MIKA 2 - Biblia Ilagho Jiboie Kwa Wandu Wose

Malipo gha wandu wikorongagha wakiwa

¹ Ni bugha kwa wandu wilalagha wilave kwa kubonya mipango izamie. Ndoe ikaela, wichaikatisha mipango iyo iji wapata wulalo.

² Wikakunda mbuwa, wiariwada; wikakunda nyumba wiariwusa; ndekuwadie familia angu vilambo va mndungi viko na wulindiri ghukate.

³ Kwa huwo BWANA waghamba, “Ola naawuyabonya mipango ereda wuwiwi aighu yenyu, msechaadima kughufufunuka. Mchakuwona mmbeni mkikaia wasinyi; nenyo ndemchaaghenda kwa lukaso sena anduangi.

⁴ Ngelo iyo ikavika, wandu wichatumia lughano lukaie mfwano ghwa wasi, nawo wichabora lumbo ulu lofwa ngolo kwa agho mughiwonie wikighamba, ‘Dameria kunonwa putu, BWANA wamerie kuwusa isanga jedu, na kujineka wandu wididwae wunyika.’”

⁵ Kwa huwo ngelo ikavika wandu wa BWANA wiwunjiro isanga jawo, ndekuchaakaia na iwaghio ja ungi onyu.

⁶ Wandu waawuyanizera, “Kusedichilie. Kusechileghe maza iri. Mlungu ndechaadibonya kiwiwi anduangi.

⁷ Wele muaghesha wandu wa Israeli weewasirwa njowe? Mlungu oosigha kurumaghia kwake? Wadima kubonya maza rifwane huwo? Nechi wei Mlungu wadawidedia wandu wecha kwa wughoma?”

⁸ BWANA watumbulia, “Inyo mwadawikaba wandu wapo seji ni wamaiza. Wandu wawuya kufuma wudenyi wikighesha wichakaia na sere mzinyi, ela wichasoka wandu makoti ghawo.

⁹ Mwadawiwinga waka wa wandu wapo wifume nyumba wirikunde; mwawisokie wana wawo watini marasimio ghapo kwa kala na kala.

¹⁰ Wukenyi mghende; ndemmbwadie wubanana ghungi aha sena. Kaung'a renyu rabonyere andu aha kunoneke.

¹¹ “Wandu awa weekunda mlodi umaraa-mara na tee na mikalo ukiwizera, ‘Inyo mchulwa ni divei na chofi.’

¹² “Ela nichamkwanya chiaimweri inyo wandu wa Israeli wisigharikie. Nichamtumbanya chiaimweri sa ng'ondi riwuyagha iranunyi. Isanga jenyu jichachulwa ni wandu sena, sa wungi ghwa ng'ondi riko mlambenyi.”

¹³ Mlungu uchawirughuya chia ewuya; uchawilongoza wifume wubarishonyi. Wicharirughua mbenge ra muzi na kungia kwa sere; mzuri wawo, uo BWANA moni uchawilongoza shighadi.