MIKA 6 - Biblia Ilagho Jiboie Kwa Wandu Wose

Mwandu ghwa Bwana na Israeli

¹ Sikirenyi seji BWANA ughoragha aighu ya Israeli. Wuka ee BWANA kurede mashitakio ghako. Mighondi mibaa na mitini ndeisikire agho kughoragha.

² Inyo mighondi muko misingi iduagha ya ndoenyi, sikirenyi seji BWANA uredagha mashitakio. BWANA washitakiana na wandu wake; uchasimana na Israeli.

³ BWANA waghamba, “Ee wandu wapo nam'bonyere wada? Namsirishe ndighi naki? Nitumbulienyi!

⁴ Ini namredie kufuma isanga ja Misri; namkombue kufuma wuzumbenyi. Namdumie Musa, Haruni, na Miriamu umlongoze.

⁵ Ririkanyenyi ee wandu wapo, seji Balaki mzuri wa Moabu orem'bonyereghe mpango, na seji Baalamu mwana wa Beori oremtumbulieghe. Ririkanyenyi seji maza rerebonyekieghe kufuma Shitimu hata Gilgali; mpate kumanya kukaia nedebonya huwo nipate kumkira.”

Ijo BWANA ujikundagha

⁶ Ngakacha kumtasa BWANA Mlungu uko mlungunyi, nimdwaia kii? Niamdwaia ngache riboie kwa vizongona vekoraa anguwada?

⁷ Ngafunya maelfu gha bauru na mavuda mengi BWANA uboilwa? Niamfunyira mwana wapo wa imbiri kulipia kaung'a rapo anguwada?

⁸ Hata! BWANA wadimanyishire ijo jiko icha. Ijo BWANA ujikundagha kodu ni iji: Kubonya ijo jiko ja hachi, kukaia na lukundo lukatie, kukusera na kukaia na wungara na Mlungu odu.

⁹ Kuobua kwa BWANA niyo hikima. BWANA waawuyawanga mzinyi, “Sikirenyi inyo wandu mkwanyikagha mzinyi!

¹⁰ Reko mali ra magendo nyumbenyi kwa wandu wawiwi wiripatire kwa chia iseko na hachi. Waawuyatumia vipimo va tee nisevikundagha.

¹¹ Niwifuya wughoma wada wandu wawuyatumia vipimo va tee?

¹² Wazuri wako wa mali waawuyasoka wakiwa na inyo mmbose mooka watee.

¹³ Kwa huwo nazoya kubonya mipango ekunona na kukutotesha kwa wundu ghwa kaung'a rako.

¹⁴ Kuchaja, ela ndekuchaaghuda; kuchasigharika na njala yako wokoni. Kuchaduka vilambo, ela ndevichaawikika; na icho chose kuchachiwika akiba, nichachinona na wuda.

¹⁵ Kuchawa, ela ndekuchaakuwida; kuchakama mavuda gha zeituni, ela ndekuchaakushinga mavuda; kuchakama zabibu, ela ndekuchaanywa divei.

¹⁶ Kuchapatwa ni agha malagho angu kwaawuyanugha mafundisho gha Mzuri Omri, na gha mwana wake Mzuri Ahabu. Kwanughie njama rawo, nani nichakunona putu, na kula mundu uchakumenya. Kuchamenywa ni wandu kula andu.”