MITALO 17 - Biblia Ilagho Jiboie Kwa Wandu Wose

Mzata ghwa Haruni

¹ Nao BWANA ukamzera Musa,

² “Ghora na wandu wa Israeli, wikuneke mizata ikumi na iwi, kula kilongozi cha kichuku chikaie na mzata ghwaro. Kula mzata kughuandike irina ja kichuku charo;

³ na mzata ghwa Lawi kughuandike irina ja Haruni. Kula kichuku chikaie na mzata ghumweri.

⁴ Na oho kuiwike andenyi ya Hema ekwania imbiri ya Sanduku ya Ilaghano, andu nikwaniagha na oho.

⁵ Na mzata ghwa mundu nimsaghuagha, ghuchabusa malemba. Kwa chia iyo, nichanyamirisha mazughunuko gha wandu wa Israeli wawuyamzughunukia.”

⁶ Niko Musa ukaghora na wandu wa Israeli, na vilongozi vawo vose wikamneka mizata; kula kilongozi mzata ghumweri kunughana na vichuku vawo; ikakaia mizata ikumi na iwi. Na ugho mzata ghwa Haruni ghorekoghe andwamweri na mizata yawo.

⁷ Musa ukaiwika iyo mizata andenyi ya Hema, imbiri ya Sanduku ya BWANA.

⁸ Nakesho yaro, Musa orengirieghe Hemenyi; ukawona mzata ghwa Haruni ugho ghorekoghe kwa wundu ghwa kichuku cha Lawi, ghufunyire malemba; ghukashekera, na kuva matunda ghiwurue gha mlozi.

⁹ Niko Musa ukaifunya mizata yose, na kuiwonyera wandu wa Israeli, nawo wikaizighana; na kula mundu ukawada mzata ghwake.

¹⁰ BWANA ukamzera Musa, “Wunja mzata ghwa Haruni kughuwike imbiri ya Sanduku ya Ilaghano, ghukaie alama ewikumbusa waleghi wisezughunukeghe wichefwa.”

¹¹ Musa ukabonya wokoni sa iji koni BWANA oremlaghirieghe.

¹² Wandu wa Israeli wikamzera Musa, “Ola isi daakola dafwa, disia diwose putu.

¹³ Ikakaia kula mundu uchagha na kusoghodera Hema iko na Sanduku ya BWANA uafwa, wele huwo ndadadafwa diwose putu?”