MITALO 20 - Biblia Ilagho Jiboie Kwa Wandu Wose

Maza rerebonyekieghe aja Kadeshi

¹ Nao izungu jose ja wandu wa Israeli jikacha kireti cha Sini mori ghwa imbiri, nawo wikakaia Kadeshi; Miriamu ukafwa, ukarikwa ahoeni.

² Andu aho ndekorekoghe na machi, na wandu wikawikwanyikia Musa na Haruni.

³ Wikamzughunukia Musa wikighamba, “Ekaiagha baa ngera dedefwanya na wanidu ingelo werefueghe imbiri ya BWANA aja Hemenyi.

⁴ Kwaki kooredagha ikwanyiko ja BWANA kireti ching'ane huwu, dichefuya aha chiaimweri na mfugho redu?

⁵ Na kwaki kodifunyagha Misri kukadiredagha aha kuzamie huwu? Si andu kungi kwa viro, angu tini, andu mizabibu, angu mikomamanga; hata machi gheni ghenywa ndeghiko.”

⁶ Niko Musa na Haruni wikafuma ikwanyikonyi, wikaghenda na kughwa kijimijimi mnyangonyi ghwa Hema ekwania. Nao wubaa ghwa BWANA ghukawifutukia,

⁷ na BWANA ukamzera Musa,

⁸ “Wada ija zobo, kughendanye na mwanyinyu Haruni mujikwanye izungu; nao kuzere igho jifunye machi imbiri yawo. Kwa chia iyo, kuchawifunyira machi ighonyi winyo na mfugho rawo.”

⁹ Musa ukaishoa zobo imbiri ya BWANA sa iji koni oremzerieghe.

¹⁰ Nao Musa na Haruni wikajikwanya izungu imbiri ya igho, na Musa ukawizera, “Idana sikirenyi inyo waleghi, mwakunde dimfunyire machi a ighonyi aha?”

¹¹ Niko Musa ukawusira mkonu ghwake, ukajikaba igho na zobo yake mando awi; machi ghikafuma kwa wungi, na izungu jikanywa chiaimweri na mfugho rawo.

¹² BWANA ukawizera Musa na Haruni, “Kwa kukaia msenirumirie, nenyo mwalemwa kunikuma imbiri ya wandu wa Israeli, ndemchaajingira iji ikwanyiko kwa ijo isanga niwinekie.”

¹³ Agho nigho machi gha Meriba, andu wandu wa Israeli weremzughunukieghe BWANA, nao ukakuwonyera kwawo seji uko mweli.

Mzuri wa Edomu kulegha wandu wa Israeli wiseide

¹⁴ Nao Musa ukaduma wandu kwa mzuri wa Edomu kufuma Kadeshi ukamzera, “Mwanyinyu Israeli waghamba kukaia oho kwaichi wasi ghose ghudipatire:

¹⁵ seji weke aba wereserieghe Misri, dikakaia aho kwa ngelo ndacha, na Wamisri wikadiwonia nandighi isi na weke aba.

¹⁶ Na iji deremlilieghe BWANA, oredisikireghe, nao ukamduma malaika, ukadifunya Misri, nesi deko aha Kadeshi, muzi ghuko mpakenyi ghwa isanga jako.

¹⁷ Idana kudirumirie diidie isangenyi kwako. Ndedichaaidia mbuwenyi, angu mbuwa ra mizabibu, hata ndedichaanywa machi ghangi kiriwenyi; ela dichaghenda na chia icheni mbaa, hata dameria kuida isanga jako.”

¹⁸ Ela Waedomu wikamzera, “Kuseide, nichekubwagha.”

¹⁹ Wandu wa Israeli wikaghamba, “Isi diaidiria chia icheni mbaa; hata isi na mfugho redu dikanywa machi ghako dighilipa; isi deekunda kuida koni, ndedikunde ilagho jingi izima.”

²⁰ Ela Waedomu wikaghamba, “Ndemuiidagha.” Niko wikafuma wengi, ijeshi jiko na ndighi; wipate kulwa na wandu wa Israeli.

²¹ Kwa chia ihi, Waedomu wikalegha kuwibaria wandu wa Israeli wiide isangenyi kwawo; na kwa wundu ugho wandu wa Israeli wikaidia chia zima.

Kifwa cha Haruni

²² Niko wikadamba kufuma Kadeshi; na izungu jose ja wandu wa Israeli wikacha na kuvika Mghondi ghwa Hori,

²³ ghuko mwano na isanga ja Edomu; na BWANA ukawizera Musa na Haruni,

²⁴ “Haruni uchafwa ukwanyo andwamweri na wakwawo wiidie, kwa kukaia ndechaangia ijo isanga niwinekie wandu wa Israeli, angu moreleghieghe malaghiro ghapo aja machinyi gha Meriba.

²⁵ Idana mdo Haruni na mwana wake Eleazari mjokanye aighu ya Mghondi ghwa Hori;

²⁶ nao kumruo Haruni nguwo rake, kumrushe mwana wake Eleazari, na Haruni uchafwa aho na kukwanywa andwamweri na wakwawo wiidie.”

²⁷ Musa ukabonya sa iji koni BWANA oremlaghirieghe nawo wikajoka Mghondi ghwa Hori imbiri ya izungu jose.

²⁸ Musa ukamrua Haruni nguwo rake, na kumrusha mwana wake Eleazari, na Haruni ukafwa aho mghondinyi. Niko Musa na Eleazari wikasea kufuma mghondinyi.

²⁹ Hata iji izungu jose jamanya angu Haruni wameria kufwa, wandu wose wa Israeli wikamlilia Haruni kwa matuku mirongo idadu.