MAKATANISHO 14 - Biblia Ilagho Jiboie Kwa Wandu Wose

¹ Muka uko na hikima wadaagha nyumba yake; mkelu, wadaivuchua na mikonu yake moni.

² Mundu ughendagha nicha, wadamuobua BWANA, ela uo ughendagha kiwiwi, wadammenya.

³ Mkelu ukukasire wadadeda madedo mengi, ela madedo gha wandu wa hikima ghadawilindia.

⁴ Andu ng'ombe riseko andu kwawo kojia kooka kuduu, ela sena viro vingi vadacha kwa kulima na ng'ombe.

⁵ Mshahidi wa loli ndetumiagha tee, ela mshahidi wa tee, wadaghora tee.

⁶ Mundu wa lumenyo wadalola hikima useipatagha, ela mundu otambukilwa, ndemukaa kumanya.

⁷ Kusekanye na mkelu, ndedimagha kukufundisha ilagho jingi.

⁸ Mundu uwadie suku wadapanga malagho ghake kwa hikima; wukelu ghwa wakelu ni mikalo.

⁹ Wakelu wikeduabonya kaung'a ndewitalagha, ela wandu wecha wadakunda kufuilwa wughoma.

¹⁰ Mundu wadamanya luwawo lwake moni; hata kuboilwa kwake ndewaghanagha na mndungi.

¹¹ Nyumba ya mmbiwi ichanonwa, ela hema ya mhachi ichadua.

¹² Eko chia iwonekagha kukaia ndicha kwa mundu, ela kutua kwaro ni chia ya kifwa.

¹³ Ngolo yadima kukaia na luwawo mundu ukiseka, na kuboilwa kukasia wasi ghuandelia.

¹⁴ Mundu mmbiwi uchaja matunda gha mabonyo ghake, na mundu uboie uchaja matunda gha mabonyo ghake.

¹⁵ Mkelu wadarumiria maza rose, ela mundu uwadie suku wadazighana seji ughendagha.

¹⁶ Mundu wa hikima wadakulindia na kukutanya na wuwiwi, ela mkelu ndekuwadiagha hata ndetalagha.

¹⁷ Mundu ojokwa ni machu shwa-shwa, wadabonya kiwukelu, ela mundu uwadie suku wadarumaghia.

¹⁸ Wandu wisewadie kumanya wadawasirwa wukelu, ela wandu wiwadie suku wadachulwa ni kumanya.

¹⁹ Wandu wawiwi wadawighoghomia wandu wecha; wichaghoghoma mbengenyi imbiri ya wahachi.

²⁰ Mkiwa ndekundwagha hata ni mumzawo moni, ela mzuri wa mali oko na waghenyi wengi.

²¹ Uo ummenyagha mmbao, ni mkaung'a, ela uo ummboniagha mkiwa wughoma, uchaboilwa.

²² Welee, wandu wibonyagha mipango ya wuwiwi ndawadakosa? Ela awo wibonyagha mipango iboie wadapata kukundwa na kurumirilwa.

²³ Kubonya kazi koko na fwaida, ela madedo maduu ghadareda wukiwa.

²⁴ Mali ra wandu wa hikima ni kirumbu chawo, ela wukelu ni mafungu gha wakelu.

²⁵ Mshahidi wa loli wadakira marangi, ela uhu ughoragha tee, wadakalia.

²⁶ Uhu umuobuagha BWANA uchalindilwa, na wana wake wichakaia banana.

²⁷ Kuobua kwa BWANA ni ndoria ya irangi, kuam'bonya mundu ukaie kula na midegho ya kifwa.

²⁸ Mzuri wadakaswa iji uko na wandu wengi; kamanya wiseko, ndeufwanagha.

²⁹ Mundu uko wa mboa kubonya machu oochulwa ni kumanya, ela mundu obonya machu shwa-shwa, uawonyera wukelu ghwake.

³⁰ Kukaia na sere kwadabonya mumbi ghukaie banana, ela kubonya iriso ni sa chonda cha ghilimi.

³¹ Mundu umkorongagha mkiwa, uamdukana Muumbi wake, ela uhu ummboniagha wughoma, wadam'bonyera Mlungu ishima.

³² Mmbiwi wadanonwa ni agho mawiwi ughibonyere, ela mundu wa hachi wadalindilwa ni wucha ghwake.

³³ Mundu uko na suku oochulwa ni hikima chia rose; wakelu ndewimanyagha hikima anduangi.

³⁴ Hachi yadaredia waisanga ishima, ela kaung'a yadaredia wandu wose waya.

³⁵ Mzuri wadaboilwa ni mdumiki uko na hikima, ela wadamneka ikabo mdumiki ubonyagha malagho gha waya.