MAKATANISHO 11 - Biblia Ilagho Jiboie Kwa Wandu Wose

¹ BWANA wadazamilwa ni wandu witumiagha ratili ra tee; ela wadaboilwa ni wandu witumiagha vipimo va loli.

² Kukukasa kwadareda kusowelwa ishima; ela kukusera kwadareda hikima.

³ Wandu wecha wadalongozwa ni wucha ghwawo, ela kusowa wuloli kwa wandu wikalie kuchawitotesha.

⁴ Mali nderine fwaida ngelo ekabwa ni Mlungu, ela hachi yakiragha mundu na kifwa.

⁵ Wuloli ghwa mundu ghwadamghenja nicha, ela mundu mmbiwi wadaghushwa ni wuwiwi ghwake.

⁶ Wandu wecha wadakirwa ni wucha ghwawo, ela wandu wa mikalo wadabonywa wazumba ni bea rawo.

⁷ Mundu mmbiwi ukafwa, isuwirio jake jadasia; kuwesera kwa mundu usemuichi Mlungu ndekumnekagha kindo chingi.

⁸ Mundu wa hachi wadakirwa na maza rizamie, ela mundu mmbiwi wadawunjirwa iro maza mbiwi.

⁹ Mundu usemuichi Mlungu wadima kumnona mmbao kwa madedo ghake, ela wahachi wadakirwa ni kumanya kwawo.

¹⁰ Wahachi wikapata mecha muzi ghwadakaia na kuboilwa; wawiwi wikatota wandu wadazuma.

¹¹ Muzi ghwadakaia m'baa kwa kurasimilwa ni wahachi, ghwadanonwa ni madedo gha wawiwi.

¹² Mundu ummenyagha mmbao, oosowa akili, ela mundu uelelo wadanyama kima.

¹³ Mundu osongoda-songoda ndelindiagha malagho, ela mundu uelelo, wadanyamia malagho.

¹⁴ Mbari ikasowa wulongozi yadaghwa; andu wanjama wiko wengi, wubanana ghoko.

¹⁵ Mundu ukaiagha mdhamini wa mghenyi uchapata wasi, ela uo uleghagha, uchakaia banana.

¹⁶ Muka wa wughoma, wadanekwa ishima; wakinyanya, wadapata mali.

¹⁷ Mundu ukakaia na wughoma, ni fwaida kwake; ela mkinyanya wadakushoghonua moni.

¹⁸ Mundu mmbiwi wadapata mafungu gha mikalo yake, ela uo ubonyagha hachi oko na loli epata mafungu mecha.

¹⁹ Mundu uduagha ukibonya hachi uchakaia moyo, ela uo unughagha wawiwi uchafwa.

²⁰ BWANA wadazamilwa ni wandu wa maghesho ghizamie, ela wadaboilwa ni awo wisewadie ikosa.

²¹ Manya loli kukaia, mundu mmbiwi ndechakaia usekabilo, ela awo wiko na hachi, wichalekerelwa.

²² Muka ughokie usewadie suku, ooka sa pete ya dhahabu mbuonyi kwa nguwe.

²³ Kukunda kwa mundu wa hachi kwadasia kwa wucha, ela kusuwiria kwa mmbiwi kwadatua na machu.

²⁴ Mndumu uakaia na ishima jeneka mali rake, na ii chia mali riachurikia kuchumba; umu ualegheria, na ii chia uawuya mkiwa na kuchumba.

²⁵ Mundu unekagha wandu, uchafughishwa; uo uhoreshagha wandu nao moni uchahoreshwa.

²⁶ Mundu ulegheriagha viro wadaewelwa ni wandu, ela uhu uuzagha wadarasimilwa.

²⁷ Uo ulolagha wucha kwa kufunga ndighi, wadapata; uo ulolagha kiwiwi, uchachiwona.

²⁸ Uo ukusaghikagha na mali rake, richasia, ela mhachi, uchadeghedeka sa ilemba iwishi.

²⁹ Uo usumbuagha wandu wa nyumba yake, ndechaapata kindo chingi; mkelu uchakaia mdumiki wa mundu wa hikima.

³⁰ Mabonyo gha mhachi ghadareda irangi; kulegha sharia kwadareda kifwa.

³¹ Ikakaia mhachi ualipilwa ahaeni ndoenyi, mundu mmbiwi na mkaung'a wilipwa saki!