MIKA 7 - Biblia Ilagho Jiboie Kwa Wandu Wose

Kunoneka kwa tabia ra Waisraeli

¹ Ni duu tu; ini neeka sa mundu uko njala; usewonagha itunda jingi jasigharika mudinyi, angu zabibu ingi yasigharika mzabibunyi. Zabibu rose na tini risingie rawalwa putu.

² Ndekuwadie mndungi mloli wasigharika isangenyi; ndeuko ungi wasigharika uko mloli kwa Mlungu. Kula mundu ualola wulalo ghobwagha; Kula umu uamdiwa muisanga mmbao.

³ Kula mundu uafunga ndighi kubonya wuwiwi. Wabaa na Watanyi wialola kuhongwa. Mundu wa wuya ghodeda wadawighoria agho ukunde ubonyero, nawo wasea kidombo chiaimweri kupanga malagho ghizamie.

⁴ Mundu uboie uko mloli kuchumba wose, kwawo wadamenywa na kuwoneka sa isaka. Ituku jekabwa ni Mlungu jameria kuvika; kwa kukaia wawionyere kwa kutumia walindiri wake, awo walodi. Idana walaghalwa ni akili.

⁵ Kuserumirie mmbenyu angu mghenyi wako. Kukulindie hata na agho kughoragha kwa mkako.

⁶ Ngelo iri, wana wawuyawibonya weke ndee sa wakelu; wai wiatangala weke mae, waka wa wana wiarashana na wakeku wawo. Wamaiza wa mundu ni aweni wa nyumbenyi kwake.

⁷ Ela ini nichamchereshera BWANA, na kummbeseria Mlungu kwa isuwirio, uo uchaanikira. Mlungu wapo uchanisikira.

BWANA kureda kukia

⁸ Kusakeboilwa aighu yapo ee m'maiza wapo; iji naghwa nichawuka; iji nakaia kirenyi, BWANA uchakaia mwengere ghwapo.

⁹ Kwa kukaia nim'bonyere BWANA kaung'a nichaghirumaghia machu gha kubia kwake, hata unidederie na kunitanya. Uchanireda mwengerenyi, nani nichakuwona kukia kwake.

¹⁰ Niko m'maiza wapo uchawona na kufwa waya; uo oreghambagha, “BWANA Mlungu wake oko hao?” Nichammbona ukiwadilwa andonyi sa mazozo gha chienyi.

¹¹ Wandu wa Jerusalemu, ituku jeagha mawurigha gha Jerusalemu jaawuyacha. Ituku ijo, isanga jako jichachurilwa.

¹² Wandu wako wichakuwuria kufuma kula andu. Kufuma Ashuru noko cha mashariki, na kufuma Misri noko cha kusinyi, na kufuma isanga ja Moda ghwa Eufrate, kufuma bahari ra kula na mighondi iko kula.

¹³ Ela ndoenyi kuchawuya ikara kwa wundu ghwa wuwiwi ghwa wandu wawuyaikaia.

Wughoma ghwa BWANA kwa Israeli

¹⁴ Lisha wandu wako kuwisaghue kumoni BWANA. Hata ngera wakaie wisasarikie noko cha kireti, jeko isanga jinorie jiwimare mbai mbai. Wisighe wije malisho ghinorie gha Bashani na Gileadi seji werebonyagha kala.

¹⁵ Diwonyere maza ra mashiniko seji korebonyereghe ingelo koredifunyagha isanga ja Misri.

¹⁶ Mbari ra wandu hata ngera werekoghe na ndighi rawo rose wichaobua. Wichawadia memu yawo na kufindika madu ghawo kwa wowa.

¹⁷ Wichaghala-ghala andonyi sa choka; wichafuma ngomenyi kwawo wikisughusika kwa wowa. Wichamghalukia BWANA Mlungu odu kwa kuobua.

¹⁸ Ndekuwadie mlungu ungi uko sa oho BWANA; oho kwadafuya wandu wako wughoma kwa kaung'a rawo, awo wisigharikie. Ndekuwikagha machu kwa kala na kala, ela kwadaboilwa ni kudiwonyera lukundo lwako lukatie.

¹⁹ Kuchadiwonia wughoma sena. Kucharifasha-fasha kaung'a redu aisi ya maghu, na kurikumba baharinyi imilie.

²⁰ Kuchawonyera wuloli na lukundo lwako lukatie kwa wandu wako, icho kivalwa cha Abrahamu na Jakobo sa iji korelaghirieghe kwa weke aba kufuma kala.