MITALO 27 - Biblia Ilagho Jiboie Kwa Wandu Wose

Wai wa Selofehadi

¹ Mahla, Noa, Hogla, Milka na Tirza, werekoghe wai wa Solofehadi mwana wa Heferi, wawae Gileadi, wa kivalwa cha Makiri mwana wa Manase kivalwa cha Josefu.

² Wikacha na kukaia kimusi imbiri ya Musa, na mkohani Eleazari, na vilongozi, na wandu wa izungu jose mnyangonyi ghwa Hema ekwania, wikaghamba,

³ “Aba orefueghe kireti. Uo nderekoghe aghadi ya waja wandu werekwaneghe na Kora wikimtangala ela odefwa kwa kaung'a rake moni; nao nderewadieghe wana wa womi.

⁴ Da usowa wada irina aghadi ya kivalwa chake angu wei userewadieghe mwana wa womi? Dinekenyi ndoe aghadi ya weke mruna-aba.”

⁵ Musa ukareda malagho ghawo kwa BWANA,

⁶ na BWANA ukamzera Musa,

⁷ “Wai wa Zelofehadi weko na hachi; kuwineke ndoe ya ifwa aghadi ya waruna-ndee, wipate kujiwusa na ifwa ja ndee.

⁸ Na oho kuwizere wandu wa Israeli, ‘Ngera mundu wafwa usewadie mwana wa womi, kumneke mwai wake ifwa jake.

⁹ Ikakaia usene mwana wa waka, kuwineke waruna ifwa jake.

¹⁰ Na ikakaia usene waruna, kuwineke waruna-ndee ifwa jake.

¹¹ Ikakaia ndee usene waruna, kumneke mumzawo wa kaavui uwadie ifwa jake. Ilagho iji jichakaia sharia na malaghiro kwa wandu wa Israeli, sa iji koni ini BWANA nemlaghirieghe Musa.’”

Joshua kusaghulwa ukaie wulalo ghwa Musa

¹² BWANA ukamzera Musa, “Joka aighu ya ughu mghondi ghwa Abarimu, kupate kujiwona ijo isanga niwinekie wandu wa Israeli.

¹³ Kukameria kujiwona, nakumoni kuchafwa kurangane na wakenyu wiidie, seji mwanyinyu Haruni orefueghe ukarangana nawo;

¹⁴ angu morejileghieghe ilagho japo aja kireti cha Sini, iji izungu jerenizughunukiagha, mkalemwa ni kunikuma imbiri yawo aja machinyi.” (Agho ni ghaja machi gha Meriba, aja Kadeshi kireti cha Sini).

¹⁵ Musa ukamzera BWANA,

¹⁶ “BWANA uo Mlungu wa roho ra wandu wose, ndewike mundu ukaie kilongozi cha wandu,

¹⁷ uo uchaakaia ukiwilongoza; eri wandu wa BWANA wisechekaia sa ng'ondi risewadie mlisha.”

¹⁸ BWANA ukamzera Musa, “Wada Joshua mwana wa Nuni, mundu uko na roho ya wuing'oni, kummbikirie mikonu;

¹⁹ nao kum'bonye ukaie kimusi imbiri ya mkohani Eleazari, na imbiri ya izungu jose, na oho kummbike ukaie kilongozi wulalo ghwako imbiri yawo.

²⁰ Kumneke nguma aighu ya kazi imu yako eri izungu jose ja wandu wa Israeli wipate kumsikira.

²¹ Nao uchakaia ukimghendia mkohani Eleazari, uo uchaakaia ukimzighaniria maza rake kwa Urimu imbiri yapo. Agho uchaakaia ukighora, nigho gheni Joshua na izungu jose ja wandu wa Israeli wichaakaia wikibonya.”

²² Musa ukabonya sa iji koni BWANA oremlaghirieghe. Ukammbwada Joshua na kum'bonya ukaie kimusi imbiri ya mkohani Eleazari na izungu jose ja wandu,

²³ ukammbikiria mikonu, na kum'bonya ukaie kilongozi sa iji koni BWANA oreghambieghe kwa kumlaghira Musa.