MAKATANISHO 16 - Biblia Ilagho Jiboie Kwa Wandu Wose

¹ Mipango ya ngolonyi ni ya mdamu, ela matumbulio gharo ghadafuma kwa BWANA.

² Mdamu wadawona chia rake rose kukaia ni ndicha, ela BWANA nuo uichi ngolo.

³ Kumsighie BWANA kazi rako, nao uchaikatisha mipango yako.

⁴ BWANA oobonya maza rose kukatisha makusudi ghake, hata wawiwi weewikwa kwa ituku ja wasi.

⁵ BWANA wadazamilwa ni kula mundu ukujosagha moni; kwa loli ndechaasowa ikabo.

⁶ Kwa chia ya lukundo na wuloli, kaung'a yalekelwa; kwa chia ekaia na kuobua kwa BWANA, mundu wawikwa kula na wuwiwi.

⁷ Mundu ukakaia na mighendo im'boiagha BWANA, uchabonya hata wamaiza wake wikaie na sere nao.

⁸ Baa kukaia na vitini va hachi, kuchumba pesa nyingi risena hachi.

⁹ Mdamu wadakupangia chia rake moni, ela BWANA nuo umlongozagha.

¹⁰ Mzuri wadadeda malagho kwa nguma ya Mlungu; malagho udumbuagha matuku ghose ni gha hachi.

¹¹ BWANA wadakunda ratili rose na vipimo varo vikaie va loli, na icho chose chiuzwagha chikaie cha hachi.

¹² Mzuri wadazamilwa ni kubonya mawiwi; angu wuzuri ghwadamangishwa ni hachi.

¹³ Mzuri wadaboilwa ni madedo gha loli; wadaboilwa ni mundu ughoragha loli.

¹⁴ Mzuri ukajokwa ni machu wadima kubwagha mundu, mundu uko na hikima uchaghihoresha.

¹⁵ Mzuri ukazighana na wushu ghuelie ni irangi wurumirio ghwake ni sa iwingu jiredagha vua ya kimu.

¹⁶ Kupata hikima kwaboie, kwachumba dhahabu, na kutambukilwa kuchumba feza.

¹⁷ Mundu mucha wadalegha chia mbiwi, uo ulindiagha mighendo yake wadajilindia irangi jake.

¹⁸ Kukujosa kwadareda kunoneka; na roho ya lumenyo yadareda kughwa.

¹⁹ Baa kukaia na roho ekusera chiaimweri na wakiwa, kuchumba kuwagha vilambo vidwalo wunyika chiaimweri na wandu wikukasagha.

²⁰ Mundu usikiriagha mafundisho uchakaia nicha; uo umrumiriagha BWANA uchaboilwa.

²¹ Mundu uko na ngolo ya hikima, wadawangwa mundu utambukilo; madedo ghiboie ghadaruda wandu.

²² Hikima ni ndoria ya irangi kwa uo uko nayo; wukelu ni ikabo ja wakelu.

²³ Akili ra mundu wa hikima radam'bonya udede malagho gha akili; madedo ghake ghadaruda wandu.

²⁴ Madedo ghiboie gheeka sa mando gha choki, ghareda kusinga rohonyi na wubanana mumbinyi.

²⁵ Eko chia iwonekagha kwa mdamu kukaia ndicha, ela kutua kwaro ni chia ya kifwa.

²⁶ Bea ya mpakazi yadamdumikisha; ookunda kuinja njala yake.

²⁷ Mundu wa kisha wadabonya njama mbiwi; madedo ghake ni sa modo ghukoragha.

²⁸ Mundu mmbiwi wadaeresha nganyi, mundu ohohoria wadatenga mundu na mghenyi wake.

²⁹ Mundu otumia ndighi wadamkalia mmbao, umnughe kwa chia rake riseboie.

³⁰ Mundu okunyiria na meso, wadabonya mipango elaghasha, uo umaziriagha lumi lwake wadabonya mawiwi ghisie.

³¹ Chongo chielie imbu, ni kirumbu cha wubaa; chadapatwa kwa kukaia na irangi ja hachi.

³² Mundu usejokwagha ni machu shwa-shwa, waboie kuchumba ing'oni ja wuda; uo ukumaziriagha moni, wachumba, uo uwadagha muzi wudenyi.

³³ Wandu wadakaba kura, emanya lukundo lwa Mlungu, ela BWANA nuo ufunyagha matumbulio.