MCHILI 12 - Biblia Ilagho Jiboie Kwa Wandu Wose

¹ Kwa huwo kumkumbuke Muumbi wako ngelo kuko mdawana; imbiri matuku na miaka ya wasi isechee; ingelo kuchaaghora “Siwueboilwa ni irangi.”

² Ngelo iyo, iji mwengere ghwa iruwa na mori na nyerinyeri ghuchawuya kira kwako, na mawingu gha vua kuwuya.

³ Ngelo ichacha mikonu yako ikulindiagha ichaasughusika, na maghu ghako ghiwadie ndighi idana ghichasilwa ni ndighi. Maghegho ghako ghichasighwa matini ghedafuna vindo, na meso ghako ghichasera kira kusedimagha kuwona.

⁴ Madu ghako ghichafwa kusedimagha kusikira chwaka ra chienyi, na lwaka lwa mtambo ghushagha angu chumbo riborwagha. Ela sena lumbo luborwagha ni nyonyi luchakuwusira dilonyi.

⁵ Kuchaobua andu kwa ighu, na kughenda kuchakaia ndengwa, Kuchabukwa ni imbu kusedimagha kughenda, na bea rose richasia. Wandu wichaghenda andu kwawo kohoresha kwa kutua, na wandu wichakaia wikilila chienyi.

⁶ Tiwina ya feza ichadumbuka, na taa ya dhahabu ichapotoka na kubarika, na mtungi ghwa machi kubarika.

⁷ Wandu wichawuya ndoenyi, na roho iwuye kwa Mlungu uo oreifunyireghe.

⁸ Ni maza ra duu, waghamba Mchili; maza rose ni duu.

Kutua kwa malagho

⁹ Kwa kukaia Mchili orekoghe na hikima, ukachuria kuwifundisha wandu agho oreghimanyireghe. Orekufundishireghe mifwano na kuzighana wuloli ghwaro nicha.

¹⁰ Mchili ukalola malagho ghiboie na gha loli, ukaghiandika nicha.

¹¹ Madedo gha mundu wa hikima gheeka sa mzata ghusongokie gholisha mfugho, na mifwano itumbanyiro sa misumari ikomerelo ikamanga. Eenekwa ni Mlungu, uo Mlisha odu isi diwose.

¹² Mwanwapo, kukulindie na ilagho jingi jichurilwagha aighu ya agho. Kudunga vuo vingi ndekuwadie kutua, na kushoma kungi kwadasirisha mumbi.

¹³ Kutua kwa malagho ni uku: Maza rose ramerie kusikirwa. Muobuo Mlungu na kuiwadia memu yake, angu ihi niyo kazi ya mdamu.

¹⁴ Angu Mlungu uchatanya kula ilagho dibonyagha jikaiagha jiboie angu jizamie; hata agho ghibonyero kivisonyi.