MAKATANISHO 23 - Biblia Ilagho Jiboie Kwa Wandu Wose

-6-

¹ Kukasea kidombo kujanya na m'bonyi nguma, kumanyeghe nani mwaseanya kidombo.

² Kamanya kuko njala, kukumazire.

³ Kusekaie na bea mbaa ya manori ghake; yadimika waakudegha navo.

-7-

⁴ Kukaie na hikima; kusekubwaghe na kazi wei kualola mali.

⁵ Kwadima kuriwona, kuwuye kurisowe; riakaia seji raabuka mawawa na kuburuka cha mawingunyi sa indu.

-8-

⁶ Kuseje vindo va mundu uko na wusu, hata kusewado ni bea ingi ya manori ghake.

⁷ Wadima kukuzera kuje, kunyo; ela ngolo yake ndeikwanye na oho; ni muji kuwi.

⁸ Kuchadaika vindo kuvijie, na malagho ghako ghisingie kusindeja ghiwuye gha duu.

-9-

⁹ Kusakeja malagho na mkelu; kwa kukaia uchamenya malagho ghako gha hikima.

-10-

¹⁰ Kuseinje igho ja mwano ghwa kala, hata kusewuse mbuwa ra wana wakiwa.

¹¹ Kwa kukaia BWANA ni mlindiri wawo uko na ndighi, nao uchawidederia.

-11-

¹² Sikiria malagho gha ilimu, kuwade mafundisho, na oho kuchapata kumanya.

-12-

¹³ Kusakesigha kumkania mwana, kukamdama na changu ndefwagha kungi.

¹⁴ Kukamdama na changu, kuchamkira na kifwa.

-13-

¹⁵ Mwanwapo kukakaia na hikima, ini wori nichaboilwa.

¹⁶ Nichazuma kwa kuboilwa, iji nasikira kukideda malagho gha hikima.

-14-

¹⁷ Kusewado ni iriso ja wandu wa kaung'a; ela kufunge ndighi kumuobua BWANA matuku ghose.

¹⁸ Loli kuchapata mecha ngelo ichagha, na isuwirio jako ndejichaalaghaya anduangi.

-15-

¹⁹ Mwana wapo, sikira kukaie na hikima; kulongoze irangi jako nicha.

²⁰ Kuserangane na wawongeri wa divei, na wandu wa lwafuo lwa vindo;

²¹ wawongeri na wandu wa lwafuo wichawuya wakiwa, na mundu olala uchaghenda na marasi.

-16-

²² Kumsikire ndeyo orekuvaeghe, na mayo ukeduaghosia kusemmenye.

²³ Kughuo loli, ela kuseiuze; pata hikima, mafundisho, na kutambukilwa.

²⁴ Ndee wa mwana uko na hachi, oko na kuboilwa; uo um'patagha mwana oko na suku, uchaboilwanya nao loli-loli.

²⁵ Bonya ndeyo na mayo wiboilo; na mayo ukuvae uboilo.

-17-

²⁶ Wika mafundisho ghapo ngolonyi kwako mwanwapo, kunughe mighendo yapo.

²⁷ Malaya ni sa kina chiko ndenyi; muka mseli ni sa ndiwa suse.

²⁸ Wadalaliria sa kiting'a, na kuwibonya womi wengi wisowe wuloli.

-18-

²⁹ Nani uko na bugha? Nani uko na wasi? Nani uko na nganyi? Nani ulalamikagha? Nani ushoghonokagha? Nani utinikilo ni meso?

³⁰ Ni awo winywagha divei kwa ngelo ndacha, na kutima divei ibirie.

³¹ Kusakeizighana seji itinikie ikichemka kikombenyi, na seji imilikagha nicha cha kifunyi.

³² Kutuonyi ichaluma sa choka, na wusungu ghwaro ni sa ghwa mwaropo.

³³ Kuchawonagha vilambo va kighenyi, na akili rako richakubonya kudede kisha-kisha.

³⁴ Kuchakaia sa mundu walala ghadi na ghadi ya bahari, na sa mundu walala aighu mlingotinyi ghwa meli.

³⁵ Kuchaghamba, “Nakabilo, ela sivavirikie; Nabulilo, ela simanyagha. Niwukali niendelola imu?”