MAKATANISHO 20 - Biblia Ilagho Jiboie Kwa Wandu Wose

¹ Divei yadareda lumenyo, na chofi yadareda marashano; mundu uwadanagha nayo, ndene hikima.

² Machu ghioboshagha gha mzuri, ni sa kururuma kwa shimba; mundu ukam'bonya ujoko ni machu, wadalaghasha irangi jake.

³ Mundu ukainjikia nganyi, uchakaia na ishima; ela kula mkelu uchakaia ukirashana.

⁴ Mghadi uselimagha kwa ngelo yaro, ndechaapata kindo chingi ngelo ekuwida.

⁵ Maririkanyo gha mundu gheeka sa machi gha kisima ghimilie; mundu utambukilwagha uchaghidaya.

⁶ Wandu wengi wadakunda kukuwonyera seji wiko waloli; ela nani udimagha kumpata mundu uko mloli?

⁷ Mundu wa hachi, ughendagha nicha, wana wake wicharasimilwa nyuma yake.

⁸ Mzuri ukakaria kifumbi chetanya, wadasasawua makosa ghose ughiwonagha.

⁹ Nani udimagha kughamba, “Naelie, siwadie kaung'a?”

¹⁰ BWANA wadazamilwa ni wandu witumiagha vipimo va tee.

¹¹ Hata mwana moni wadamanyika kwa mabonyo ghake seji ubonyagha ngera ghaboie na ni gha hachi.

¹² BWANA wadinekie madu ghesikira na meso ghewona.

¹³ Kusakeboilwa ni kulala, kuchewuya mkiwa; bonya kazi na oho kuchakaia na vindo vingi.

¹⁴ Mghui wadazughunukia ighuri ukighua, ela ukaghenda noko wadakukasa seji waghua.

¹⁵ Dhahabu eko aeni loli, na magho mengi gha zoghori mbaa; ela madedo ghiboie, ni lulu ya zoghori mbaa.

¹⁶ Mundu ukakufunya kukaia mdhamini wa mundu mghenyi, kuwadie nguwo yake; kummbwade ubonye ighemi iji wakufunya kukaia mdhamini wa waghenyi.

¹⁷ Vindo vipatiro kwa mikalo vasingia mundu, ela konyuma, vichakaia shangado momunyi kwake.

¹⁸ Mipango yadamangishwa ni njama ndicha; kusezoye wuda kusebonyere mipango.

¹⁹ Mundu wa malagho mengi wadaghora ngasu; kwa huwo kusakekuranganya na mndungi udedagha wukelu.

²⁰ Mundu ukamuewia ndee angu mae, irangi jake jichasia sa taa yarimishwa kirenyi.

²¹ Mali ripatikie kwa shwa-shwa, nderichaakaia na irasimio jingi kutuonyi.

²² Kusakelipia ikosa kwabonyerwa; weseria BWANA uchakutesia.

²³ BWANA wadazamilwa ni wandu witumiagha vipimo va tee, na ratili ra tee, nderim'boiagha.

²⁴ Mundu wadalongozwa ni BWANA; udima wada kumanya seji irangi jake jichaakaia?

²⁵ Ririkanya nicha imbiri kusebonyere ilaghiro ja mafunyo kwa Mlungu; konyuma kwadima kujuta.

²⁶ Mzuri uko na hikima wadasasawua wawiwi, na kuwineka ikabo ibaa.

²⁷ Roho ya mdamu ni taa ya BWANA; yadalangala kondenyi kwake.

²⁸ Hachi na loli yadam'bonya mzuri uduo ukibonya nguma; wuzuri ghwake ghwamazirwa ni hachi.

²⁹ Wandu wa irika wadakukasa na ndighi rawo, ela kughoka kwa waghosi ni imbu rawo.

³⁰ Makabo gheshoghonua ghadaelesha wuwiwi; vangu vadaelesha nandenyi.