MAKATANISHO 31 - Biblia Ilagho Jiboie Kwa Wandu Wose

Kumfunda mzuri

¹ Malagho gha Mzuri Lemueli orefundishiroghe ni mae:

² “Oho ko mwana wapo mkundwa, matumbulio gha malombi ghapo. Nikuzera wada?

³ Kusaketumia ndighi na pesa rako kwa waka.

⁴ Ndeiwifwane wazuri winyo divei, ee Lemueli, angu wabonyi nguma kunywa chofi.

⁵ Wikanywa chofi wichaliwa iyo sharia iwikilo, na kulaghasha hachi ra wandu wikorongwagha.

⁶ Chofi ni kwa wundu ghwa mundu utotagha, na divei ni kwa wundu ghwa uo uko na wasi m'baa.

⁷ Ndewinyo wipate kuliwa wukiwa ghwawo, wisewuekumbuka wasi ghwawo.

⁸ “Deda wulalo ghwa wandu wisedimagha kudeda; lindia hachi ra wandu wisedimagha kukutesia weni.

⁹ Deda kwa wundu ghwawo, kukaie mtanyi wa hachi. Lindia hachi ra wakiwa na awo wisowagha.”

Muka uboie

¹⁰ Nani udimagha kumpata muka uboie? Ni wa zoghori mbaa kuchumba lulu.

¹¹ Mumi oomrumiria putu; nao jingi ndewuyagha mkiwa.

¹² Mkake wadam'bonyera nicha; ndechaamkita irangi jake jose.

¹³ Wadalola sufu na kitani, na kuriluka kwa ngolo ndicha.

¹⁴ Ooka sa meli ra washami, riredagha vindo kufuma kula.

¹⁵ Wadawuka ndoe iseelie, na kuboisa vindo kwa wundu ghwa wandu wake, na kuwagha kazi kwa wai wake wa kazi.

¹⁶ Wadazighana mbuwa na kuighua, na kwa mapato gha kazi rake wadawa mizabibu.

¹⁷ Ni m'bonyi kazi ufungie ndighi, kari kose wadakufungisha ndighi.

¹⁸ Wakunde umanye kukaia kushama kwake kureda fwaida; wadabonya kazi hata nakio.

¹⁹ Wadabonya uzi na kuluka nguwo rake moni.

²⁰ Wadawitesia wakiwa, na kuwineka awo wisowagha.

²¹ Ndeobuagha mbeo ibirie, angu wandu wa nyumbenyi kwake wirushiro nguwo ra modo.

²² Wadakubonyera matandiko ghiboie kwa wundu ghwa wuli ghwake, na kurwa nguwo ra zambarau ra kitani ndicha.

²³ Mumi ni mundu umanyikie andu kokwania kwa muzi; andu useanyagha kidombo na waghosi wa isanga.

²⁴ Wadabonya nguwo ra kitani na kuriuza; wadaghenja mishipi kwa washami.

²⁵ Oko na ndighi unekelo ishima; ndeobuagha maza richagha.

²⁶ Wadadeda kwa hikima, na kufundisha wughoma.

²⁷ Waizighana nyumba yake nicha, nao ndejagha vindo usevibonyere kazi.

²⁸ Wana wake wadamfunyira chawucha, na mumi wadamkasa.

²⁹ Wadaghora, “Waka wengi wabonyere nicha nandighi, ela oho kwawichumba wose.”

³⁰ Kudawiria kwakaliagha, na kughoka kwasiagha; ela muka umuobuagha BWANA uchakumwa.

³¹ Mneke ishima kwa ghose ubonyere, na kazi rake rim'bonye ukaso andu kokwania kwa muzi.