MAKATANISHO 24 - Biblia Ilagho Jiboie Kwa Wandu Wose

-19-

¹ Kusakewibonyera iriso wandu wawiwi, hata kuseke na bea ingi ekanya nawo;

² wadaghesha kubonya kinyanya, na kuja malagho ghereda wasi.

-20-

³ Nyumba yadaaghwa kwa hikima, na kumangishwa kwa kumanya.

⁴ Vumba vadachurwa vilambo vose viboie va zoghori mbaa kwa kumanya.

-21-

⁵ Mundu wa hikima oko na kudima kuchumba mundu uwadie ndighi, na mundu uko na kumanya wamchumbie uo uwadie ndighi.

⁶ Wulongozi ghwa hikima ghukudimisha kupanga wuda ghwako, na wanjama wikakaia wengi, wusimi ghuchapatika.

-22-

⁷ Hikima eeka ighu isedimagha kumtambukia mkelu; ndedimagha kudeda ilagho jingi mwandunyi.

-23-

⁸ Mundu opanga kubonya mawiwi, uchawangwa mundu wa ndasanya.

⁹ Kula mpango ghuririkanywagha ni mkelu, ni kaung'a, na mundu odema sare wadazamia wandu.

-24-

¹⁰ Kukazimia ngelo ya wasi, ndekuwadie ndighi.

-25-

¹¹ Wivuvuo awo wawuyaghenjwa kifonyi, wiwadie awo wawuyakuwa kungia cha kubwaghonyi.

¹² Mkaghamba wei ndemmanyire ilagho jingi, muaghesha uo upimagha ngolo ra wandu ndewuewona? Huwo uo umanyagha ngolo renyu ndewuemanya? Huwo ndechaalipa mundu karakara na kazi rake anguwada?

-26-

¹³ Jaa wuki mwana wapo, ghwaboie; matanda gha mando gha choki ghasingie.

¹⁴ Kumanye hikima eeka huwo rohonyi kwako; kukaipata, kuchakaia nicha ngelo richagha, na isuwirio jako ndejichaalaghaya anduangi.

-27-

¹⁵ Kusakelaliria muzi ghwa mundu wa hachi seji kooka mmbiwi; kusakebara muzi ghwake,

¹⁶ angu mundu wa hachi wadaaghwa mando mfungade na kuwuka sena, ela wawiwi wadatota kwa kupatwa ni ndengwa.

-28-

¹⁷ M'maiza wako ukaghwa kuseboilo, hata ukaghwa kuseseke,

¹⁸ BWANA usechewona na kuzamilwa, nao uhoreshe machu ghake usemkabe.

-29-

¹⁹ Kuseje wasi kwa wundu ghwa wabonyi kiwiwi, hata kusewado ni iriso ja wandu wawiwi,

²⁰ kwa kukaia mundu mmbiwi ndena isuwirio jingi, na taa yake icharima.

-30-

²¹ Mwana wapo, kumuobuo BWANA na mzuri, hata kuseleghe kumsikira ungi wawo;

²² angu wadima kureda wasi ngelo iyo yose. Nani umanyagha kunoneka kuchaafuma kwawo?

Madedo ghamu gha hikima

²³ Agha malagho nagho gheeghorwa ni wandu wa hikima: Kutanya wandu kwa kutalana ndekuboie.

²⁴ Mtanyi umzeragha mundu mmbiwi wei ndena ikosa jingi, uchaewelwa, na kuzamia wandu wose.

²⁵ Ela awo wimkemiagha mmbiwi wichaboilwa; wichapata marasimio mecha.

²⁶ Uo ufunyagha itumbulio ja karakara uawonyera wughenyi ghwa loli.

²⁷ Boisa kiwacha chako, kuwike kula kilambo nicha.

²⁸ Kusakefunya wushahidi ghwa tee aighu ya mmbenyu, hata kusakeghora tee.

²⁹ Kusakeghora, “Agheni unibonyere nigho gheni nichaam'bonya, nichamlipa sa iji koni unibonyere.”

³⁰ Nereidieghe mbuwenyi kwa mghadi, mbuwa ya mizabibu ya mundu usena akili;

³¹ ngawona, mbuwa yose ibukilo ni minjwa; eechulwa ni isaka yose, na wurigha ghwaro ghwa magho ghooghwa andonyi.

³² Niendawona, ngaririkanya; ngapata ifundisho kwa agho niwonie.

³³ Niadungumia katini nikuche mikonu yapo, nilale katinieri nihore.

³⁴ Wukiwa ghuchakuchea sa kiting'a, na kusowekelwa kuchachakuchea sa mundu uwadie maswagha.