa kizongona kisha aja kireti cha Sinai. Awo ndewerekoghe na wana wangi; kwa kuwo, Eleazari na Ithamari werekoghe wikibonya kazi ya wukohani matuku ghose ndee uko moyo.

Kuwika Walawi wiwidumikie Wakohani

⁵ Nao BWANA ukamzera Musa,

⁶ “Reda wandu wa kichuku cha Lawi kaavui na mkohani Haruni, eri wimtesie.

⁷ Wichabonya kazi rake, na ra ijo izungu jose imbiri ya Hema ekwania, ngelo widumikagha andenyi ya andu kwapo kokaia.

⁸ Wichakaia wikivizighana vilambo vose va Hema ekwania, na kuwidumikia wandu wa Israeli ingelo wawuyadumika andenyi ya andu kwapo kokaia.

⁹ Kuchamneka Haruni na wana wake Walawi wose kufuma kwa Waisraeli.

¹⁰ Na oho kuchammbika Haruni na wana wake wikaie wikibonya ugho wukohani ghwawo; ela mndungi mzima ukasoghoda uchabwaghwa.”

¹¹ Nao BWANA ukamzera Musa,

¹² “Ola nameria kuwiwusa Walawi aghadi ya wandu wa Israeli, wulalo ghwa kula mvalwa wa imbiri wa womi wa Israeli. Walawi wichaka wapo;

¹³ angu ituku nerebwaghieghe wavalwa wa imbiri wose andenyi ya isanga ja Misri, nedekusaghuya wavalwa wa imbiri wose andenyi ya Israeli, ikaiagha wandu angu nyamandu; Ini ne BWANA.”

Kutala Walawi

¹⁴ Nao BWANA ukamzera Musa aho kireti cha Sinai,

¹⁵ “Tala Walawi nyumba kwa nyumba kula mundu wa womi wa irika ja mori ghumweri na kuchumba.”

¹⁶ Niko Musa ukawitala sa iji koni BWANA oremlaghirieghe.

¹⁷ Na agho nigho marina gha wana wa Lawi: Gershoni, Kohathi, na Merari.

¹⁸ Marina gha wana wa Gershoni, kunughana na nyumba rawo ni: Libni na Shimei.

¹⁹ Na wana wa Kohathi kunughana na nyumba rawo ni: Amramu, Ishari, Hebroni, na Uzieli.

²⁰ Na wana wa Merari kunughana na nyumba rawo ni: Mahli na Mushi. Ivi nivo vinyumba va Lawi kunughana na vichuku vawo.

²¹ Wagershoni niwo wichewuya Walibni na Washimei.

²² Mtalo ghose ghwa wandu wa womi seji weretaliloghe kufuma wa irika ja mori ghumweri, na kuchumba, ghorekoghe elfu mfungade, na maghana masanu.

²³ Nyumba ra Wagershoni wedeeka wibonyere kambi nyuma ya Hema iichia cha magharibi;

²⁴ Eliasafu mwana wa Laeli nuo orekoghe kilongozi chawo.

²⁵ Kazi ya wana wa Gershoni werenekeloghe andenyi ya Hema ekwania edeeka kuzighana nandenyi yaro, na cha shighadi yaro, na pazia ya mnyango ghwaro.

²⁶ Wurigha ghwa nguwo ghwa wazenyi, pazia ya mnyango ghwa wazenyi, iyo iko mbai mbai ya Hema na madhabahu, na pazia ya mnyango, na wudumiki ghose ghwa ivo vilambo.

²⁷ Kivalwa cha Kohathi niwo weni wicheewuya Waaramu, na Waishari, na Wahebroni, na Wauzieli.

²⁸ Mtalo ghwa wandu wose wa womi kufuma wa irika ja mori ghumweri na kuchumba ghorekoghe elfu wunyanya na maghana arandadu, wiandikilo wedumika andenyi ya Andu kwa Wueli.

²⁹ Nyumba ra wana wa Kohathi wedeeka wibonyeghee kambi iichia cha kusinyi ya Hema.

³⁰ Eliasafu mwana wa Uzieli nuo orekoghe kilongozi chawo.

³¹ Na kazi yawo edeeka kuzighana iyo Sanduku ya Ilaghano, meza, kinara cha taa, madhabahu, vilambo va Andu kwa Wueli kuchumbie, na wudumiki ghose ghwa ivo vilambo.

