MARKO 11 - Biblia Ilagho Jiboie Kwa Wandu Wose

Jesu kungia Jerusalemu ukizumilwa

¹ Hata iji werekoghe kaavui na Jerusalemu, wikavika Bethfage na Bethania, kaavui na Mghondi ghwa Mizeituni. Jesu ukaduma wanughi wake wawi,

² ukawizera, “Ghendenyi ghuja muzi ghuko imbiri konyu, nao ahoeni mkingia mzinyi, mchawona mwana wa punda ufungilo, jingi usejokelo ni mndungi anduangi. Mfunguonyi mumrede.

³ Ngera mndungi wamkotia, ‘Welee, kwaki m'bonyagha huwu?’ Mzerenyi, ‘Bwana wamkunda, nao uchammbunja shwa wori.’”

⁴ Wikaghenda, wikammbona mwana wa punda chienyi ufungilo mnyangonyi ghwa nyumba, wikamfungua.

⁵ Wandu wamu werekoghe kimusi ahoeni, wikawikotia, “Kwaki mumfunguagha mwana wa punda?”

⁶ Wikawitumbulia sa iji koni Jesu orewizerieghe; nawo wikawisigha.

⁷ Wikamredia Jesu uo mwana wa punda, wikaala nguwo rawo aighu yake, na Jesu ukasea kidombo aighu kwake.

⁸ Wandu wengi wikariala nguwo rawo chienyi, na wazima wikaala masawi wereghidemieghe mbuwenyi.

⁹ Na wandu awa werekirieghe na imbiri andwamweri na awa werekoghe wikinugha na nyuma, wikaghora kwa lwaka lubaa, “Hosana! Nderasimilo uo uchagha kwa irina ja Bwana!

¹⁰ Ndeghurasimilo ughu wuzuri ghuchagha ghwa aba odu Daudi. Hosana Uo-Uko-Aighu-Nandighi.”

¹¹ Jesu ukangia Jerusalemu, ukaghenda hata Hekalunyi, ukazighana vilambo vose chia rose. Ela kwa kukaia erekoghe luma lwa kenyi, ukafuma, ukaghenda Bethania, andwamweri na waja ikumi na wawi.

Mafundisho aighu ya mtini

¹² Niko nakesho yaro, iji wafuma Bethania, Jesu ukazughwa ni njala.

¹³ Nao iji wawona mtini kula koni, ghuko na malemba mengi, ukaghusughudia eri upate itunda jingi aho. Hata iji wabusa, nderewonieghe itunda jingi, ela malemba maduu; angu ndeerekoghe ngelo ya matini anduangi.

¹⁴ Aho ukaghuzera, “Jingi mndungi usakeja itunda jingi kwako.” Na wanughi wake wikamsikira ukighora.

Jesu kughenda Hekalunyi

¹⁵ Nao wikabusa Jerusalemu. Jesu ukangia Hekalunyi, ukazoya kuwiwinga awa werekoghe wikiuza na kughua andenyi ya Hekalu. Ukaribingilisha meza ra awo werekoghe wikivunja pesa, na vifumbi va awo werekoghe wikiuza maringo.

¹⁶ Hata nderemrumirieghe mndungi uidirie Hekalunyi na kindo chingi anduangi.

¹⁷ Nao ukawifundisha, “Welee, ndeiandikilo, ‘Nyumba yapo ichawangwa nyumba ya malombi kwa mbari rose’, anguwada? Ela inyo mwaibonya mbanga ya viting'a!”

¹⁸ Wakohani wabaa na walimu wa Sharia wiendasikira huwo, wikalola chia emtotesha, ela weremuobueghe kwa kukaia izungu jose ja wandu jereshinuloghe ni mafundisho ghake.

¹⁹ Hata iji lwavika luma lwa kenyi, Jesu na wanughi wake wikafuma shighadi ya muzi.

Mafundisho aighu ya kunyaya kwa mtini

²⁰ Hata nakesho yaro wikiida, wikaghuwona ghuja mtini ghunyarie putu, chiaimweri na miri yaro.

²¹ Petro ukakumbuka, ukamzera Jesu, “Mwalimu, zighana ghuja mtini koreghuwasireghe njowe, ghwanyarie.”

²² Jesu ukawizera, “Kaienyi na irumirio kwa Mlungu.

²³ Namghoria loli, uo ose uchaaghuzera mghondi ughu, ‘Kuka kukukumbe baharinyi’, nao ndekaiagha na ngera ingi ngolonyi kwake, ela warumiria angu agho ughoragha ghichakaia wokoni, loli uchabonyerwa.

²⁴ Niko namzera, vilambo vose muvilombagha, rumirienyi angu mwavipata, nenyo mchanekwa.

²⁵ Nenyo iji mwakaia kimusi mkilomba, fuenyi wughoma ikakaia mkosane ilagho jingi na mndungi, niko na Ndeyo onyu uko mlungunyi uchamleka inyo makosa ghenyu. [

²⁶ Ela mkalegha kufuya wughoma, hata na Ndeyo onyu uko mlungunyi ndechaamfunya wughoma inyo wori.”]

Ikoto aighu ya nguma ya Jesu

²⁷ Nao wikabusa sena Jerusalemu. Hata iji Jesu orekoghe ukisela andenyi Hekalunyi wakohani wabaa, walimu wa Sharia na waghosi wikamchea,

²⁸ wikamkotia, “Welee, ni kwa ngumaki kubonyagha maza iri? Angu nani orekunekieghe nguma ebonya maza iri?”

²⁹ Jesu ukawizera, “Na ini nichamkotia ilagho jimu munitumbulie, niko na ini nichaamtumbulia ni kwa ngumaki nibonyagha maza iri.

³⁰ Welee, nguma ya Johane ebaputiza edefuma mlungunyi angu kwa wadamu? Nitumbulienyi.”

³¹ Wikazoya kutumbuliana weni na weni wikighamba, “Dikaghamba, ‘Edefuma mlungunyi’, uchadikotia, ‘Kwaki sena mseremrumirieghe?’

³² Na dikaghamba, ‘Edefuma kwa wadamu.’” (Werewiobueghe wandu, angu wandu wose weremrumirieghe Johane kukaia mlodi wa loli.)

³³ Wikamtumbulia Jesu, “Ndedimanyire.” Jesu ukawizera, “Hata na ini simghoriagha ni kwa nguma iao nibonyagha maza iri anduangi.”