MAKATANISHO 10 - Biblia Ilagho Jiboie Kwa Wandu Wose

Makatanisho gha Solomoni

¹ Agha ni makatanisho gha Solomoni: Mwana uko na hikima wadam'bonya ndee uboilo, ela mwana mkelu, wadamredia mae wasi.

² Mali ishamilo kwa wuwiwi, ndeiredagha fwaida; ela hachi yadakira na kifwa.

³ BWANA ndemsighagha mhachi ukaie njala, ela wadamghiria mmbiwi usepate icho ukunde.

⁴ Wughadi ghwadareda wukiwa, ela kufunga ndighi kwadafughisha.

⁵ Mwana ukuwidagha na sumesu, oko na suku, ela uo ulalagha ngelo ekuwida uafusha waya.

⁶ Mhachi wadarasimilwa, ela madedo gha mmbiwi ghadareda wuda.

⁷ Kuwikumbuka wahachi ni irasimio, ela irina ja mmbiwi jichaliwika.

⁸ Mundu wa ngolo ya hikima, wadawusa malaghiro; ela mkelu osongoda, uchanoneka.

⁹ Mundu ughendagha nicha, uchakaia banana, ela mundu useko mloli, uchamanywa.

¹⁰ Mundu owika malagho wadareda wasi, ela uo ukemiagha worinyi wadareda sere.

¹¹ Madedo gha mhachi ni ndoria ya irangi, ela madedo gha mmbiwi ghadareda wuda.

¹² Kuzamiana kwadareda nganyi, ela lukundo lwadafuya wughoma makosa ghose.

¹³ Mundu utambukilwagha, wadadeda malagho gha hikima; ela mundu usetambukilwagha oofwana udamo na zobo.

¹⁴ Wandu wa hikima weko na kumanya, ela madedo gha mkelu ghadanona.

¹⁵ Mali ra mundu mzuri ni saghi yake; mkiwa uabwaghwa ni wukiwa ghwake.

¹⁶ Mafungu gha mundu wa hachi ghiamlongoza cha iranginyi; fwaida ra mmbiwi riamlongoza cha kaung'enyi.

¹⁷ Mundu usikiragha mafundisho, uchakaia moyo; ela uo uleghagha kukemelwa, uchalaghaya.

¹⁸ Uo uvisagha kuzamilwa kwake ni mtee, na uo ughendagha ukija malagho gha tee ni mkelu.

¹⁹ Malagho ghikakaia mengi, ndeghisowagha kaung'a; mundu usededagha malagho mengi oko na hikima.

²⁰ Madedo gha mundu wa hachi ni sa feza ieleshero; maghesho gha mundu mmbiwi ndeghine fwaida.

²¹ Malagho gha mundu wa hachi ghadawitesia wandu wengi, ela wakelu wafwagha kwa kusowa akili.

²² BWANA nuo umrasimiagha mundu uwuye mzuri wa mali; ndemsighagha uje wasi kwa wundu ghwaro.

²³ Mkelu wadaboilwa ni kubonya mawiwi; mundu utambukilwagha wadaboilwa ni tabia ya hikima.

²⁴ Icho mundu mmbiwi uchiobuagha nicho cheni chichaamchea, ela mhachi uchanekwa icho uchikunde.

²⁵ Kiremba chikacha chadamduka mmbiwi, ela mhachi wadakaia umange kari kose.

²⁶ Mghadi wadareda wasi kwa uo umdumagha, seji siki ivaviragha maghegho na mosi ghuvaviragha meso.

²⁷ Kuobua kwa BWANA kwadachuria matuku; matuku gha mmbiwi ni matini.

²⁸ Isuwirio ja mundu wa hachi jadamvikisha kuboilonyi, ela kuwesera kwa mundu mmbiwi ndekumnekagha kindo chingi.

²⁹ BWANA wadamlindia mundu wa hachi, ela wadawitotesha awo wibonyagha mawiwi.

³⁰ Mhachi ndechaainjwa jingi, ela mmbiwi ndechaadua isangenyi.

³¹ Mundu wa hachi wadadeda malagho gha hikima, ela lumi lodeda malagho ghizamie luchanyamirishwa.

³² Mundu wa hachi waichi madedo gherumirilwa, ela mundu mmbiwi wadadeda malagho ghevavira.