MAKATANISHO 13 - Biblia Ilagho Jiboie Kwa Wandu Wose

¹ Mwana uko na hikima wadasikira mafundisho gha ndee, ela uo umenyagha, ndesikiragha kuja kukanilwa.

² Mundu wadapata mecha kunughana na madedo ghake, ela mundu ukalie, wadakunda wuda.

³ Mundu ulindiagha madedo ghake, wadalindia irangi jake; mundu wa malagho mengi, wadanoneka.

⁴ Mghadi wadakunda vilambo, ela ndepatagha, ela mundu uko ing'oni kazinyi, wadapata kula kilambo uchikundagha kwa wungi.

⁵ Mundu wa hachi wadazamilwa ni tee, ela mundu mmbiwi wadabonya malagho gha waya ghisene ishima.

⁶ Hachi yadamlindia mundu mucha, ela wuwiwi ghwadamghusha mkaung'a.

⁷ Mndumu uakubonya mzuri wa mali, usewadie kindo chingi; umu uakubonya mkiwa, sena uko na mali nyingi.

⁸ Mundu wadima kutumia mali rake kukombua irangi jake, ela mkiwa ndeoboshwagha ni ilagho jingi.

⁹ Mhachi ooka sa mwengere ghung'alaa-ng'ala kwa ndighi, ela taa ya mmbiwi icharimishwa.

¹⁰ Kukujosa kwadareda marashano, ela awo wiwadagha mafundisho, weko na hikima.

¹¹ Mali ripatiro kwa chia iseko na hachi ichapungua, ela uo utumbanyagha kutini kutini ucharichuria.

¹² Isuwirio jikasia, ngolo yadawuya mkongo; bea ikakatishwa, ni sa mudi ghwa irangi.

¹³ Mundu omenya malagho, wadakutotesha moni, ela uo utalagha malaghiro, uchapata malipo.

¹⁴ Mafundisho gha mundu wa hikima, ni ndoria ya irangi; ghichamtesia mundu kukulindia na mdegho ghwa kifwa.

¹⁵ Maghesho ghiboie ghadam'bonya mundu urumirilo, ela kusowa wuloli kwadareda kunoneka.

¹⁶ Kula mundu uwadie suku, wadabonya malagho nicha, ela mkelu wadafunukua wukelu ghwake.

¹⁷ Mdumwa mmbiwi wadaredia wandu wasi, ela mdumwa mucha wadaredia wandu sere.

¹⁸ Kumenya mafundisho kwadareda wukiwa na waya, ela uo usikiragha mafundisho, uchanekwa ishima.

¹⁹ Kupata icho kuchikundeghe, kwadareda kuboilwa, ela wakelu wadalegha kughaluka kufuma wuwiwinyi.

²⁰ Mundu uwadanagha na wandu wa hikima, uchawuya mundu wa hikima; ela uo uwadanagha na wakelu uchavavirika.

²¹ Wakaung'a wadanughwa ni wasi kula andu, ela wahachi wadapata mafungu mecha.

²² Mundu mucha wawisighiagha weke wawae ifwa, ela mali ya mkaung'a yadawikilwa mhachi.

²³ Mbuwa ya mkiwa yadima kuva mavalo mengi, ela kusowa hachi kwadameria ivo vindo.

²⁴ Mundu usetumiagha changu, ndemkunde mwana wake, ela uo umkunde mwana wake, wadamdama.

²⁵ Mundu wa hachi wadaja ughude, ela mmbiwi wadakaia njala.