MITALO 19 - Biblia Ilagho Jiboie Kwa Wandu Wose

Maivu gha ng'ombe ya mkundu

¹ Nao BWANA ukamzera Musa na Haruni,

² “Ihi ni sharia yapo niilaghirie kukaia wandu wa Israeli winiredie tagho ya ng'ombe ya mkundu isewadie itiko jingi, angu iboli jingi, hata isefungilo ghongolo ingi jingi.

³ Nao mumredie mkohani Eleazari, nayo ichaghenjwa shighadi ya kambi na kubwaghwa imbiri yake.

⁴ Mkohani Eleazari uchawada bagha imu ya iyo tagho na chala chake uishinge mnyangonyi ghwa Hema ekwania mando mfungade;

⁵ na iyo tagho chiaimweri na mrongo ghwake, na nyama, na bagha, na mawula ghake, ichakorwa ukiwona.

⁶ Nao uchawada mudi ghwa mwerezi, na hisopu, na sufu itinikie, na kuvikumba ghadi na ghadi ya iyo tagho ihiagha.

⁷ Niko uo mkohani uchaoghosha nguwo rake, na kukuoghosha na machi, ima konyuma ungie kambinyi; nao uchatalwa kukaia useelie hata luma lwa kenyi.

⁸ Mundu ukoragha iyo tagho, uchaoghosha nguwo rake na kukuoghosha na machi, nao uchatalwa kukaia useelie hata luma lwa kenyi.

⁹ Na mundu mweli uchakwanya ivu ja iyo tagho, na kujiwika shighadi ya kambi andu kueleshero, jichawikwa kwa wundu ghwa izungu ja wandu wa Israeli jikaie jeboisa machi gheelesha na kuinja kaung'a.

¹⁰ Na uo ukwanyagha ijo ivu ja tagho, uchaoghosha nguwo rake, na kutalwa kukaia useelie hata luma lwa kenyi. Sharia ihi ichakaia ya matuku ghose kwa wandu wa Israeli na kwa mghenyi uko aghadi kwawo.

Kuadada gharia

¹¹ “Mndungi ukaadada gharia, uchakaia useelie kwa matuku mfungade;

¹² ituku ja kadadu uchakuelesha na machi ghiboisiro gha mzango ghoelesha, na wokoni ituku ja mfungade; niko uchaaela. Ela ikakaia usekueleshere ituku ja kadadu, na ituku ja mfungade ndechaaela kungi.

¹³ Mundu uo ose ukaadada gharia ya mdamu nao ukaie usekueleshere moni, ualusha Hema ekwania; na mundu uo uchatanywa na wandu wa Israeli kwa kukaia ndemichiro machi ghekuelesha. Uchakaia useelie, nao uchadua mundu useelie.

¹⁴ “Sharia ya mundu ufwagha andenyi ya hema ni ihi: Kula mundu uko andenyi ya hema, na kula mundu ungiagha hemenyi, uchakaia useelie kwa matuku mfungade.

¹⁵ Kula chombo chiko chiari chisefinikiro chichakaia chiseelie.

¹⁶ Mndungi ukaadada mundu wabwaghwa na lufu isakenyi, angu gharia, angu indi ja mundu angu kaburi, uchakaia useelie kwa matuku mfungade.

¹⁷ Awo wandu wiseelie, wichaadwa ivu ja kizongona chekora chifunyiro kwa wundu ghwa kaung'a na kujiranganya na machi ghielie chombonyi.

¹⁸ Mundu uelie uchawada hisopu, na kuingira andenyi ya agho machi, na kughimichira hemenyi, na vilambo vose viko andenyi yaro, na wandu werekoghe aho. Wokoni uchamichira mundu uadadire indi, angu mundu ubwaghilo, angu ufue, angu kaburi.

¹⁹ Uo mundu uchamichira uo useelie agho machi ituku ja kadadu, na ja mfungade; na kwa chia iyo, uchamuelesha ijo ituku ja mfungade. Na uo mundu useelie uchaoghosha nguwo rake, na kukuoghosha na machi; na luma lwa kenyi, uchakaia wameria kuela.

²⁰ “Ela mundu useelie, usekunde kukuelesha waawuyailusha Hema ya BWANA; uchainjwa na kutanywa na ikwanyiko angu uduagha usemichiro agho machi gheelesha wandu wiseelie, kwa huwo waduagha useelie.

²¹ Sharia ihi ichakaia ya matuku ghose kwawo. Uo mundu umichiragha wandu wiseelie agho machi gheelesha uchaoghosha nguwo rake; na mundu ukaghiadada agho machi gheelesha uchakaia useelie hata luma lwa kenyi.

²² Icho chose chichaadadwa ni mundu useelie, chichakaia chiseelie; na uo uchiadadagha icho kilambo, uchakaia useelie hata luma lwa kenyi.”