MAKATANISHO 29 - Biblia Ilagho Jiboie Kwa Wandu Wose

¹ Uo ukanilwagha mando malazi, ukichuria kughilika, uchanoneka shwa hata ndechaadima kuboiswa anduangi.

² Wandu wa hachi wikakabonya nguma wandu wadazuma; ela wandu wizamie wikakabonya nguma wandu wadakaia na wasi.

³ Uo ukundagha hikima wadam'boia ndee, ela uhu ukanyagha na malaya wadanona mali rake.

⁴ Mzuri ukakaia na loli, isanga jikaia nicha, ela uhu ukundagha kuhongwa wadajinona isanga.

⁵ Mundu ukunde kusesea-sesea mmbao wadakuwikia mdegho.

⁶ Mundu mmbiwi, wadawadwa ni ikosa jake, ela mundu wa hachi wadabora na kuzuma.

⁷ Mundu wa hachi waichi hachi ra wakiwa, mundu uzamie ndetambukilwagha ni maza sa iro.

⁸ Wandu wedema sare wadaredia muzi ndasanya, ela wandu wa hikima wadahoresha lubio.

⁹ Mundu wa hikima ukakasimana na mkelu, mkelu wadajokwa ni machu, nao odesekaa kuseka koni; hata ndenyamagha.

¹⁰ Wandu wikundagha kudia bagha wadazamilwa ni mundu usene ikosa jingi, na wandu wizamie wadakunda kum'bwagha mhachi.

¹¹ Mkelu wadawonyera machu ghake worinyi; ela mundu wa hikima wadakuvisa.

¹² M'bonyi nguma ukasikiragha malagho gha tee, wabaa wake wa kazi wose wichawuya watee.

¹³ Mkiwa na mkorongi wedefwanana kwa ilagho jimweri: kukaia BWANA wawinekie meso ghewona wose.

¹⁴ Mzuri ukatanya wakiwa karakara, wuzuri ghwake ghuchadua.

¹⁵ Zobo na mawonyero ghadareda hikima; ela mwana ukasighwa moni uafusha mae waya.

¹⁶ Wandu wizamie wikabonya nguma, makosa ghiachurikia; ela wandu wa hachi wiaweseragha kughwa kwawo.

¹⁷ Mfundishe mwana wako, nao uchakuneka kuhora; na oho kuchaboilwa ngolonyi.

¹⁸ Mbari isewadie wulongozi ghwa Mlungu ndeikaiagha nicha. Warasimilwa mundu uwadiagha sharia ya BWANA.

¹⁹ Mdumiki ndefundishikagha kwa madedo gheni. Wadima kutambukilwa ni madedo ghako, ela ndechaatala.

²⁰ Kwadima kumsuwiria mkelu kuchumba mundu udedagha malagho kisha kisha usepimagha.

²¹ Mundu umnekagha mdumiki wake kula kindo kufuma wanake ghwake, kutua kwaro uchawuya mundu wa ifwa jake.

²² Mundu wa lubio, wadawusira nganyi, na mundu wa machu wadashekeria makosa mengi ghibonyeke.

²³ Kukujosa kwa mundu, kwadamsera; ela uhu uko na roho ekusera, uchapata ishima.

²⁴ Mngara wa kitoi ookungira wasinyi moni; uchakabwa ukaghora loli kotinyi.

²⁵ Kumuobua mdamu, ni mdegho; ela uo ukusaghikagha na BWANA uchakaia banana.

²⁶ Wandu wengi wadakunda kurumirilwa ni m'bonyi nguma, ela kupata hachi kwadafuma kwa BWANA.

²⁷ Wandu wa hachi wadazamilwa ni wawiwi, na wandu wizamie wadazamilwa ni wandu wa hachi.