MITALO 29 - Biblia Ilagho Jiboie Kwa Wandu Wose

Mafunyo gha ndima ya mwaka mmbishi

¹ Ituku ja imbiri ja mori ghwa mfungade, mkwanyike kwa wutasi; msebonye kazi. Ni ituku konyu jekaba tarumbeta,

² Mumfunyire BWANA kizongona chekora; irumba jimnukiagha nicha. Mfunye mwana wa njau umweri, bauru imweri na wana wa ng'ondi wa womi mfungade wa mwaka ghumweri wisewadie itiko jingi.

³ Wokoni mfunye kizongona cha viro, kilo idadu ra mufu ghuboie, ghudendere na mavuda kwa iyo njau, kilo iwi kwa iyo bauru,

⁴ na kilo imweri kwa kula imu ya wana wa ng'ondi mfungade;

⁵ chiaimweri na fwandi imweri ya kizongona kwa wundu ghwa kaung'a chikaie wupatanisho kwa wundu ghonyu.

⁶ Mfunye vizongona ivi, kula na vija vizongona vekora va tulituli, vifunywaghwa kula ituku ja imbiri ja mori chiaimweri na vizongona varo vekora, na viro, na va kunywa seji vilaghirilo ivi vizongona va vindo vamnukiagha BWANA nicha.

Mafunyo ituku ja wupatanisho

⁷ Ituku ja ikumi ja ugho mori ghwa mfungade mkaie na ikwanyiko ja wutasi ituku ijo mchafunga tumu, msebonye kazi.

⁸ Ela mumfunyire BWANA kizongona chekora; irumba jimnukiagha nicha; mwana wa njau umweri, bauru imweri na wana wa ng'ondi wa womi mfungade wa mwaka ghumweri wisewadie itiko jingi;

⁹ chiaimweri na vizongona varo va viro, kilo idadu ra mufu ghuboie ghuranganyiro na mavuda kwa iyo njau, kilo iwi kwa iyo bauru,

¹⁰ na kilo imweri kwa kula umu wa awo wana wa ng'ondi mfungade.

¹¹ Wokoni fwandi imweri ya kizongona kwa wundu ghwa kaung'a kula na icho kizongona cha wupatanisho na kizongona chekora cha vizongona varo va viro na va kunywa.

Mafunyo gha ndima ya viwanda

¹² Ituku ja ikumi na isanu ja mori ghwa mfungade, mkaie na ikwanyiko ja wutasi. Msebonye kazi, ela mchakaia na Ndima ya BWANA kwa matuku mfungade.

¹³ Mumfunyire BWANA kizongona chekora, irumba jimnukiagha nicha; wana wa njau ikumi na wadadu, bauru iwi, na wana wa ng'ondi ikumi na bana wa mwaka ghumweri wisewadie itiko jingi.

¹⁴ Wichafunywa chiaimweri na vizongona varo va viro, kilo idadu ra mufu ghuboie ghuranganyiro na mavuda kwa kula imu ya awo wana wa njau ikumi na wadadu; kilo iwi kwa kula imu ya iro bauru iwi;

¹⁵ na kilo imweri kwa kula imu ya awo wana wa ng'ondi ikumi na bana.

¹⁶ Wokoni fwandi imweri ya kizongona kwa wundu ghwa kaung'a, kula na ivo vizongona vekora va tulituli, na vizongona varo va viro na va kunywa.

¹⁷ Itiko ja kawi, mfunye wana wa njau ikumi na wawi, bauru iwi, na wana wa ng'ondi wa womi ikumi na bana wa mwaka ghumweri, wisewadie itiku jingi;

¹⁸ chiaimweri na vizongona va viro na va kunywa, kunughana na mzango ghwawo ghofunywagha na kula njau, bauru na awo wana wa ng'ondi.

¹⁹ Wokoni fwandi imweri ya kizongona kwa wundu ghwa kaung'a, kula na ivo vizongona vekora va tuli tulituli, na vizongona varo va viro na va kunywa.

