MATHAYO 7 - Biblia Ilagho Jiboie Kwa Wandu Wose

Kuwitanya wazima

¹ “Msaketanya wazima, msechetanywa inyo wori;

² angu sa iji koni muwitanyagha wazima, nikokoni na inyo mchaatanywa ni Mlungu; na icho kipimo mpimiagha nacho wambenyu, nicho cheni chichaatumilwa kumpimia inyo.

³ Kwaki kuchiwonagha kijaghulu chiko andenyi ya iriso ja mwanyinyu, na icho kilingo chiko irisonyi kwako kumoni kusechiwonagha?

⁴ Angu, kuchadima wada kumzera mwanyinyu, ‘Leka nikufunye icho kijaghulu chiko irisonyi kwako;’ iji oho kumoni kuko na kilingo irisonyi kwako?

⁵ Muji-kuwi oho! Inja icho kilingo chiko irisonyi kwako kande, ima niko kuchaawona nicha kudime kuchifunya icho kijaghulu chiko irisonyi kwa mwanyinyu.

⁶ “Mserineke koshi vilambo va wueli, risechemghalukia na kumrashua inyo; hata lulu renyu msakerikumbia nguwe, risecheriwadia na maghu ghawo.

Lomba, kulole, kukongode

⁷ “Lombenyi, nenyo mchanekwa; lolenyi, nenyo mchawona; kongodenyi, nenyo mcharughuilwa.

⁸ Angu uo ulombagha uchanekwa, uo ulolagha uchawona, na uo ukongodagha ucharughuilwa.

⁹ Oko mndungi konyu kasikira mwana wake wamlomba mkate, uchaamneka igho?

¹⁰ Angu ukalomba samaki, uchaamneka choka?

¹¹ Ikakaia inyo muko wawiwi mwaichi kuwineka wana wenyu vilambo viboie, Ndeyo onyu uko mlungunyi ndechaachumba kuwineka mecha ghose awo wamlombagha anguwada?

¹² Wibonyerenyi wandu wazima agho gheni mkundagha m'bonyero ni awo, angu uku niko kutambua kwaro Sharia na mafundisho gha walodi.

Mnyango msuse

¹³ “Ngienyi mkiidiria mnyango msuse. Angu mnyango ni mshapa, na chia eghenda kutotenyi yaangue; wandu nawo wiidiriagha aho ni wengi.

¹⁴ Ela mnyango ni msuse, na chia eghenda iranginyi ni ya wasi; nayo ni wandu watini wiiwonagha iyo chia.

Mudi ghwadamanyika kwa matunda gharo

¹⁵ “Mkulindie na walodi wa tee. Awo wadacha wikiwoneka sa ng'ondi, ela kondenyi kwawo weeka sa vikwau vibirie.

¹⁶ Mchawimanya kwa mabonyo ghawo. Welee, idimika kuwaya zabibu minjonyi angu tini kwa mndandangoma?

¹⁷ Kwa huwu mudi mucha ghwadava matunda ghiboie, na mudi ghuzamie ghwadava matunda ghizamie.

¹⁸ Mudi ghuboie ndeghudimagha kuva matunda ghizamie, hata mudi ghuzamie kuva matunda ghiboie anduangi.

¹⁹ Kula mudi ghusevagha matunda ghiboie, ghwadademwa na kukumbwa modonyi.

²⁰ Kwa wundu ughu, mchawimanya kwa matunda ghawo.

Jingi seremmanyireghe inyo

²¹ “Si kula mundu uniwangagha ‘Bwana, Bwana’ uchaangia kwa wuzuri ghwa Mlungu anduangi; ela ni uo ulubonyagha lukundo lwa Aba uko mlungunyi.

²² Wengi wichanizera Ituku Jija, ‘Bwana, Bwana, ndederechilieghe kwa irina jako, na kwa irina jako dikawinga pepo na kubonya weke mwakilimbiti wengi?’

²³ Nani nichawizera, ‘Simwichi inyo putu; injikenyi noko inyo wabonyi mawiwi.’

Waaghi nyumba wa mbari iwi

²⁴ “Niko huwu kula mundu ughisikiragha malagho ghapo na kughiwadia, uchafwananishwa na mundu uko na akili, oreaghieghe nyumba yake aighu ya igho.

²⁵ Vua ikanya, meda ikachua machi, sena mbeo ikaweta aighu ya iyo nyumba, ela ndeereghueghe anduangi; angu ereaghiloghe aighu ya igho.

²⁶ Ela uo usikiragha malagho ghapo nao ndeghiwadagha anduangi, uchafwananishwa na mundu mkelu, oreaghieghe nyumba yake msangaghenyi.

²⁷ Vua ikanya, meda ikachua machi, na mbeo ya kiremba ikaweta aighu ya iyo nyumba, nayo ikaghwa. Na kughwa kwaro kukakaia kubaa.”

Nguma ya Jesu

²⁸ Nao iji Jesu waghimeria malagho agho, jija izungu ja wandu wikashinika kwa wundu ghwa agho mafundisho ghake;

²⁹ angu userefundishireghe sa walimu wa Sharia, ela orefundishireghe kwa nguma.