MCHILI 7 - Biblia Ilagho Jiboie Kwa Wandu Wose

Maghesho aighu ya kukaia moyo

¹ Sare iboie yachumba mavuda gha zoghori mbaa, na ituku jefwa jaboie kuchumba jevalwa.

² Ni baa kughenda muzi ghwa wandu wafuilwa, kuchumba kughenda muzi ghuko na karamu; kwa kukaia kifwa ni kutua kwa wandu wose, na awo wiko moyo yawifwana wikumbukeghe huwo.

³ Wasi ni baa kuchumba kuseka; ghwadima kukubonya kukuche wushu, ela ghuakutesia kutambukilwa nicha.

⁴ Mundu wa hikima wadaririkanya kifwa ngelo rose; uo uririkanyagha maboilo ngelo rose ni mkelu.

⁵ Ni baa kukemelwa ni mundu wa hikima, kuchumba kukaswa ni wakelu.

⁶ Mkelu ukakaseka ni sa minjwa ibobokagha a modonyi. Ndeina maana ingi.

⁷ Mundu wa hikima ukamkalia mndumu, waawuyabonya sa mkelu; kukawusa matuwo kuchakunona kumoni.

⁸ Kutua kwa maza kwaboie kuchumba kuzoya kwaro; irumaghio jaboie kuchumba kukujosa.

⁹ Kukajokwa ni machu kukumazire; wakelu niwo wikaiagha na machu.

¹⁰ Jingi kusekotie, “Kwaki malagho gha imbiri gherekoghe nicha huwu?” Ijo ikoto ndejiwadie suku.

¹¹ Mundu uo ose uko moyo yamfwana ukaie na hikima; yaboie sa kupata ifwa.

¹² Hikima yadadimisha wandu sa pesa; yadammbika banana mundu uko nayo.

¹³ Ririkanya seji Mlungu ubonyere; nani udimagha kughorua icho Mlungu uchikomeshere?

¹⁴ Malagho ghikakuendia nicha, kuboilo; kukapatwa ni wasi, kuririkanye. Malagho ghose ghadabonywa ni Mlungu, eri mdamu usemanye agho ghimcheagha.

¹⁵ Nawonie kula ilagho kukaia ja duu andenyi ya irangi japo. Mndumu uko na hachi uafwa, ingelo mundu mmbiwi wawuyadua moyo.

¹⁶ Kwa huwo kusekaie mucha kuchumbishe, hata kusekaie na hikima ichumbagha. Kwaki kukubwaghagha kumoni?

¹⁷ Kusekaie mmbiwi uchumbagha hata kusekaie mkelu. Kwaki kufwagha ngelo yako isevikie?

¹⁸ Kuinjikie malagho ghichumbagha ghose. Kukakaia na kuobua kwa Mlungu, kuchakaia nicha kwa maza rose.

¹⁹ Hikima yadam'bonya mundu uko nayo kukaia na ndighi kuchumba wabonyi nguma ikumi wiko andenyi ya muzi.

²⁰ Ndekuwadie mhachi ungi ndoenyi ubonyagha hachi iekeri jingi usebonyagha kaung'a.

²¹ Kusesikirieghe malagho ghose ghijighwagha, kuchesikira mdumiki wako ukikudukana;

²² okumoni kwaichi kwadukanagha wandu wazima kalazi koni.

²³ Natimie maza rose remanya hikima, ngaalemwa.

²⁴ Hikima eeka ndenyi na ndighi; nani udimagha kuimanya?

²⁵ Nerekufunyireghe nikufundishe eri nimanye; ngakunda nipate hikima na matumbulio gha makoto ghapo; nikufundishe nimanye wuwiwi ghwa wukelu.

²⁶ Nawonie ilagho jimu jibirie kuchumba kifwa, najo ni muka. Lukundo ukubonyeragha luchakuwada sa mdegho angu nyavu. Ukakuwadia, mikonu yake eeka sa mnyororo angu nyavu. Mundu umkunde Mlungu uchamuinjikia, ela mkaung'a uchawadwa.

²⁷ Mchili ukaghamba, narizighanire maza iri mboa-mboa ngilola kutambua kwaro.

²⁸ Nalolie kutambua kwaro kwa kula chia, ela serewonieghe kindo chingi anduangi. Ngaachawona mndwawomi umweri kwa elfu uko mucha, ela seremmbonieghe muka hata umweri.

²⁹ Ilagho tu nijiwonie ni iji: Mlungu wam'bonyere mdamu nicha putu, ela oochakulolia malagho mengi.