MATHAYO 8 - Biblia Ilagho Jiboie Kwa Wandu Wose

Jesu kum'boisa mundu uko na sima

¹ Jesu ukasea kufuma mghondinyi, na izungu ibaa ja wandu wikamnugha.

² Nao mundu umu uko na sima ukamchea, ukamdungia ngokoro ukighamba, “Bwana ngera kwakunda, kwadima kunielesha.”

³ Jesu ukaghorua mkonu ghwake ukamuadada ukighamba, “Nakunda; eleshwa oho.” Nao shwa uja mundu ukaeleshwa.

⁴ Jesu ukamzera, “Kusakemghoria mndungi ilagho jingi; ela ghenda kukuwonyere kwa mkohani, kufunye ivo vizongona vilaghirilo ni Musa, ghukaie wushuhuda kwa wundu ghwa kueleshwa kwako.”

Jesu kum'boisa mdumiki wa m'baa umu Mroma

⁵ Nao iji Jesu orekoghe ukingia muzi ghwa Kafarnaumu, m'baa umu Mroma ukamghendia ukimlomba wutesia,

⁶ ukighamba, “Bwana, mdumiki wapo oko mkongo ghwa kupooza ghumjagha na ndighi.”

⁷ Jesu ukamzera, “Nichacha nim'boise.”

⁸ Uja m'baa ukamzera, “Bwana, ini sifwane kuchelwa ni oho nyumbenyi kwapo, ela ghora ilagho jeni, na mdumiki wapo uchaboa.

⁹ Angu ini moni wori neko aisi ya nguma ra wazima; nani neko na masikari aisi yapo. Ngamzera umu, ‘Ghenda’ wadaghenda, na mzima ‘Choo’ wadacha; na mzumba wapo, ‘Bonya iji’ nao wadabonya.”

¹⁰ Jesu uendasikira agho, ukashinika ukawizera wandu werekoghe wikimnugha, “Namghoria loli, jingi siwonie mndungi kwa Israeli uko na irumirio sa iji anduangi.

¹¹ Niko huwu namzera, wandu wengi wichacha kufuma mashariki na magharibi, wichasea kidombo andwamweri na Abrahamu, Isaaka, na Jakobo andenyi ya Wuzuri ghwa mlungunyi.

¹² Ela awo werefwaneghe kungia kwa Wuzuri ugho, wichakumbwa shighadi kirenyi; aho wichalila na kuja maghegho.”

¹³ Nao Jesu kamzera uja m'baa, “Ghenda mzinyi, agho kwaghirumiria kuchabonyerwa.” Mdumiki wake ukaboiswa saa ija cheni.

Jesu kuboisa wandu wengi

¹⁴ Jesu ukangia nyumbenyi kwa Petro, ukammbona mkekwake Petro uko mkongo wa homa.

¹⁵ Jesu ukamuadada mkonu ghwake, na homa ikamsigha, ukawuka ukamdumikia.

¹⁶ Luma lwa kenyi yaro, wikamredia wakongo wengi werekoghe na pepo; nao ukariwinga iro roho mbiwi kwa kughora koni, na wakongo wose ukawiboisa.

¹⁷ Orebonyereghe agho kukatisha agho ghereghoreloghe ni mlodi Isaya: “Uo moni oreghidwaeghe manyonge ghedu, na kughiinja makongo ghedu.”

Awo wifwanagha kukaia wanughi wa Jesu

¹⁸ Nao iji Jesu wawona izungu ja wandu jammaria chia rose, ukawilaghira wanughi wake wiruwuke kimonu cha ndiwa.

¹⁹ Mwalimu umu wa Sharia ukacha ukamzera, “Mwalimu, nichakunugha andu kose kuchaaghenda.”

²⁰ Jesu ukamzera, “Mizozo eko na miruma, na nyonyi ra mbeonyi reko na vijngu; ela Mwana wa mdamu ndewadie wulalo ghungi ghokuhoresha anduangi.”

²¹ Mundu umu wa awo weremnughieghe ukamzera, “Bwana, kunineke rusa kande niendemrika aba.”

²² Ela Jesu ukamzera, “Ninughe, sigha wafu wirike wafu wawo.”

Jesu kunyamirisha kiremba

²³ Jesu ukajoka ishuonyi, na wanughi wake wikaghendanya nao.

²⁴ Nao ahoeni chikacha kiremba kibaa aja ndiwenyi, hata ishua jikazoya kusukirilwa ni mivo-mivo ya machi. Ela Jesu orekoghe walala.

²⁵ Wanughi wake wikammbusira wikighamba, “Bwana, dikire daawuyatota!”

²⁶ Jesu ukawizera, “Inyo wandu wa irumirio itini, kwaki mwaobua?” Niko ukawuka, ukaikania mbeo na bahari; kukakaia kuhoa kubaa.

²⁷ Nao wandu wikashinika wikaghamba, “Ni mnduki uhu? Usikirwagha ni mbeo na bahari!”

Jesu kuwiboisa wandu wawi wiko na pepo rizamie

²⁸ Nao iji Jesu waruwuka isanga ja Wagadareni, ukakwana na wandu wawi wafuma makaburinyi wiko na pepo rizamie. Wandu awo werekoghe wibirie na ndighi, hata mndungi nderedimieghe kuidiria chia ija anduangi.

²⁹ Wikazoya kukema wikighamba, “Koko na ilaghoki nesi oho Mwana wa Mlungu? Wele kwaacha kuditirira ngelo edu isevikie?”

³⁰ Kaavui na aho korekoghe na nguwe nyingi rikilishwa.

³¹ Iro pepo rikamzera, “Ikakaia kuadiwinga, didume kwa rija nguwe.”

³² Jesu ukarizera, “Haya ghendenyi.” Niko rikawifuma awo wandu, rikangia rija nguwe. Nao nguwe rose rikashorodoka cha ighambenyi, rikangia ndiwenyi rikafwa.

³³ Waja wandu werekoghe wikirilisha wikakimbia cha mzinyi, wikaghora malagho ghose gherewipatireghe, na malagho gha waja wandu werekoghe na pepo wori.

³⁴ Niko aho wandu wose wa ghuja muzi wikafuma wikamghendia Jesu, hata iji wammbona, wikamvoya ufume isangenyi kwawo.