MIKA 1 - Biblia Ilagho Jiboie Kwa Wandu Wose

¹ Ngelo Jothamu, na Ahazi, na Hezekia werekoghe wazuri wa Juda, BWANA oreghorieghe na Mika, mundu wa muzi ghwa Moreshethi. BWANA ukamfunukuya malagho agha aighu ya Samaria na Jerusalemu.

Kililo aighu ya Samaria na Jerusalemu

² Sikirenyi agha inyo mbari rose ra wandu mkaiagha ndoenyi, sikirenyi; BWANA Mlungu uchashuhudia aighu yenyu. Sikirenyi! Waawuyadeda kufuma Hekalunyi yake ya mlungunyi.

³ BWANA waawuyacha kufuma andu kwake kwa wueli; uchacha na kusela aighu ya mido ya mighondi.

⁴ Mighondi ichasagha aisi ya maghu ghake sa sungu yakabishirwa modo; ichasea cha vololonyi, seji machi ghiseagha andu kwa lughongo lwa kimusi.

⁵ Agha ghose ghaawuyacha angu wandu wa Israeli wibonyere kaung'a, na kumlegha Mlungu. Nani uko mkosa ima Israeli kaleghagha Mlungu? Welee, si Samaria cheni? Nani uko mkosi otasa milimu andenyi ya Juda? Welee, si Jerusalemu cheni?

⁶ Kwa huwo BWANA waghamba, “Nichaibonya Samaria iwuye kitungasi cha mbuwenyi, iwuye andu kowa mizabibu; nicharimicha kokoto ra muzi ghwavuchulwa nokoisi cha vololonyi, na misingi ya muzi ichasighwa miduu.

⁷ Milimu yake ya zoghori ichabarwa-barwa; kula kilambo cherenekeloghe malaya gha hekalunyi chichakorwa, na fwana raro rose richawuya kitungu cha tungasi. Samaria yakuzaisire agho malagho, kwa wundu ghwa iyo mizango yake mingi. Idana wamaiza wake wichaiduka, wiendebonya wumalaya ghwa hekalunyi andu kuzima.”

⁸ Niko Mika ukaghamba, “Kwa wundu ghwa ilagho iji nichalila na kukema mchungu; nichaghenda na maghu maduu niko mtughuta; nichakema sa kikwau, na kulila sa nyagha, kuwonyera wasi ghwapo.

⁹ Kushoghonoka kwa Samaria ndekudimagha kuboa; Juda walighisa kupatwa ni wasi ugho ghoni; wuwiwi ghwacha hata mbengenyi ra Jerusalemu, andu wandu wapo wikaiagha.”

M'maiza kusoghodera Jerusalemu

¹⁰ Mseghorie wamaiza wedu wiko Gathi wei deesimwa; msesighe wiwone seji mwawuyalila. Wandu wa Beth-Leafra, wonyerenyi kufwa ngolo konyu kwa kukung'arisha andonyi.

¹¹ Inyo wandu wa Shafiri, ghendenyi cha wubarishonyi mtughuta mfue waya. Wandu wa Zaanani, msetime kufuma shighadi ya muzi ghwawo. Mkasikira ngemi ra wandu wa Beth-ezeli, moomanya kukaia wulindiri ghungi ndeghuko aho.

¹² Wandu wa Marothi waawuyawesera kupata mecha kwa bea mbaa; kwa kukaia BWANA wawiredia mawiwi kaavui na Jerusalemu.

¹³ Inyo wandu mkaiagha Lakishi, funganyenyi farasi na magare. Mwasungie kaung'a ra Israeli, mkashekeria wandu wa Jerusalemu wibonye kaung'a.

¹⁴ Kwa huwo idana inyo wandu wa Juda, sighenyi muzi ghwa Moresheth-gathi; wazuri wa Israeli ndewichaapata wutesia ghungi kufuma kwa muzi ghwa Akzibu.

¹⁵ Inyo wandu wa Maresha, BWANA uchamfunya msimo ni m'maiza, nao uchawada muzi ghonyu. Vilongozi va Israeli wichaghenda na kukuvisa mbangenyi ya Adulamu.

¹⁶ Inyo wandu wa Juda, arenyi vongo venyu muwililie wana wenyu muwikunde; arenyi vongo venyu mkangaluke sa indu, kwa kukaia wana wenyu wichadwalwa wunyika kufuma konyu.