MAKATANISHO 21 - Biblia Ilagho Jiboie Kwa Wandu Wose

¹ Ngolo ya mzuri eeka sa kamoda ka machi mikonunyi kwa BWANA; wadaghilongoza sa iji ukundagha moni.

² Kula mundu wadawona seji ooka nicha, ela BWANA wadapima ngolo.

³ BWANA wadawirumiria awa wibonyagha hachi na loli, kuchumba kufunya kizongona.

⁴ Wandu wawiwi wadalongozwa ni lubando, na kukujosa, na iyo ni kaung'a.

⁵ Wandu wibonyagha mipango kwa wuya, loli wadapata kwa wungi; ela awo wibonyagha na iseghe, wadasowa.

⁶ Kushama kwa wukalo kuchasia shwa wori, na kuwuya mdegho ghwa kifwa.

⁷ Lung'eto lwa wandu wawiwi, luchawiinja noko; kwa kukaia wadalegha kubonya hachi.

⁸ Chia ya mundu wa makosa eezama, ela tabia ya mundu mucha yaboie.

⁹ Baa kukaia aighu mbembenyi ya ipaa ja nyumba kuchumba kukaia nyumbenyi mbaa na muka wa lubio.

¹⁰ Mundu mmbiwi wadakunda wuwiwi; ndena wughoma na mmbao.

¹¹ Mundu odema sare ukanekwa ikabo, mkelu wadapata hikima; mundu wa hikima ukefundishwa uapata kumanya.

¹² Mlungu wa hachi waichi agho ghawuyabonyeka nyumbenyi kwa mmbiwi; mmbiwi uchanonwa.

¹³ Mundu uleghagha kusikira kililo cha mkiwa, uo moni wori uchakema nao ndechaasikirwa ni mndungi.

¹⁴ Inosi ja kiviso jadahoresha machu, na ituwo ja kiviso yadahoresha lubio.

¹⁵ Loli ikabonywa, mundu wa hachi wadaboilwa, ela kwa mundu mmbiwi, ni waya.

¹⁶ Mundu ughendagha kula na chia etambukilwa, uchafwa uendekanya na wafu.

¹⁷ Mundu ukundagha maseko, uchawuya mkiwa; uo ose ukundagha divei na mavuda ndechaashama jingi.

¹⁸ Mmbiwi uchakuredia moni wasi, ugho watimagha kumredia mundu wa hachi.

¹⁹ Ni baa kukaia ikarenyi, kuchumba kukanya na muka wa lubio na lukongodo.

²⁰ Mali ra zoghori mbaa reeka nyumbenyi kwa mundu wa hikima, ela wakelu wikaripata wadaritumia kwa shwa-shwa.

²¹ Uo unughagha hachi na wughoma, uchawona irangi na ishima.

²² Mundu wa hikima wadaghukaba muzi ghwa wandu wiwadie ndighi, na kurivuchua ngome wawuyakusaghika naro.

²³ Mundu umaziriagha lumi lwake na momu ghwake uchakutanya na malagho.

²⁴ Mundu wa nganyi ukukasire, irina jake ni “Mdemi sare.” Wadabonya malagho kwa kukukasa kuchumbie.

²⁵ Mghadi usekunde kubonya kazi, uchakubwagha moni.

²⁶ Mmbiwi uasindabwaghwa ni choyo; mhachi wadaneka hata ndeimagha.

²⁷ Kizongona cha mundu mmbiwi ndechiboie; ni kuchumba saki, ukachireda na nia mbiwi!

²⁸ Wushuhuda ghwa tee ghuchasia, ela ilagho ja mundu usikiragha jichadua.

²⁹ Mundu mmbiwi wadakubonya wei uabonya kazi, ela mundu mucha wadabonya agho ughipimie nicha.

³⁰ Ndekuwadie hikima, angu kumanya, angu njama ingi idimagha kusimana na BWANA.

³¹ Farasi yadawikwa nicha kwa wundu ghwa ituku ja wuda, ela wusimi ni ghwa BWANA.