MAKATANISHO 22 - Biblia Ilagho Jiboie Kwa Wandu Wose

¹ Irina icha jafwana kuchumba mali nyingi; na kurumirikia kwafwana kuchumba feza angu dhahabu.

² Mzuri wa mali na mkiwa wafwanana kwa ilagho jimweri; wose weeumbwa ni BWANA

³ Mundu uko na suku wadawona ndengwa na kukuika; mkelu wadaghenda imbiri na kungia wasinyi.

⁴ Kukusera na kuobua kwa BWANA kwadareda mali, ishima na irangi.

⁵ Chia ya wawiwi eko na minjwa na shaghala; uo ukulindiagha moni uchakaia kula nayo.

⁶ Mfundishe mwana seji imfwane ukaie; ukazoghua ndechaaliwa.

⁷ Wazuri wa mali wadawibonyera nguma wakiwa; mkopi ni mzumba wa mkopeshi.

⁸ Mundu ukawa kusowa hachi, uchakuwida wasi, na kukoronga wambenyu kuchasia.

⁹ Mundu uko na ishima ucharasimilwa, angu uwaghiagha wakiwa vindo vake.

¹⁰ Mwinje mdemi sare, na nganyi richasia, marashano na madukano ndeghichaakaia.

¹¹ Mundu ukundagha wueli ghwa ngolo na madedo gha mvono, uchakaia mghenyi wa mzuri.

¹² BWANA wadazighana na kuilindia loli, ela wadaghilegha malagho gha watee.

¹³ Mghadi wadakaia nyumbenyi; wadaghamba wei shimba eko shighadi icham'bwagha.

¹⁴ Madedo gha muka mseli ni sa kina chiko ndenyi; mundu ubonyero machu ni BWANA, uchachunukia aho.

¹⁵ Mwana wadakaia na wukelu ngolonyi kwake, ela changu cha mafundisho chichaghufunya.

¹⁶ Mundu umkorongagha mkiwa eri upate kufugha, angu kuneka wazuri wa mali manosi, uchawuya mkiwa.

Malagho gha hikima mirongo idadu

¹⁷ Degha kudu, kusikire malagho gha wandu wa hikima, kukufundishe kwawo.

¹⁸ Malagho agho ghichakuboia kukaghiwika ngolonyi kwako, na kughighora kwa momu ghwako.

¹⁹ Neekunda kumrumirie BWANA, niyo sababu nikughoriagha agha malagho idime.

²⁰ Nameria kukuandikia mifwano mirongo idadu ekuagha na kukuneka kumanya;

²¹ ichakufundisha seji loli iko. Na iji kwadumwa kuilola, kuwiwunjire itumbulio ja loli awandu wikudumie.

-1-

²² Kusakemsoka mkiwa angu wei ni mkiwa; kusakemkoronga mundu usowagha kotinyi.

²³ BWANA uchawidederia, nao uchawiredia wasi awo wawuyawisoka.

-2-

²⁴ Kusebonye wughenyi na mundu wa machu, hata kuseghendanye na mundu wa lubio,

²⁵ kuchekufundisha tabia rake na kukungira mdeghonyi.

-3-

²⁶ Kusekaie mdhamini wa sile ya mndungi.

²⁷ Kukalemwa ni kulipa wichawada hata wuli ghwako.

-4-

²⁸ Kuseinje mwano ghwa kala ghuwikilo ni weke ndeyo.

-5-

²⁹ Kwawuyammbona mundu uichi kazi yake? Uchadumikia wazuri, ndechaadumikia wandu wa ndonyi anduangi.