²⁰ Ituku ja kadadu, mfunye wana wa njau ikumi na umweri, bauru iwi, na wana wa ng'ondi wa womi ikumi na bana wa mwaka ghumweri wisewadie itiko jingi,

²¹ chiaimweri na vizongona va viro na va kunywa kunughana na mzango ghwaro ghofunywanya na kula njau, bauru, na awo wana wa ng'ondi.

²² Wokoni fwandi imweri ya kizongona kwa wundu ghwa kaung'a, kula na ivo vizongona vekora va tulituli, na vizongona varo va viro na va kunywa.

²³ Ituku ja kana, mfunye wana wa njau ikumi, bauru iwi, na wana wa ng'ondi wa womi ikumi na bana wa mwaka ghumweri wisewadie itiko jingi;

²⁴ chiaimweri na vizongona va viro na va kunywa kunughana na mzango ghwaro ghofunywanya na kula njau, bauru, na awo wana wa ng'ondi.

²⁵ Wokoni fwandi imweri ya kizongona kwa wundu ghwa kaung'a, kula na ivo vizongona vekora va tuli tuli, na vizongona varo va viro, na va kunywa.

²⁶ Ituku ja kasanu, mfunye wana wa njau ikenda, bauru iwi, na wana wa ng'ondi wa womi ikumi na bana wa mwaka ghumweri wisewadie itiko jingi;

²⁷ chia imweri na vizongona va viro na va kunywa kunughana na mzango ghwaro ghofunywanya na kula njau, bauru, na awo wana wa ng'ondi.

²⁸ Wokoni fwandi imweri ya kizongona kwa wundu ghwa kaung'a kula na ivo vizongona vekora va tulituli, na vizongona varo va viro, na va kunywa.

²⁹ Ituku ja karandadu, mfunye wana wa njau wunyanya bauru iwi, na wana wa ng'ondi wa womi ikumi na bana wa mwaka ghumweri wisewadie itiko jingi;

³⁰ chiaimweri na vizongona va viro na va kunywa kunughana na mzango ghwaro ghofunywanya na kula njau, bauru, na awo wana wa ng'ondi.

³¹ Wokoni fwandi imweri ya kizongona kwa wundu ghwa kaung'a, kula na ivo vizongona vekora va tulituli, na vizongona varo va viro, na va kunywa.

³² Ituku ja mfungade, mfunye wana wa njau mfungade, bauru iwi, na wana wa ng'ondi wa womi ikumi na bana wa mwaka ghumweri wisewadie itiko jingi;

³³ chiaimweri na vizongona va viro na va kunywa kunughana na mzango ghwaro ghofunywanya na kula njau, bauru, na awo wana wa ng'ondi.

³⁴ Wokoni fwandi imweri ya kizongona kwa wundu ghwa kaung'a kula na ivo vizongona vekora va tuli tuli, na vizongona varo va viro, na va kunywa.

³⁵ Ituku ja wunyanya, mkaie na ikwanyiko ja wutasi. Msebonye kazi;

³⁶ ela mfunye vizongona vekora, navo ni irumba jimnukiagha BWANA nicha. Mfunye njau imweri, bauru imweri, na wana wa ng'ondi wa womi mfungade wa mwaka ghumweri wisewadie itiko jingi;

³⁷ na vizongona va viro, na va kunywa, kunughana na mzango ghwaro ghofunywanya na kula njau, bauru, na awo wana wa ng'ondi.

³⁸ Wokoni fwandi imweri ya kizongona kwa wundu ghwa kaung'a, kula na ivo vizongona va tulituli, na vizongona varo va viro na va kunywa.

³⁹ Vizongona ivi mchamfunyira BWANA ndima renyu ra matuku ghiwikilo, kula na vizongona vekatisha ighemi, na vizongona vifunywagha kwa ngolo na vizongona venyu va viro, na va kunywa, na vizongona va mapatano.

⁴⁰ Na Musa ukawighoria wandu wa Israeli agho malagho ghose orelaghiriloghe ni Mlungu.