MARKO 7 - Biblia Ilagho Jiboie Kwa Wandu Wose

Mafundisho gha weke wawa

¹ Nao Mafarisayo na walimu wa Sharia wamu wifumie Jerusalemu, wikakwanyika imbiri ya Jesu.

² Wikawiwona wanughi wake wamu wikija vindo na vala viseoghoshero seji ifwane.

³ (Angu Mafarisayo na Wayahudi wose, ngera wiseoghie vala putu, ndewijagha anduangi, wikighuwadia mzango ghwa waghosi.

⁴ Sena, wikafuma sokonyi, ngera wisekuoghoshere, ndewijagha kindo chingi anduangi. Sena eko mizango mizima milazi winekelo kuiwadia, sa kuoghosha vikombe, sufuria, na vilambo va shaba.)

⁵ Nao Mafarisayo na walimu wa Sharia wikamkotia Jesu, “Welee, kwaki wanughi wako wiseghutalagha mzango ghwa waghosi, ela wadaja vindo wiseoghoshere vala seji ifwane?”

⁶ Jesu ukawizera, “Isaya orelodieghe nicha aighu konyu inyo waji-kuwi, sa iji koni oreandikieghe: ‘Wandu awa wanibonyera ishima ja momu ghoni, waghamba Mlungu, ela ngolo rawo reko kula nani.

⁷ Kunitasa kwawo ni kwa duu, nawo wadafundisha mafundisho gha memu yawo, seji ni memu ya Mlungu.’

⁸ “Mwaghusigha momu ghwa Mlungu na kughuwadia mzango ghwa wadamu.”

⁹ Jesu ukachuria kuwizera, “Loli moko na wuya ghonyu gholegha sharia ya Mlungu, eri mughuwadie mzango ghwa mzenyu.

¹⁰ Angu Musa oreghorieghe, ‘Kuwibonyere ishima ndeyo na mayo,’ na, ‘Uo ose ughoragha kiwiwi kwa ndee angu kwa mae, ndefo kifwa.’

¹¹ Ela inyo mwaghamba, ngera mundu wamzera ndee angu mae, ‘Icho kwaghambagha nikuneke ni Korban’ (kutambua kwaro, chanekwa Mlungu),

¹² nao huwo kedi ndekosere kwa kumwima ndee angu mae.

¹³ Huwo mwaghunona momu ghwa Mlungu kwa kughuwadia mzango ghwa mzenyu. Sena na vilambo vingi sa ivi mwavibonya.”

Maza ridimagha kumlusha mundu

¹⁴ Jesu ukajiwanga izungu ja wandu wimchee sena, ukawizera, “Nisikirienyi inyo mmbose, sena mtambukilo.

¹⁵ Ndekuwadie kindo chingi shighadi ya mundu chikamngia andenyi kwake chidimagha kumghalusa kulua anduangi. Ela ivo vifumagha andenyi kwake nivo veni vimghalusagha kulua. [

¹⁶ Mndungi ukakaia na madu ghesikira, ndesikire.”]

¹⁷ Hata iji wameria kujisigha izungu na kungia nyumbenyi, wanughi wake wikamkotia kutambua kwaro ghuja mfwano.

¹⁸ Nao ukawizera, “Welee, hata na inyo wori ndemtambukilwagha? Ndemtambuagha angu icho chose chiko shighadi, chikangia andenyi kwa mundu, ndechidimagha kumlusha anduangi,

¹⁹ angu ndechingiagha ngolonyi anduangi, ela kifunyi kwake, sena chiaida noko choronyi?” Kwa kughora huwo, Jesu ukaelesha vindo vose.

²⁰ Nao ukaghamba, “Icho chimfumagha mundu, nicho cheni chimlushagha.

²¹ Angu kufuma kondenyi kwa ngolo ra wandu, ghadafuma maririkanyo ghizamie, kulaka,

²² wutoi, kubwagha, kusela na waka wa wandu, iriso, wuwiwi, wukalo, wusawi, kurasha, wung'eti na wukelu.

²³ Iri maza rizamie rose radafuma andenyi, naro radamlusha mundu.”

Irumirio ja muka umu

²⁴ Jesu ukawuka aho, ukaghenda masanga gha Tiro na Sidoni. Ukangia nyumba imu ukikunda mndungi usemanye, ela ndeeredimikieghe uvisike anduangi.

²⁵ Nao ahoeni, muka umu mnjighe wake uko na pepo izamie, ukasikira wuvoro ghwake, ukacha ukaghwa maghunyi kwake.

²⁶ Nao orekoghe muka wa Kigriki, mbari ya Wasurofoinike. Ukamlomba Jesu uiwinge pepo ifume kwa mnjighe wake.

²⁷ Jesu ukamzera, “Leka wana wighude kande, angu si nicha kuviwusa vindo va wana na kuvikumbia koshi.”

²⁸ Ela uja muka ukamzera, “Ni loli Bwana, ela hata koshi riko mezenyi na kosi, rajagha misusure ipotokagha kufuma kwa wana.”

²⁹ Jesu ukamzera, “Kwa ilagho iji, kwende chia yako. Pepo yamfuma mwana wako.”

³⁰ Aho uja muka ukaghenda nyumbenyi kwake, ukamkua mnjighe wake walala wulinyi, na pepo yameria kumfuma.

Jesu kuboisa mundu kituri usededagha

³¹ Jesu ukafuma isanga ja Tiro, ukaidia Sidoni, hata ndiwa ya Galilaya, ukiida aghadi ya isanga ja Dekapoli.

³² Wikamredia mundu ufue madu, sena ughughumiagha, wikimvoya ummbikirie mikonu.

³³ Jesu ukamfunya uja mundu nambai ya jija izungu, ukamngira vala va madu, ukachuya mada na kumuadada lumi lwake.

³⁴ Ukazighana aighu mlungunyi na kusoria ngolo, ukamzera, “Efatha,” kutambua kwaro, “Tambuka.”

³⁵ Nao madu ghake ghikatambuka, na lumi lwake lukafunguka, ukadeda nicha.

³⁶ Nao ukawilaghira wisakemghoria mndungi. Ela uduawilaghira huwo saki, niko wichurie kughieresha malagho agho.

³⁷ Wandu wikashinika nandighi loli-loli, wikighamba, “Wadabonya maza rose nicha: wadabonya hata wifue madu wisikire, na vituri widede.”