MAKATANISHO 12 - Biblia Ilagho Jiboie Kwa Wandu Wose

¹ Uo ose ukundagha kumanya, wadaboilwa ni kuwonyerwa makosa. Mundu uzamilwagha ni kufunywa makosa, ni mkelu.

² BWANA wadaboilwa ni mundu mucha; ela wadamtanya mundu wa njama mbiwi.

³ Wuwiwi ndeghutesiagha mndungi, ela mhachi ndenyavurikagha jingi.

⁴ Muka mucha ni kirumbu cha mumi wake; ela muka ofusha waya ni sa chonda cha ghilimi kwa mumi wake.

⁵ Maghesho gha mundu wa hachi ni gha loli, ela njama ra wawiwi, ni rekalia.

⁶ Madedo gha wawiwi ghadabwagha wandu, ela madedo gha wandu wecha ghadakira wandu.

⁷ Wawiwi wadasimwa na kumerelwa, ela nyumba ya mhachi ichadua.

⁸ Mundu uko na hikima wadakaswa, ela mkelu wadamenywa.

⁹ Mundu wa ndonyi ukudumikiagha moni oko baa, kuchumba mundu m'baa usena vindo.

¹⁰ Mundu wa hachi wadaitala nyamandu yake, ela mmbiwi ndena wughoma nayo.

¹¹ Mundu ulimagha ndoe yake uchapata vindo kwa wungi, ela uo unughanagha na malagho gha duu, ndewadie akili.

¹² Wawiwi wadaboilwa ni kuwona wawiwi wambao wikisoka, ela mundu wa hachi wadakaia umange usenyavurikagha.

¹³ Mundu mmbiwi wadawadwa ni madedo ghake moni, ela mundu wa hachi wadafuma andenyi ya ugho wasi.

¹⁴ Mundu wadapata mecha kunughana na madedo ghake, sa iji koni upatagha mafungu gha kazi yake.

¹⁵ Mkelu wadakurumiria moni, ela mundu wa hikima wadasikiria mawonyero.

¹⁶ Mkelu ukajokwa ni machu, wadakuwonyera moni shwa wori, ela mundu uko na suku wadaghinyamia madukano kima.

¹⁷ Mundu wa loli, wadafunya wushahidi ghwa loli, ela mshahidi wa tee wadatumia mikalo.

¹⁸ Madedo ghibirie ghadadunga sa lufu, ela madedo gha mundu wa hikima ghadahoresha.

¹⁹ Madedo gha loli ghadadua, ela madedo gha tee ni gha ngelo ndini.

²⁰ Wandu wa mipango ya wuwiwi wadakaia na tee ngolonyi kwawo, ela awo wipimagha malagho gha sere, wadareda maboilo.

²¹ Wahachi ndewipatwagha ni ilagho jingi iwiwi, ela wawiwi wadachulwa ni wasi.

²² BWANA wadazamilwa ni watee, ela wadaboilwa ni awo wiko waloli.

²³ Mundu uko na suku ndekuwonyeragha moni, ela wakelu wadaeresha wukelu ghwawo.

²⁴ Mundu uko ing'oni kazinyi uchawuya m'bonyi nguma; mghadi uchawuya mzumba.

²⁵ Kukambwa ni chongo kwadainja sere ngolonyi, ela ilagho icha jadareda kuboilwa.

²⁶ Mundu wa hachi wadalongoza mmbao, ela chia ya wawiwi ichawilaghasha.

²⁷ Mghadi ndewurushagha kindo chingi, ela mundu uko ing'oni kazinyi, uchapata mali ya zoghori mbaa.

²⁸ Chia ya hachi eko na irangi, ela chia mbiwi iaghenja kifonyi.