MITALO 15 - Biblia Ilagho Jiboie Kwa Wandu Wose

Sharia refunya vizongona

¹ Nao BWANA ukamzera Musa, “Wighorie wandu wa Israeli huwu,

² Iji mwangia ijo isanga nimnekagha mujikaie,

³ nenyo mkakamfunyira BWANA kizongona chekora kufumanya na ng'ombe angu ng'ondi, angu kizongona chekatisha ighemi, angu mafunyo ghafunywa kwa ngolo, angu kufunya kwa ndima riwikilo, mafunyo ghebonya irumba jinuke nicha kwa BWANA,

⁴ uo mundu uredagha ifunyo jake, umfunyire BWANA kizongona cha viro kilo imweri ya mufu ghudendere ghuranganyiro na lita imweri ya mavuda,

⁵ na lita imweri ya divei kwa wundu ghwa kizongona cha kunywa, na mwana wa ng'ondi kwa kizongona chekora.

⁶ Mkakafunya bauru kwa wundu ghwa kizongona cha viro, mfunyanye na kilo iwi ra mufu ghudendere ghuranganyiro na kilo imweri na nusu ya mavuda.

⁷ Kwa wundu ghwa kizongona cha kunywa, mfunye lita iwi ra divei; ni irumba jiboie kwa BWANA.

⁸ Njau ikafunywa kwa BWANA ikaie kizongona kwa wundu ghwa kaung'a chekatisha ighemi, angu kizongona cha mapatano,

⁹ ichafunywa na kizongona cha viro kilo idadu ra mufu ghudendere ghuranganyiro na lita iwi ra mavuda,

¹⁰ na kizongona cha kunywa lita iwi ra divei. Ni kizongona chekora. Irumba ja ichi kizongona chanukie nicha kwa BWANA.

¹¹ “Huwo niko mchaakaia mkibonya mkakafunya kula njau, angu bauru, angu mwana wa ng'ondi, angu ndaghina.

¹² Mchareda ifunyo kunughana na mtalo ghwa nyamandu richaafunywa.

¹³ Wandu wose wa isangenyi wichanugha iyo chia cheni iji wakaboisa vizongona vawo vekora. Ni irumba jinukagha nicha kwa BWANA.

¹⁴ Na ikakaia oko mghenyi wawuyamara-mara chiaimweri nenyo, angu wawuyakanya nenyo vivalwa venyu vose, nao wakunda kufunya kizongona chekora chinukagha nicha kwa BWANA, uchabonya seji koni m'bonyagha.

¹⁵ Sharia ni imweri imbiri ya BWANA kwa wundu ghonyu, na kwa wundu ghwa mghenyi wori; nayo ichakaia ni sharia ya matuku ghose gha vivalwa venyu vose.

¹⁶ Sharia na malaghiro ni ghamweri konyu, na kwa mghenyi wori mwawuyamaranya.”

¹⁷ BWANA ukamzera Musa uwizere wandu wa Israeli huwu,

¹⁸ “Ngelo mwavika ijo isanga nawuyamghenja,

¹⁹ na iji mwakaja vindo va ijo isanga, mchamfunyira BWANA kizongona.

²⁰ Mkakaja vindo venyu va imbiri, mfunye keki ikaie sa kizongona chafuma andu kokuwidiria viro.

²¹ Na mchadua mkimredia BWANA vizongona va mavalo gha imbiri gha viro venyu vivalwa venyu vose.

²² “Ela iji mwachumbwa na kulemwa ni kughikatisha agho malaghiro BWANA umghorie Musa,

²³ agho ghose umlaghirie kufuma ituku jija BWANA orezoeghe kumlaghira, hata na kivalwa chenyu chose chichagha,

²⁴ na ikakaia mookosa izungu jose ja wandu jisemanyire, jichafunya mwanwanjau ukaie kizongona chekora; ni irumba jinukagha nicha kwa BWANA. Chichafunywanya na kizongona cha viro, na cha kunywa, kunughana na malaghiro; sena wichurie fwandi imweri ikaie kizongona kwa wundu ghwa kaung'a.

²⁵ Na mkohani uchabonya wupatanisho kwa wundu ghwa izungu jose ja wandu wa Israeli, nawo wichafuilwa wughoma kwa kukaia wedechumbwa wikabonya ikosa kuseko kukunda, nawo wareda kizongona chawo chekora na kizongona cha viro kwa BWANA kwa wundu ghwa kaung'a.

²⁶ Na izungu jose ja wandu wa Israeli chiaimweri na mghenyi wawuyamaranya, jichafuilwa wughoma angu wandu wose wedengia ikosenyi.

²⁷ “Ngera mndungi wachumbwa na kubonya kaung'a, uchafunya mburi ya waka ya mwaka ghumweri ikaie kizongona kwa wundu ghwa kaung'a.

²⁸ Na mkohani uchabonya wupatanisho imbiri ya BWANA kwa wundu ghwa uja mundu wachumbwa ukabonya kaung'a; nao uchafuilwa wughoma.

²⁹ Sharia ni imweri kwa muisanga wa wandu wa Israeli na mghenyi wimaranyagha, iji wachumbwa wikabonya kaung'a.

³⁰ Ela mundu ukabonya ilagho jingi kidali, ukaiagha ni mwisanga angu mghenyi, uamdukana BWANA; mundu uo, uchainjwa kufuma kwa wandu wake.

³¹ Angu wajimenya ilagho ja BWANA, na kurinona sharia rake. Mundu uo uchainjwa putu kufuma kwa wandu, nao uchaduka ikosa jake moni.”

Mundu oreinonieghe Sabato

³² Ituku jimu, ngelo wandu wa Israeli werekoghe kireti, weremmbonieghe mndumu ukishoa mbande ituku ja Sabato.

³³ Waja wandu weremmbonieghe, wikamghenja kwa Musa na Haruni, na izungu jose ja wandu.

³⁴ Wikakaia wikimlindia angu wiseremanyireghe nicha ngera ubonywa wada.

³⁵ BWANA ukamzera Musa, “Uo mundu uchabwaghwa; izungu jose ja wandu jichamlasa na magho shighadi ya kambi.”

³⁶ Nao izungu jose jikamfunya shighadi ya kambi, jikamlasa na magho hata ukafwa, seji koni BWANA oremlaghirieghe Musa.

Malaghiro aighu ya mafindikio

³⁷ BWANA ukamzera Musa, “Ghora na wandu wa Israeli,

³⁸ kuwizere wibonye mafindikio mbembenyi ra nguwo rawo, vivalwa vawo vose, na kula ifindikio jifungwanyo na lugha lwa buluu.

³⁹ Mchakaia mkizighanagha ijo ifindikio na kukumbukagha malaghiro ghose gha BWANA mpate kughibonya; eri msechebonya seji ngolo renyu righeshagha kunughana na maza muriwonagha na meso ghenyu; iro mkundagha kurinugha kwa bea mbaa.

⁴⁰ Kwa chia ihi, mchakumbuka na kubonya malaghiro ghapo ghose; mpate kukaia muelie kwa Mlungu onyu.

⁴¹ Ini ne BWANA Mlungu onyu, uo oremfunyireghe isanga ja Misri, nipate kukaia Mlungu onyu: Nani ne BWANA Mlungu onyu.”