MAKATANISHO 15 - Biblia Ilagho Jiboie Kwa Wandu Wose

¹ Itumbulio ja wumboa jadahoresha machu, ela itumbulio jibirie jadawusira machu.

² Madedo gha mundu wa hikima ghadareda kumanya, ela madedo gha wakelu ghadareda wukelu.

³ BWANA wadawona kula andu; wadamzighana mmbiwi na mucha.

⁴ Madedo mecha ni sa mudi ghwa irangi; ela madedo ghizamie ghadanona ngolo.

⁵ Mkelu wadamenya mafundisho gha ndee, ela uhu usikiragha mawonyero, wawadie suku.

⁶ Mundu wa hachi oko na mali nyingi nyumbenyi kwake, ela mapato gha mundu mmbiwi ghadamredia wasi.

⁷ Wandu wa hikima wadaeresha kumanya, ela wakelu ndewibonyagha huwo.

⁸ Vizongona va mmbiwi vadamzamia BWANA, ela ilombi ja mundu mucha jadam'boia.

⁹ Mighendo ya mmbiwi yadamzamia BWANA, ela wadamkunda mundu unughagha hachi.

¹⁰ U mundu usighagha chia ya Mlungu uchapatwa ni ikabo ibaa; mundu uzamilwagha ni kuwonyerwa makosa uchafwa.

¹¹ BWANA waichi kula ilagho jiko hata Andu kwa Wafu, ni kuchumba saki Mlungu kumanya ngolo ra wandu!

¹² Mundu omenya ndeboilwagha ni kuwonyerwa makosa; ndelolagha njama kwa mundu wa hikima.

¹³ Ngolo ikaboilwa na wushu ghuaela; kujighwa ni ngolo kwadareda wasi.

¹⁴ Mundu utambukilwagha wadalola kumanya; wakelu wada-wada maza ra wukelu.

¹⁵ Matuku ghose gha mundu otirirwa gheezama, ela mundu uelelo ni ngolo wadaboilwa matuku ghose.

¹⁶ Ni baa kukaia na vitini kukimuobua BWANA, kuchumba mali nyingi chiaimweri na wasi.

¹⁷ Ni baa kuja mbogha ra malemba kukikaia na lukundo, kuchumba kuja manori gha ng'ombe kukikaia kuzamilo.

¹⁸ Mundu wa machu wadawusira nganyi, ela mundu wa mboa wadahoresha nganyi.

¹⁹ Mighendo ya mghadi kari kose ni ya wasi; mighendo ya mundu mucha ndeiwadie wasi ghungi.

²⁰ Mwana uko na hikima, wadaredia ndee kuboilwa, ela mkelu wadammenya mae.

²¹ Mundu usene akili wadaboilwa ni wukelu, ela uo utambukilwagha wadabonya agho ghiko gha hachi.

²² Mipango isene njama yadaenda kiwiwi, ela wanjama wikakaia walazi, yadakaia nicha.

²³ Kutumbulia nicha kwadamredia mundu kuboilwa, na ilagho jadedwa kwa ngelo yaro jaboie nandighi.

²⁴ Chia ya mundu wa hikima, yadalongoza nokoighu cha iranginyi; usechesea nokondonyi cha Andu kwa Wafu.

²⁵ BWANA wadavuchua nyumba ya mundu ukukasire, ela uchaghulindia muzi ghwa muka mkiwa.

²⁶ Maghesho gha mundu mmbiwi ghadamzamia BWANA, ela wadaboilwa ni malagho gha mundu uelie.

²⁷ Mundu ushamagha kuseko na hachi, wadairedia nyumba yake wasi; uo uzamilwagha ni hongo uchakaia moyo.

²⁸ Mundu wa hachi wadaririkanya seji utumbuliagha, ela mundu mmbiwi wadadeda malagho ghizamie shwa-shwa.

²⁹ BWANA wadakaia kula na wandu wawiwi, ela wadasikira ilombi ja mhachi.

³⁰ Kuzighana kuboie kwadareda kuboilwa, na malagho mecha ghadareda wubanana.

³¹ Uhu usikiragha mawonyero, uchakanya na wandu wa hikima.

³² Uo usetalagha mafundisho, wadakumenya moni; ela uo usikiragha mawonyero, uchapata kutambukilwa.

³³ Kuobua kwa BWANA kwadafundisha mundu hikima, suti mundu ukusere imbiri usenekelo.