MITALO 11 - Biblia Ilagho Jiboie Kwa Wandu Wose

Mazughunuko gha wandu wa Israeli

¹ Nao wandu wikazoya kumzughunukia BWANA kwa wundu ghwa wasi ghwawo. Hata iji BWANA oresikireghe, ukajokwa ni machu, na kubonya modo ghuake aghadi kwawo; nagho ghukalungura andu kumu kambinyi.

² Niko wandu wikamlilia Musa. Musa ukamlomba BWANA na modo ghukarima.

³ Kwa wundu ugho, andu aja kukawangwa Tabera angu modo ghwa BWANA ghoreakieghe aghadi kwawo.

Musa kusaghua vilongozi mirongo mfungade

⁴ Korekoghe na wandu wamu aghadi kwawo wiseko Waisraeli, wiko na bea nyingi, hata na wandu wa Israeli wori wikalila sena wikighamba “Na ngera dedeeka na nyama reja-lee!

⁵ Dakumbuka seji didueja samaki ra duu Misri, na kiukamba, na matangina, na likisi, na vitunguo na vitunguo-saumu;

⁶ ela idana, ndighi redu rasia putu, na kindo chingi cheja ndechiko ela ihi mana cheni dawuyaiwona.”

⁷ Iyo mana erekoghe sa mbeu ndini-ndini riwadane ya rangi ya kivunde irangane na ya chokwa.

⁸ Awo wandu wikamara-mara wikishoa; nawo wikaisha kwa magho, angu kuichana na kidu. Wikaidoghosa nyungunyi na kubonya keki; nayo erekoghe isingie sa keki ibonyero na mavuda.

⁹ Na iyo mana erekoghe ikiwoneka ngelo mami ghabonyeka kambinyi nakio.

¹⁰ Musa ukasikira wandu wikilila, kula mundu a mnyangonyi ghwa hema yake, ukazamilwa, angu BWANA orejokeloghe ni machu mabaa.

¹¹ Musa ukamzera BWANA, “Kwaki kwanibonya kiwiwi huwu ini mdumiki wako? Na kwaki kwazamilwa ni ini huwu kukanidukishira msigo ghwa awa wandu wose?

¹² Kwani ni ini niwirudishire awandu wose? Ni ini nerewivaeghe hata kunizere wei niwidukeghe laghenyi kwapo seji mleli udukagha mwana uongagha, na kuwighenja ijo isanga korelaghirieghe kuchawineka weke ndee?

¹³ Niendapatira hao nyama rewineka awandu wose nawo hawa waawuyanililia wikighamba, ‘Dineke nyama dije?’

¹⁴ Msigo ghwa awa wandu wose ghwaaka m'baa, sidimagha kughuduka niekeri.

¹⁵ Ikakaia niko kunibonyagha huwu, baa koonibwagha shwa wori kamanya kuboilwagha ni ini, eri nisesinde wona wasi ghwapo.”

¹⁶ Niko BWANA ukamzera Musa, “Nikwanyire waghosi mirongo mfungade wa Israeli, awo kuwiichi kukaia ni waghosi na wabaa wawo, nao kuwirede Hemenyi ekwania, nawo wikaie kimusi aho chiaimweri na oho.

¹⁷ Nani nichasea aho nidedanye na oho, na kuwusa ifungu jimu ja roho yako, nijingire kwawo, nawo wichakutesia kuduka msigo ghwa awa wandu, eri kuseghudukeghe kuekeri.

¹⁸ Nao kuwizere huwu, ‘Mkueleshe mmbeni kwa wundu ghwa kesho, kwa kukaia mchaja nyama. BWANA wasikire mkilila na kughamba wei mnekwa nani nyama muje, na kedi morekoghe nicha na ndighi iji morekoghe Misri. Kwa huwo BWANA uchamneka nyama muje.

¹⁹ Ndemchaarija kwa ituku jimweri, angu awi, angu masanu, angu ikumi, angu mirongo iwi;

²⁰ ela mchaja kwa mori mlazi ridime rafuma na mbua, hata mrikoje; angu mwamleghie BWANA uo uko aghadi konyu mkilila wei kumangu ndemorefumagha Misri.’”

²¹ Ela Musa ukamzera BWANA, “Nawuyalongoza wandu elfu maghana arandadu, na oho kwaghamba, ‘Nichawineka nyama wije mori mlazi!’

²² Wele wikabwaghilwa ng'ondi na ng'ombe riwikata? Angu wikawadilwa samaki rose ra baharinyi riwikata?”

²³ BWANA ukamzera Musa, “Welee, ndighi ra BWANA reeka ndini? Idana kuchawona ngera malagho ghapo ndeghiwuyaa loli.”

²⁴ Nao Musa ukafuma ukawighoria wandu malagho gha BWANA; ukakwanya waghosi mirongo mfungade wiko vilongozi va wandu; na kuwiwika kimusi kuimara Hema.

²⁵ Niko BWANA ukasea andenyi ya iwingu ukaghora na Musa, nao ukawada ifungu ja roho erekoghe na Musa, ukajiwika aighu ya awo waghosi mirongo mfungade; hata iji iyo roho yawiseria, wikafunya wulodi. Ela ndewichebonya huwo sena anduangi.

²⁶ Ela korekoghe wandu wawi weresigharikieghe kambinyi umu orewangwagha Eldadi na umu Medadi; na iyo roho ikawiseria waandikishwa, ela ndewereghendieghe hemenyi; kwa huwo wikafunyira wulodi ahoeni kambinyi.

²⁷ Mdawana umu ukakimbia kwendamghoria Musa ukaghamba, “Elidadi na Medadi waawuyafunya wulodi kambinyi.”

²⁸ Joshua mwana wa Nuni, mdumiki wa Musa, nao ni umu wa awo weresaghuloghe ukaghamba, “Bwana wapo Musa, wikanie.”

²⁹ Ela Musa ukamzera, “Kwawadwa ni iriso wulalo ghwa ini? Nawonagha nicha ngera Roho wa BWANA wadawiseria wandu wake wose wikaie walodi.”

³⁰ Musa na awo waghosi wikawuya kambinyi.

BWANA kureda ngwale

³¹ Nao ikacha mbeo kufuma kwa BWANA, ikareda ngwale kufuma baharinyi; naro rikasea mbai mbai ya kambi yose rikiburuka wuighu ghusekate meta imweri; rikaera wukula ghwa mwendo ghwa ituku ilazi, ii chia na ii chia.

³² Wandu wikawada ngwale ijo ituku dii, na kio chee, hata ituku ja kawi dii; mundu orewadireghe ndini putu ni kilo elfu imweri. Wikarianika kambinyi kose.

³³ Hata iji werekoghe wikija nyama, imbiri risesirie, BWANA ukajokwa ni machu aighu ya wandu, ukawikaba na ndighi kwa saka ya ngawawi.

³⁴ Kwa wundu ugho andu aja kukawangwa Kibrothi-hataava kwa kukaia aja wererikieghe wandu wiko na bea.

³⁵ Wandu wikadamba kufuma Kibrothi-hataava wikaghenda Hazerothi wikakaia aho.