MARKO 13 - Biblia Ilagho Jiboie Kwa Wandu Wose

Jesu kughora aighu ya kunoneka kwa Hekalu

¹ Iji Jesu orekoghe ukifuma Hekalunyi, umu wa wanughi wake ukamzera, “Mwalimu, zighana seji magho agha na maaghi gharo ghiboie.”

² Jesu ukamzera, “Kwawuyaghiwona agha maaghi mabaa? Aha ndekuchaasigharika igho jingi aighu ya mmbao jisevuchulo anduangi.”

Wasi na matiriro

³ Nao iji Jesu orekoghe kidombo aighu ya Mghondi ghwa Mizeituni, chija kimonu kulangaya cha Hekalunyi, Petro, Jakobo, Johane, na Andrea, wikamruda njama wikamkotia,

⁴ “Welee, dighorie, maza iri richakaia lii? Sena ni alama iao ichaadiwonyera angu maza iri ralighisa kukaia?”

⁵ Jesu ukazoya kuwizera, “Manyenyi mndungi usakemlaghasha.

⁶ Wengi wichacha wikitumia irina japo wikighamba, ‘Ini nuo moni;’ nawo wichalaghasha wengi.

⁷ Hata iji mwasikira wuda na wuvoro ghwa wuda, msakeobua, angu suti maza iri rikaie; ela kuja kutua ndekulighisire kande anduangi.

⁸ Angu mbari ichawuka kulwa na mbari na wuzuri ghuchawuka kulwa na wuzuri. Kuchakaia na misughusiko andu kuzima-kuzima na njala. Ela maza iri ni sa kuzoya kulumwa kwa kuva.

⁹ “Ela manyenyi mkulindie inyo mmbeni, angu wandu wichamfunya mandunyi, na kumkaba andenyi ya masunagogi. Mchakaia kimusi imbiri ya wabonyi nguma na wazuri kwa wundu ghwapo, mpate kuwishuhudia.

¹⁰ Ela imbiri ya iro, suti Ilagho Jiboie jichilo kwa mbari rose.

¹¹ Nao kasikira mwawadwa na kushitakilwa, msakeja wasi kiimbiri wei mchaghora wada, ela iro muchaanekwa kughora kwa ija ngelo cheni, niro reni, righorenyi; angu si inyo mghoragha anduangi, ela ni Roho Mweli ughoragha.

¹² Mundu uchamfunya mruna ubwagho; ndee mwana uchamfunya mwana, na wana wichawighalukia wavi wawo, wipate kuwibwagha.

¹³ Nenyo mchamenywa ni wandu wose kwa wundu ghwa irina japo. Ela uo urumaghiagha hata kutua, nuo moni uchaakia.”

Matiriro mabaa

¹⁴ “Ela kasikira mwammbona uja ‘Mmbiwi Mnoni’ wakaia kimusi andu kuseko kwake anduangi, (uo ushomagha ndetambuo); kimu icho, awa wiko Judea, ndewikimbirie mghondinyi.

¹⁵ Uo uko aighu nyumbenyi, usakesea, hata usakengia kufunya kindo chingi chiko nyumbenyi kwake anduangi.

¹⁶ Uo uko mbuwenyi, usakewuya kuwusa nguwo yake.

¹⁷ Ela ni bugha kwa waka wiko na vifu na awa wiongoshagha wana matuku agho!

¹⁸ Lombenyi maza iri risakekaia matuku gha mbeo.

¹⁹ Angu matuku agho, kuchakaia na matiriro jingi ghisewonekie kufuma kuumbwa kwa wurumwengu, hata na jingi sena ndeghichaakaia anduangi.

²⁰ Na ngera Bwana usereghipunguzireghe matuku agho, kumangu mndungi ndekiagha anduangi. Ela kwa wundu ghwa waja wasaghulwa orewisaghueghe, waghipunguza matuku agho.

²¹ “Kimu icho, ngera mndungi wamzera, ‘Kristo hoyu aha!’ angu ‘Hoja aja!’ msakerumiria.

²² Angu wichawuka weke Kristo wa tee, na walodi wa tee; wichawonyera wandu alama na mashiniko, kwa kuwilaghasha; hata ngera kudimika, na waja wasaghulwa wori.

²³ Nenyo mkumanye angu namghoria maza rose kiimbiri.”

Kucha kwake Mwana wa Mdamu

²⁴ “Ela matuku agho, nyuma ya matiriro, iruwa jichawuya kira, na mori ndeghuchaafunya miengere yaro anduangi.

²⁵ Nyerinyeri richakaia rikipotoka kufuma mlungunyi, nandighi ra mlungunyi richasukwa-sukwa.

²⁶ Niko wichaammbona Mwana wa Mdamu ukicha mawingunyi kwa ndighi na wubaa mungi.

²⁷ Nao uchawiduma weke malaika uwikwanye andwamweri wasaghulwa wake kufuma mbembe inya ra ndoenyi, kufuma kuzoya kwaro ndoenyi hata kutua kwaro.”

Ifundisho kwa mtini

²⁸ “Kwa mtini mkufundishe mmbeni mfwano ughu: Iji longe lwaro lwakafunya malemba makoo, mwadamanya angu sumesu yalighisa.

²⁹ Huwo koni inyo wori, iji mwawona maza iri rakaia, manyenyi angu Mwana wa Mdamu oko kaavui na ndighi.

³⁰ Namghoria loli, kivalwa ichi ndechichaaida, maza iri rose risekaie anduangi.

³¹ Mlungunyi na ndoenyi kuchaida, ela madedo ghapo ndeghichaaida anduangi.”

Mndungi ndemanyagha ituku na saa

³² “Ela ituku na saa iyo, mndungi ndeimanyagha anduangi, hata weke malaika wiko mlungunyi, hata Mwana; ela uja Aba nuo uichi.

³³ Manyenyi mchereshe, angu kimu charo ndemchimanyire chichakaia lii anduangi.

³⁴ Ni sa mundu wawuyadamba charonyi, nao ukighusigha muzi ghwake, ukawineka wadumiki wake kazi ra ugho muzi, kula mundu na kazi yake; ukamzera mlindiri wa mnyango uchereshe.

³⁵ Kwa huwo chereshenyi, angu ndemmanyire ni lii uchaacha uja bwana wa nyumba anduangi; ngera ni luma lwa kenyi, angu kio ghadi, angu njogholo ikideda, angu luma lwa nakesho;

³⁶ usechemtukira na kumkua mwalala.

³⁷ Na seji nimzeragha inyo, nawizera wose: Chereshenyi!”