MCHILI 4 - Biblia Ilagho Jiboie Kwa Wandu Wose

¹ Niko ngazighana sena, ngawona kusowa hachi kose kwawuyabonyeka wurumwengunyi. Wandu wikorongwaghwa na kulila, wisewadie mndungi owitesia. Wakorongi wawo weeka na ndighi aighu yawo; wisewadie mndungi owitesia.

² Ngaririkanya kukaia wandu wimerie kufwa weko baa kuchumba wandu wiko moyo.

³ Elaima uo usevalo, jingi ukawona wuwiwi ghuko wurumwengunyi oko baa kuchumba wose.

⁴ Wokoni nawonie kukaia kufunga ndighi kose, na wuya ghose ghwa kazi, ghwadashekerelwa ni mundu kukaia na iriso na mmbao. Iri naro ni maza ra duu; ni sa kulwa na mbeo.

⁵ Wadaghamba kukaia mkelu wadakucha mikonu yake na kukubwagha na njala.

⁶ Ela kitini chiko na sere chaboie kuchumba vingi vebonyerwa kazi na mikonu iwi, kwa kufunga ndighi seji kuawada mbeo.

⁷ Wokoni nawonie maza rimu ra duu wurumwengunyi:

⁸ Mundu hoyu ooka uekeri; ndewadie mwana hata mruna; ela sena waawuyabonya kazi ngelo rose usekatwagha ni mali uko naro. Ubonyera ani kazi na ndighi huwu ukikuima raha ingi? Agha nagho ni malagho gha duu; ni irangi ja wasi.

⁹ Baa wawi kuchumba umweri, kwa kukaia kazi yawo ikaia mbaa.

¹⁰ Iji mndumu waghwa, wadima kuwusirwa ni mmbao; ela ni kiwiwi mundu kukaia uekeri; ukaghwa ndewadie mndungi ommbusira.

¹¹ Sena wandu wikalala wawi chiaimweri, wikumbana mruke; ela mundu umweri upata wada mruke?

¹² Hata ngera mundu wadima kumsima mmbao uko uekeri, wikakaia wawi wichamtangala. Kamba ya chuwiriro idadu, ndeidumbukagha kwa shwa-shwa.

¹³ Baa mkiwa wa irika uko na hikima, kuchumba mzuri mghosi ukelie usedimagha kuwada njama,

¹⁴ hata ngera uo mzuri odefuma kifungonyi ima ukaendawada wuzuri, angu ngera odevalwa mkiwa aeni wuzurinyi mzawo.

¹⁵ Naririkanyire aighu ya wandu wose wawuyakaia andenyi ya ughu wurumwengu, ngawona kukaia oko mndumu wa irika andu kumu uchaawuya mzuri.

¹⁶ Mzuri wadima kuwibonyera nguma wandu wengi wisene mtalo. Ela nyuma ya kufwa kwake, mndungi ndechaatala agho ubonyere. Ni malagho gha duu; ni sa kuwingisa mbeo.