MCHILI 8 - Biblia Ilagho Jiboie Kwa Wandu Wose

¹ Mundu wa hikima nuo umanyagha malagho seji ghiko. Hikima yadam'bonya ukaie na kuboilwa, na kubonya wushu ghwake ghukaie ghuelie.

Kumsikira Mzuri

² Kumsikire mzuri, hata kusebonye malaghiro kwa Mlungu kwa shwa-shwa.

³ Kukakanya na mzuri, kusekaie wa shwa-shwa kufuma kwake. Malagho ghikazama, kusekaie; wadima kubonya ilagho ijo jose ukunde.

⁴ Mzuri wadabonya malagho kwa nguma; ndekuwadie mndungi udimagha kumkotia.

⁵ Kukamsikira kuchakaia banana; mundu uko na hikima uchamanya seji ubonyagha kwa ngelo yaro.

⁶ Kula ilagho jeko na ngelo na chia ejibonya, hata ngera wasi ghwa mdamu ghwawuyamlemeria nandighi.

⁷ Mdamu ndeichi agho ghichagha, na mndungi ndeko omghoria.

⁸ Mndungi ndedimagha kukughiria usefo, angu kuinja ituku ja kifwa chake; ni wuda disedimagha kughuinjikia; ndediwadie wuya ghungi ghochikimbia.

Wawiwi na Wecha

⁹ Nawonie maza iri rose iji nereririkanyireghe maza ribonyekagha andu wandu wamu wiko na kudima, na wambao wakorongeka aisi yawo.

¹⁰ Niko ngawona wandu wawiwi warikwa. Ela iji wandu warefumagha makaburinyi werewikasireghe andenyi ya muzi ughoni werebonyagha wuwiwi. Ughu nagho ni wuduu.

¹¹ Wandu waawuyabonya makosa kwa kukaia wisewuyetanywa shwa-shwa kwa wundu ghwa agho makosa wighibonyere.

¹² Mkaung'a wadima kubonya makosa mando ighana sena ukaie moyo. Naichi wadaghora wei mundu ukamsikira Mlungu, maza rimuendia nicha,

¹³ ela nderikaiagha nicha kwa mmbiwi. Irangi jawo ni sa kiju; wichafwa wakoo, angu wisewuemsikira Mlungu.

¹⁴ Ghoko wuwiwi ghwawuyabonyeka ndoenyi: mundu wa hachi kukabwa makabo gha mundu mmbiwi, na mundu mmbiwi kulipwa malipo gha mundu wa hachi. Naghamba, iri naro ni maza ra duu.

¹⁵ Kwa huwo naawuyarumiriana na maboilo gha irangi, kwa kukaia ndekuwadie ilagho jingi jiboie kuchumba kwa mdamu uko wurumwengunyi, jichumbagha kuja, na kunywa na kuboilwa. Niko uchaadua ukiboilwa kazinyi kwake matuku ghose gha irangi jake Mlungu uchaamneka wurumwengunyi.

¹⁶ Niendakunda kutumia akili rapo niimanye hikima na maza rawuyabonyeka ndoenyi, ngawona kukaia mundu wadima kukaia ulave kio na dime,

¹⁷ usedimagha kuelelwa ni agho Mlungu ughibonyagha. Kukeduatima wada, ndekumanyagha. Wandu wiko na hikima wadima kughamba waichi, ela ndewiichi.