MCHILI 11 - Biblia Ilagho Jiboie Kwa Wandu Wose

Agho ghimfwanagha mundu wa hikima kubonya

¹ Neka wakiwa vindo vako; kuchavipata nyuma ya matuku mengi.

² Waghia vindo vako wandu mfungade, angu hata wunyanya; ndekumanyire ni malaghoki ghizamie ghichagha ndoenyi.

³ Mawingu ghikachua, vua yadanya; mudi ghukaghwa cha kusinyi angu kaskazinyi, ghwadakaia andu koni ghwaghuya.

⁴ Mundu uweseriagha kimu chiboie chiche, ndewagha, nao ndekuwidagha kindo chingi.

⁵ Sa iji koni kusemanyagha seji roho ingiagha kwa mwana uumbwagha kifunyi kwa mae, huwo koni ndekumanyagha kazi ya Mlungu uo ubonyagha vilambo vose.

⁶ Waa mbeu rako nakesho, na luma lwa kenyi wori. Ndekumanyagha ni riao rikaiagha nicha, ngera ni iri angu ni rija.

⁷ Mwengere ni mucha, na kuwona iruwa kwaboie.

⁸ Mundu ukakaia moyo miaka mingi, ndefunye chawucha andenyi ya matuku gha irangi jake; ela ukumbuke kukaia uchafwa. Iro naro ni maza ra duu.

Wandu wa irika kunekwa njama

⁹ Mundu wa irika, boilwa ngelo kuko mdawana. Bonya ijo jose ngolo yako ikunde kujibonye. Ela kumbuka kukaia Mlungu uchakutanya kwa ghose kubonyere.

¹⁰ Kusesumbulo ni ilagho jingi, hata kuvavirwa ni ilagho jingi; kwa kukaia wudawana na wuirika riida noko.