MITALO 23 - Biblia Ilagho Jiboie Kwa Wandu Wose

¹ Balaamu ukamzera Balaki, “Niaghie madhabahu mfungade aha, nao kuniredie njau mfungade na bauru mfungade.”

² Balaki ukabonya seji koni Balaamu oremzerieghe; na Balaki na Balaamu wikafunya kizongona aighu ya kula madhabahu njau imweri na bauru imweri.

³ Balaamu ukamzera Balaki, “Kaia kimusi aeni aha kaavui na kizongona chako chekora, nani nichaghenda; kewada BWANA wadima kucha dikwane, na ijo jose uchaaniwonyera, nichakughoria.” Ukajoka andu kuko ighu worinyi.

⁴ BWANA ukakwana na Balaamu, na Balaamu ukamzera, “Nameria kuboisa madhabahu mfungade, na kufunya njau imweri na bauru imweri aighu ya kula madhabahu.”

⁵ BWANA ukamneka Balaamu malagho gheghora, ukamduma kwa Balaki uendemghoria.

⁶ Nao ukawuya kwa Balaki ukamkua uko kimusi mbai na mbai ya kizongona chake chekora andwamweri na wabaa wose wa Moabu.

⁷ Balaamu ukawada kudeda na kughamba, “Balaki wanireda kufuma Aramu, mzuri wa Moabu waniredie kufuma mighondi ya mashariki. ‘Choo kuniwasirie Jakobo njowe, choo kuniewerie Israeli!’

⁸ Nimmbwasira wada njowe uo Mlungu usemmbwasire njowe? Nimuewia wada uo Mlungu usemuewie?

⁹ Angu nammbona niko koighu mighondinyi namzighana niko aighu ya mighondi mitini. Hawaja ni wandu wikaiagha wiekeri, hata ndewikutalagha weni andwamweri na mbari zima.

¹⁰ Nani udimagha kivalwa cha Jakobo chiko sa teri, angu kubonya mtalo ghwa robo ya Israeli? Sighenyi nifo kifwa cha mundu wa hachi, na kutua kwapo kufwanane na kwake.”

¹¹ Nao Balaki ukamzera Balaamu, “Kwanibonya wada huwu? Naakuwanga kuniwasire wamaiza wapo njowe, da hoku nawona ndekubonyere ilagho jingi ela kwaawirasimia!”

¹² Nao ukatumbulia, “Nechi eeka suti nidede malagho agheni BWANA wanineka nighore.”

Wulodi ghwa kawi ghwa Balaamu

¹³ Niko Balaki ukamzera, “Choo diende andu kuzima kudimagha kuwona wamu, ela ni aweni wiko kaavui; na aho kuniwasirie njowe.”

¹⁴ Ukamdwa hata mbuwa ya Sofimu, koighu mghondinyi ghwa Pisga; ukaagha madhabahu mfungade; ukafunya kizongona cha njau imweri na bauru imweri aighu ya kula madhabahu.

¹⁵ Balaamu ukamzera Balaki, “Kaia kimusi aha kaavui na kizongona chako chekora, niendekwana na BWANA akimonu aja.”

¹⁶ Nao BWANA ukakwana na Balaamu, ukamneka malagho gheghora, ukamduma kwa Balaki uendemghoria.

¹⁷ Nao ukawuya kwa Balaki, ukamkua uko kimusi mbai na mbai ya kizongona chake chekora, na wabaa wa Moabu wiko andwamweri nao. Balaki ukamkotia, “BWANA waghora wada?”

¹⁸ Balaamu ukaghamba, “Balaki wuka kusikire, nisikire, ee mwana wa Sipori:

¹⁹ Mlungu si mdamu udimagha kughora tee, angu mwana wa mdamu udimagha kuhea. Wele ughora sena ulemo ni kubonya? Angu udede, sena ulemo ni kukatisha?

²⁰ Ola neelaghirwa nirasimie; Uo wamerie kurasimia nani sidimagha kughalusa.

²¹ Uo ndewonie mzwana ghungi ghuzamie kwa Jakobo, hata kuwona wasi ghungi kwa Israeli anduangi. Uo BWANA Mlungu wawo oko andwamweri nawo, na mzuri m'baa wawuyaghora aghadi kwawo.

²² Mlungu wawifunyire Misri nawo weko na ndighi sa mbogho.

²³ Angu ndekuwadie wusawi ghungi ghumloghagha Jakobo, hata ndekuwadie wulaghui ghungi ghoreda wuwiwi aighu ya Israeli anduangi. Na wandu wichaghora aighu ya Israeli, ‘Wonenyi seji Mlungu ubonyere.’

²⁴ Wonenyi wandu wiwukagha sa shimba ya waka! Wikuwusiragha sa shimba ya womi! Ndeiwuyaadima hata yameria kuja madiwo ghake, na kuinywa bagha ya icho yachibwagha.”

²⁵ Nao Balaki ukamzera Balaamu, “Kawona kusewiwasiragha njowe, hata kuwirasimia wori kusewirasimie.”

²⁶ Ela Balaamu ukamtumbulia Balaki, “Sikughorieghe, ‘Ijo jose BWANA uchaaghora, nijo jeni nichaajibonya?’”

²⁷ Niko Balaki ukamzera Balaamu, “Choo idana nikughenje andu kuzima, kewada Mlungu wadima kurumiria kuniwasirie awandu njowe kufuma aho.”

²⁸ Nao Balaki ukamghenja Balaamu koighu mghondinyi ghwa Peori, ghulangayagha noko cha kireti.

²⁹ Balaamu ukamzera Balaki, “Niaghie madhabahu mfungade aha, nao kuniredie njau mfungade na bauru mfungade.”

³⁰ Balaki ukabonya seji koni Balaamu oremzerieghe; ukafunya kizongona njau imweri na bauru imweri aighu ya kula madhabahu.