³² Eleazari mwana wa mkohani Haruni nuo orekoghe m'baa wa vilongozi va Walawi, na kuwizighana awo werekoghe wazighaniri wa Andu kwa Wueli.

³³ Kivalwa cha Merari niwo weni wicheewuya Wamahli na Wamushi.

³⁴ Wandu wose wa womi kunughana na mtalo ghwawo, kufuma wa irika ja mori ghumweri na kuchumba ghorekoghe elfu irandadu na maghana awi.

³⁵ Sureili mwana wa Abihaili, nuo orekoghe kilongozi chawo; nawo werekoghe wikipanga ii chia cha kaskazinyi ya Hema.

³⁶ Wana wa Merari werenekeloghe kazi ezighana fremu ra Hema, mbau, nguro, vishawalata va nandonyi, na vilambo vizima vewadanishwa navo. Werenekeloghe wudumiki ghose ghwa ivo vilambo.

³⁷ Wokoni werenekeloghe kazi ezighana nguro ra waza iyo erekoghe mbai mbai, vishawalata varo va nandonyi vigingi varo na kamba raro.

³⁸ Musa, Haruni na wana wake, wedeeka wibonyeghee kambi naimbiri ya Hema iichia cha mashariki. Awo werekoghe na kazi ezighana mizango ya wutasi andenyi ya Andu kwa Wueli, kwa wundu ghwa wandu wa Israeli; mndungi mzima ukatima kubonya ugho wudumiki wadabwaghwa.

³⁹ Kichuku cha Lawi chose cheretaliloghe kunughana na nyumba rawo, seji Musa na Haruni werewitalieghe kwa kulaghirwa ni BWANA, wandu wose wa womi kufuma wa irika ja mori ghumweri, na kuchumba werekoghe elfu mirongo iwi na iwi.

Kichuku cha Lawi kuwusa wulalo ghwa wavalwa wa imbiri

⁴⁰ Nao BWANA ukamzera Musa, “Tala wavalwa wa imbiri wa womi wose wa wandu wa Israeli, kufuma wa irika ja mori ghumweri na kuchumba, nao kuandike marina ghawo.

⁴¹ Na oho kuchawiwika wavalwa wa imbiri wa Walawi wikaie wapo; ini ne BWANA. Wichakaia wulalo ghwa wavalwa wa imbiri wose wiko aghadi ya wandu wa Israeli; na wokoni mfugho rawo richakaia wulalo ghwa wavalwa wa imbiri wa mfugho rose ra wandu wa Israeli.”

⁴² Niko Musa ukawitala wavalwa wa imbiri wose wa wandu wa Israeli, sa iji koni orelaghiriloghe ni BWANA.

⁴³ Na wavalwa wa imbiri wose weretaliloghe na kuandikwa marina kufuma wa irika ja mori ghumweri, na kuchumba, werekoghe elfu mirongo iwi na iwi maghana awi na mirongo mfungade na wadadu.

⁴⁴ Niko BWANA ukamzera Musa,

⁴⁵ “Wika wavalwa wa imbiri wose wa Walawi wikaie wulalo ghwa wavalwa wa imbiri wose wa wandu wa Israeli, na mfugho rose ra Walawi wulalo ghwa mfugho ra wandu wa Israeli, na Walawi wichakaia wapo; ini ne BWANA.

⁴⁶ Kwa kukaia mtalo ghwa wavalwa wa imbiri ghwa wandu wa Israeli ghwachumba ghwa Walawi kwa wandu maghana awi mirongo mfungade na wadadu, suti awo wikombolo.

⁴⁷ Kuchawusa vibelele va feza visanu kwa mundu umweri, kunughana na kipimo cha Andu kwa Wueli.

⁴⁸ Iro pesa kurineke Haruni na wana wake.”

⁴⁹ Niko aho Musa ukariwada iro pesa ra wukomboli kufuma kwa awo wandu mtalo ghwawo ghorechumbieghe,

⁵⁰ awo wavalwa wa imbiri wa Israeli, vibelele va feza elfu imweri maghana adadu na mirongo irandadu na isanu, kunughana na kipimo cha Andu kwa Wueli,

⁵¹ ukarineka Haruni na wana wake, sa iji koni BWANA oremlaghirieghe.