MCHILI 2 - Biblia Ilagho Jiboie Kwa Wandu Wose

¹ Natimie kubonya maseko nimanye ngera niki chiko andenyi ya kuboilwa. Ela ngawona iri niro maza ra duu.

² Ngawona kukaia kuseka ni wukelu, na maboilo ndeghiredagha wucha ghungi.

³ Nerekoghe ngilongozwa ni bea ya hikima, ngakata shauri ekusekesha na divei eri nisikire nicha. Neregheshereghe wei iyo niyo chia iboie ya wadamu widimagha kukaia moyo nicha andenyi ya irangi jawo ivui jekaia wurumwengunyi.

⁴ Nabonyere kazi mbaa; naaghie nyumba, na kuwa mizabibu kwa wundu ghwapo.

⁵ Nabonyere mbuwa na andu kohoreshera, ngawa midi yose ya matunda andenyi yaro.

⁶ Nabonyere visima venyoshera midi niiwae.

⁷ Naghue wazumba wa womi na wa waka, hata wazumba wikavalwa nyumbenyi kwapo. Nerekoghe na mfugho nyingi kuchumba mndungi uo ose orekoghe Jerusalemu imbiri yapo.

⁸ Nerekutumbanyireghe feza na dhahabu nyingi kufuma kwa bengi ra kiwuzuri ra masanga nereghibonyeragha nguma. Nerewikieghe wabori wa womi na wa waka, na waka wekanya wengi, seji mndwawomi udimagha kukunda.

⁹ Kwa huwo ngawuya m'baa kuchumba wose werekoghe imbiri yapo Jerusalemu; ngakaia na hikima yapo wokoni.

¹⁰ Nerepatireghe kula kilambo nerechiwonieghe kukaia chiboie. Serekuimieghe raha ingi. Nerekukasireghe na vilambo vose nivibonyere, na agho nigho gherekoghe mafungu ghapo.

¹¹ Ngawoka kughipima agho ghose nighibonyere, na seji nerefungieghe ndighi kughibonya; ngawona ni kazi ya duu; ni sa kulwa na mbeo. Nderina fwaida ingi putu.

¹² Kukakoni mzuri wadabonya agheni mmbao ubonyere. Niko ngazoya kuririkanya hikima niki, na isu na wukelu niki.

¹³ Ngawona kukaia hikima yachumbie wukelu seji mwengere ghuchumbie kira.

¹⁴ Mundu wa hikima wawonagha seji ughendagha, ela mkelu ndewonagha; elaima nacheewona wose wadapatwa ni ilagho jifwanane.

¹⁵ Niko ngaghamba ngolonyi kwapo, “Ikakaia ijo jimpatagha mkelu nijo jeni janipata, ni fwaidaki nipatire kwa kukaia na hikima mbaa? Ndeiko. Ni maza ra duu.”

¹⁶ Mundu wa hikima na mkelu wikafwa ndewimukagha kuliwika. Mundu wa hikima na mkelu wadafwa karakara!

¹⁷ Kwa huwo neechawona kukaia moyo ndekune mana ingi, kwa kukaia uko kukaia moyo kose ndekuniredie kindo chingi ela wasi. Iro rose ni maza ra duu; ni sa kulwa na mbeo.

¹⁸ Nazamilo ni vilambo vose nivibonyere wurumwengunyi, kwa kukaia ni suti nivisighie uo mundu uchaaninughia.

¹⁹ Na nani umanyagha ngera uo mundu uchakaia wa hikima angu mkelu? Sena huwo nuo moni uchaakaia m'baa wa maza rose niribonyere kwa kufunga ndighi ngitumia hikima yapo wurumwengunyi. Iri naro ni maza ra duu.

²⁰ Kwa huwo neechafwa ngolo kuwona seji nibonyere kazi wurumwengunyi.

²¹ Ngelo rimu mundu ubonyere kazi kwa hikima na kumanya na wuya, suti urisighie mndumu useribonyere ucheboilwanya naro. Agho nagho ni malagho gha duu na wuwiwi m'baa.

²² Mundu upataki kwa kubonya kazi kose na kukuvavira awurumwengunyi?

²³ Matuku ghake ghose ghachua kuwawa na wasi; akili rake nderihoragha hata nakio. Iri naro ni maza ra duu.

²⁴ Ndekuwadie ilagho jingi jiboie kwa mundu jichumbagha kuja na kunywa na kuboilwanya na kazi rake. Ijo najo neewona jadafuma kwa Mlungu.

²⁵ Kwendapatira hao kuja na kukaia na raha isaakaia ni kwa Mlungu?

²⁶ Mundu ukam'boia Mlungu, uchamneka hikima na kumanya, na kuboilwa. Ela Mlungu wadamneka mkaung'a kazi ekwanya na kutumbanya, upate kumneka uo mundu um'boiagha. Iro naro ni maza ra duu, ni sa kulwa na mbeo.