LUMBO 6 - Biblia Ilagho Jiboie Kwa Wandu Wose

¹ Mkundwa wako waghendie hao nga muka kughokie kuchumba wose? Wamarie chia iao dikutesie kulola?

Muka

² Mkundwa wapo waasea cha mbuwenyi kwake, andu midi ya vilungo iwalo. Waawuyalisha mfugho rake ambuwenyi, na kuwaya mboi ra lili.

³ Uo ni mkundwa wapo, nani ne wake; wadalisha mfugho rake aghadi ya mboi ra lili.

Lumbo lwa kasanu Mndwawomi

⁴ Mkundwa wapo kooghoka sa muzi ghwa Tirza, wa lukundo sa muzi ghwa Jerusalemu; wa wubaa sa ijeshi jiwusiragha viweto.

⁵ Lekanizighana; meso ghako ghaawuyaniwada ngolo; iridia jako jiawoneka sa chagha cha mburi, chiseagha mighondinyi ya Gileadi.

⁶ Maghegho ghako gheela sa ng'ondi ra waka rijokagha rafuma kuoghoshwa; ghose gheekatana; ndekuwadie jingi jiseko.

⁷ Madumbu ghako ghiang'ala-ng'ala nyuma ya pazia yako.

⁸ Mzuri ndekaie na weke malkia mirongo irandadu, na waka wekanya mirongo wunyanya, na wai wa irika wisene mtalo.

⁹ Ini neemkunda uo umweri tu ughokie sa iringo; ooka uekeri kwa mae uo umkunde ukundo na ndighi. Waka wose waawuyamzighana na kumkuma; weke malkia na waka wekanya waawuyabora wikimkuma.

¹⁰ Nani uhu kuzighana kwake kuko sa kuela kwa ndoe; ughokie sa mori, na kung'ala-ng'ala sa iruwa; kuoboshagha wandu sa ijeshi jiwusiragha viweto?

¹¹ Nereserieghe cha mbuwenyi ya milozi, nizighane seji miwalwa ibukie vololonyi; niwone ngera mizabibu yashekera, angu ngera mikomamanga yawusa.

¹² Imbiri niseiwonie, ngachelwa ni bea ewona magare gha kiwuzuri gha wandu wapo, wei neekanya na m'baa wapo aighu igarenyi.

Waka

¹³ Wakawuya, wuya ee mwai Mshulami; wuya, dipate kukuzighana. Kwaki mkunde kunizighana ngivina, seji ni ngoma ivinwagha aghadi ya majeshi awi?