MATHAYO 24 - Biblia Ilagho Jiboie Kwa Wandu Wose

Jesu kughora aighu ya kunoneka kwa Hekalu

¹ Jesu ukafuma Hekalunyi, nao ukighenda chia yake, wanughi wake wikamchea kummbonyera maaghi gha Hekalu.

² Ela uo ukawitumbulia, “Mwaghiwona agha ghose? Namghoria loli, ndekuwadie igho jingi jichaasigharika aighu ya mmbao jiseghushiro andoenyi anduangi.”

Wasi na matiriro

³ Hata iji Jesu wasea kidombo aighu ya Mghondi ghwa Mizeituni, wanughi wake wikamghendia njamenyi wikamkotia, “Kudighorie, maza iri richakaia lii? Na alama ya kucha kwako ni iao, na ya kuja kukatia kwa ngelo?”

⁴ Jesu ukawitumbulia, “Manyenyi mndungi usakemlaghasha.

⁵ Angu wengi wichacha kwa irina japo wikighamba, ‘Ini nuo Kristo,’ nawo wichawilaghasha wengi.

⁶ Mchasikira gha wuda na wuvoro ghwa wuda; ela msakeobua; angu suti maza iro riche, ela kuja kutua ndekulighisire.

⁷ Angu mbari ichabonya wuda aighu ya mbari na wuzuri aighu ya wuzuri, kuchakaia na njala na misughusiko andu kuzima kuzima.

⁸ Ela maza iri rose ni sa kuzoya kulumwa kwa kuva.

⁹ “Wichamfunya mtiriro na kubwaghwa, nenyo mchamenywa ni mbari rose kwa wundu ghwa irina japo.

¹⁰ Aho wengi wichawuya nyuma, wikifunyana na kuzamiana weni na weni.

¹¹ Wichawuka walodi wa tee wengi, nawo wichawilaghasha wandu wengi.

¹² Na kwa wundu ghwa agho mawiwi kuchurikia, lukundo lwa wengi luchahora modo.

¹³ Ela uo urumaghiagha hata kutua nuo moni uchaakia.

¹⁴ Na iji Ilagho Jiboie ja Wuzuri jichachilwa wurumwengunyi kose kukaia wushuhuda kwa wandu wose; aho niko kutua kuchacha.

Matiriro mabaa

¹⁵ “Ela kasikira mwammbona uja ‘Mmbiwi Mnoni’, uo oreghoreloghe ni mlodi Danieli, ukikaia kimusi andu kwa wueli, (uo ushomagha ndetambuo)

¹⁶ awo wiko Judea ndewikimbirie mghondinyi;

¹⁷ na uo uko aighu nyumbenyi usakesea kuwusa ivo vilambo viko nyumbenyi kwake;

¹⁸ na uo uko mbuwenyi usakewuya kuwusa nguwo yake.

¹⁹ Si wasi ugho kwa waka wiko na vifu, na awo wiongoshagha wana watini matuku agho!

²⁰ Lombenyi angu kukimbia konyu kusakekaia ngelo ya kwari angu ituku ja Sabato.

²¹ Angu kuchakaia na wasi m'baa na ndighi, jingi ghusewonekie kufuma kuzolwa kwa wurumwengu hata idana; nagho ndeghuchaawoneka jingi sena anduangi.

²² Na ngera agho matuku ghiserepunguziroghe, kumangu mndungi ndekiagha anduangi; elaima kwa wundu ghwa awo wasaghulwa, Mlungu uchaghipunguza matuku agho.

²³ “Matuku agho mndungi ukamzera, ‘Olenyi Kristo hoyu!’ angu ‘Hoja aja!’ msakerumiria.

²⁴ Angu wichawuka weke Kristo wa tee na walodi wa tee; wichawonyera weke mwakilimbiti wengi na mashiniko; wipate kuwilaghasha ngera idimika hata awo wasaghulwa.

²⁵ Olenyi namghoria kiimbiri.

²⁶ Hata iji wamzera, ‘Hoja oko kireti,’ msakefuma; iji wamzera, ‘Hoyu oko vumbenyi va ndenyi,’ msakerumiria.

