MITALO 10 - Biblia Ilagho Jiboie Kwa Wandu Wose

Tarumbeta iwi ra feza

¹ Nao BWANA ukamzera Musa,

² “Bonya tarumbeta iwi ra feza ichanilo, kuritumieghe kwa kuwanga wandu chiaimweri na kuvuchua kambi.

³ Iji tarumbeta rakabwa rose, izungu jose ja wandu jichakukwanyikia mnyangonyi ghwa Hema ekwania.

⁴ Iji tarumbeta yakabwa imweri, vilongozi na wabaa wa mbari ya Israeli wichakukwanyikia.

⁵ Tarumbeta ikakabwa kwa lwaka loturusa, wandu wa kambi riko ii chia cha mashariki, wichazoya charo.

⁶ Iji tarumbeta yakabwa kwa lwaka loturusa indo ja kawi, wandu wa kambi riko iichia cha kusinyi, wichazoya charo. Tarumbeta ichakabwa kwa lwaka loturusa ngelo ezoya charo.

⁷ Ela iji ikwanyiko jakundika kukwana chiaimweri, kukabe tarumbeta, ela kusekabe kwa lwaka loturusa.

⁸ Wana wa Haruni, awo wakohani, niwo wichaakaia wikirikaba tarumbeta. Uko kukaba tarumbeta kuchakaia ni sharia yenyu ya matuku ghose vivalwa venyu vose.

⁹ Iji mwaghenda wudenyi kukwana na m'maiza onyu wawuyamkoronga isangenyi konyu, mkabe tarumbeta ya lwaka loturusa, eri mpate kukumbukwa imbiri yapo ini BWANA Mlungu onyu, nani nichamkira na wamaiza wenyu.

¹⁰ Wokoni matuku gha kuboilwa konyu, na gha ndima renyu riwikilo, na gha kuzoya kwa meri, mkakafunya vizongona venyu vekora, na vizongona venyu va mapatano, mkabe tarumbeta; ripate kum'bonya mkumbuko imbiri yapo ini Mlungu. Ini ne BWANA Mlungu onyu.”

Kuzoya Charo

¹¹ Ituku ja mirongo iwi, ja mori ghwa kawi, mwaka ghwa kawi nyuma ya kufuma Misri, ijo iwingu jikawusirwa kufuma hemenyi ya Andu kwa BWANA Kokaia;

¹² na wandu wa Israeli wikazoya charo kwa kunughana kufuma kireti cha Sinai. Ijo iwingu jikaghenda na kukaria kireti cha Parani.

¹³ Kwa indo ja imbiri, wandu wikazoya charo kwa iyo chia wikilaghirwa ni Mlungu kuidia kwa Musa,

¹⁴ Awo werekoghe wa bendera ya kambi ya Juda, werezoeghe kufuma kwa mafungu ghawo; na kilongozi cha ijeshi jawo, cherekoghe Nashoni mwana wa Aminadabu.

¹⁵ Nethaneli mwana wa Suari orekoghe kilongozi cha ijeshi ja kichuku cha Isakari.

¹⁶ Eliabu mwana wa Heloni orekoghe kilongozi cha ijeshi ja kichuku cha Zebluni.

¹⁷ Hata iji iyo Hema yakulwa, wana wa Gershoni na wana wa Merari awo wereidukagha iyo Hema wikazoya charo.

¹⁸ Niko wandu wa bendera ya kambi ya Reubeni wikazoya charo kwa mafungu ghawo, na kilongozi cha ijeshi jawo, cherekoghe Elisuri mwana wa Shedeuri.

¹⁹ Kilongozi cha ijeshi ja kichuku cha wandu wa Simeoni cherekoghe Shelumieli mwana wa Surishadai.

²⁰ Na kilongozi cha ijeshi ja kichuku cha wandu wa Gadi cherekoghe Eliasafu mwana wa Deueli.

²¹ Niko Wakohathi wikazoya charo, wikidwa vija vilambo vieleshero; na imbiri wisevikie andu wereghendagha, iyo Hema erekoghe yameria kudungwa.

²² Niko awo wandu werekoghe wa bendera ya Efraimu wikazoya charo kwa mafungu ghawo, na kilongozi cha ijeshi jawo cherekoghe Elishama mwana wa Amihudi.

²³ Na kilongozi cha ijeshi ja kichuku cha wandu wa Manase cherekoghe Gamalieli mwana wa Pedasuri.

²⁴ Na kilongozi cha ijeshi ja kichuku cha wandu wa Benjamini cherekoghe Abidani mwana wa Gideoni.

²⁵ Niko awo werekoghe aisi ya bendera ya wandu wa Dani, wikazoya charo kwa mafungu ghawo; wikakaia nanyuma wikilindia kambi rose; na kilongozi cha ijeshi jawo cherekoghe Ahiezeri mwana wa Amishadai.

²⁶ Kilongozi cha ijeshi ja kichuku cha wandu wa Asheri, cherekoghe Pagieli mwana wa Okrani.

²⁷ Na kilongozi cha ijeshi ja kichuku cha wandu wa Naftali cherekoghe Ahira mwana wa Enani.

²⁸ Huwu niko wandu wa Israeli werekoghe wikighenda na majeshi ghawo iji werekoghe wikidamba.

²⁹ Nao Musa ukamzera Hobabu mwana wa Reueli Mmidiani uo mghosi wa Musa, “Diaghenda andu BWANA ughambie uchadineka, nndoko dighendanye, nesi dichakubonyera nicha; BWANA wawilaghirie Waisraeli mecha.”

³⁰ Ela Hobabu ukamzera, “Ini sighendagha; niaghala kedu kwa wamzedu.”

³¹ Musa ukaghamba, “Nakulomba kusedisighe; oho kwaichi seji dichaadunga kambi kireti, na oho kuchadumika sa meso ghedu.

³² Kukaghendanya nesi, dichakubonyera mecha ghose BWANA uchaadibonyera.”

Wandu kuzoya charo

³³ Nao kufuma Sinai, wandu wikadamba charo cha matuku adadu; na Sanduku ya Ilaghano erekoghe yakiria kiimbiri matuku adadu kulolia wandu andu kohoresha.

³⁴ Ijo iwingu ja BWANA jerekoghe naighu yawo nadime ngelo yose werezoyagha charo kufuma kambinyi.

³⁵ Ngelo iyo yose Sanduku ya Ilaghano erezoyagha kudukwa, Musa orekoghe ukighamba, “Wuka ee BWANA, kuwisaghise wamaiza wako; na awo wizamilwagha ni oho, ndewikimbie imbiri yako.”

³⁶ Na iji yadulwa, orekoghe ukighamba, “Wuya ee BWANA kwa elfu ikumi ra maelfu gha Israeli.”