MAKATANISHO 7 - Biblia Ilagho Jiboie Kwa Wandu Wose

¹ Mwana wapo, wadia malagho ghapo, na malaghiro ghapo kughiwike ngolonyi kwako.

² Wadia malaghiro ghapo kukaie moyo; kulindie mafundisho ghapo sa mundu wa iriso jako.

³ Wadia mafundisho ghapo ngelo rose, kughiandike ngolonyi kwako.

⁴ Tala hikima sa mwanyinyu wa waka, na suku sa mghenyi wako wa ngolonyi.

⁵ Richakulindia na uo muka mseli; uo muka mghenyi usingilo ni malagho.

Muka mseli

⁶ Nerekoghe nyumbenyi kwapo aidirishenyi;

⁷ ngawona wandu wisemanyagha; ngammanya mdawana umu mkelu aghadi ya wandu wa irika.

⁸ Orekoghe ukighenda chienyi kaavui na ngulai, andu muka umu orekoghe ukikaia; ukawada chia iidiriagha kaavui na nyumba yake,

⁹ ngelo ya lumisimisi, kira chikisea.

¹⁰ Nao uo muka ukafuma kummara urwae sa ilaya, ukibonya mipango.

¹¹ Orekoghe na wuwana ghodeda kuseko na waya; usemangagha nyumbenyi.

¹² Ngelo imu uawoneka chienyi, ngelo imu sokonyi; wadawoneka andu kose kwa ngulai, ukilaliria.

¹³ Ukammbwada uja mdawana, ukamsusugha, ukamzighana na meso gha lukundo ukamzera,

¹⁴ “Nafunya vizongona va maghemi ghapo idime; neko na nyama yaro nyumbenyi.

¹⁵ Kwa huwo naachakumara; nedeeka ngikulola, da hoku idana nakuwona.

¹⁶ Nameria kuala wuli ghwapo na shuka ra kitani ya rangi rifumie Misri.

¹⁷ Naghudunga marumba gha manemane, uudi na mdalasini.

¹⁸ Choo dilalebonya lukundo chee; ndediboilo diwose andenyi ya lukundo.

¹⁹ Mumi wapo ndeko mzinyi; wadamba charo cha kula.

²⁰ Wadwae pesa ndazi; Uchawuya nyuma ya majumwa awi.”

²¹ Ukamshingira na malagho mengi ghesesea-sesea, ukimfungisha ndighi na malagho ghake ghisingie.

²² Uja mdawana ukamnugha ija ngelo cheni, sa ng'ombe iendabwaghwa angu sarigha yawadwa ni mdegho,

²³ hata ilaso na iwanu ja ngolo. Orekoghe sa nyonyi ighendiagha mdegho; nderekoghe ukimanya wei irangi jake jeeka ndengonyi.

²⁴ Na idana ee wanake, nisikirenyi; sikirienyi malagho ghapo.

²⁵ Kuserumire ngolo yako ikiwadwa ni muka sa uo; kusemnughe.

²⁶ Wanonie womi wengi; washekerie vifwa va wandu wengi.

²⁷ Nyumba yake ni chia eghenda cha Andu kwa Wafu; ilongozagha cha kifonyi.