²⁷ Angu sa iji koni luhehia lukabagha kufuma mashariki hata magharibi, niko koni kuchaakaia kucha kwake Mwana wa Mdamu.

²⁸ Angu andu koni gharia iko, niko koni nderi rikwanyikiagha.

Kucha kwake Mwana wa Mdamu

²⁹ “Nyuma ya wasi ghwa matuku ghaja, iruwa jichawuya kira, na mori ndeghuchaafunya miengere yaro anduangi; nyerinyeri richakaia rikipotoka kufuma mlungunyi, nandighi ra mlungunyi richasukwa-sukwa.

³⁰ Niko aho ichawoneka alama ya Mwana wa Mdamu aighu mawingunyi, na mbari rose ra ndoenyi richakema na kulila, nawo wichammbona Mwana wa Mdamu ukicha aighu ya mawingu gha mlungunyi uko nandighi na wubaa mungi;

³¹ nao uchawiduma weke malaika wake na lwaka lubaa lwa tarumbeta, kuwikwanya wasaghulwa wake kufuma mbembe inya ra wurumwengu, kufuma kutua uku hata kutua kuja kwa mlungunyi.

Ifundisho kwa mtini

³² “Kufundishenyi mmbeni kwa mfwano ghwa mtini; iji longe lwaro lwakafunya malemba makoo, mwadamanya angu sumesu yalighisa.

³³ Wokoni nenyo iji mwawona maza iri rikikaia, manyenyi angu oko kaavui kucha.

³⁴ Namghoria loli, kivalwa ichi ndechichaaida anduangi, maza iri rose risekaie.

³⁵ Mlungunyi na ndoenyi kuchaida, ela madedo ghapo ndeghichaaida anduangi.

Mndungi ndemanyire ituku hata saa

³⁶ “Ela ituku na saa ija, mndungi ndeimanyagha; hata weke malaika wiko mlungunyi, hata Mwana, ela Aba moni.

³⁷ Sa iji erekoghe matuku gha Nuhu, niko koni ichaakaia ituku ja kucha kwake Mwana wa Mdamu.

³⁸ Angu matuku agho imbiri ya gharika, werekoghe wikija na kunywa, wikilowua na kulowolwa; hata ituku jija Nuhu orengirieghe safinenyi,

³⁹ ndeweremanyireghe anduangi, hata gharika ikacha na kuwitotesha wose; niko koni kuchaakaia kucha kwake Mwana wa Mdamu.

⁴⁰ Ngelo iyo, wandu wawi wichakaia mbuwenyi; umu uchadalwa na umu uchasighwa.

⁴¹ Waka wawi wichakaia wikisha, umu uchadwalwa na umu uchasighwa.

⁴² Kwa huwu chereshenyi, angu ndemmanyire ni ituku jiao Bwana onyu uchaacha anduangi.

⁴³ Ela manyenyi ilagho iji: angu ngera mundu wa nyumba odemanya ni ngelo iao ya nakio uchelwagha ni kitoi, kumangu orechereshagha; hata ndereisighagha nyumba yake ibaro ni vitoi anduangi.

⁴⁴ Kwa huwu inyo wori, kaienyi nicha, angu Mwana wa Mdamu uchacha ngelo mseimanyagha anduangi.

Mdumiki Mloli angu useko mloli

⁴⁵ “Nani uo mdumiki uko mloli na wa akili, uo bwana wake uchaammbika aighu ya wandu wake, uwineke vindo kwa kimu charo?

⁴⁶ Warasimilwa uja mdumiki bwana wake uchaamkua ukibonya wokoni.

⁴⁷ Namghoria loli uchammbika mdumiki uja aighu ya mali rake rose.

⁴⁸ Ela iji uja mdumiki mmbiwi waghamba ngolonyi kwake, ‘Bwana wapo wamuka luma kuwuya.’

⁴⁹ Nao uzoye kuwikaba wadumiki wambao na kuja na kunywa andwamweri na wawongeri;

⁵⁰ niko bwana wake uchaacha ituku usejisuwirie na saa useimanyire anduangi.

⁵¹ Uchamdumbua vipande vipande, na kummbika chiaimweri na waji-kuwi. Aho kuchakaia na kililo na kuja maghegho.