LUMBO 4 - Biblia Ilagho Jiboie Kwa Wandu Wose

¹ Kwaghokie kwaki huwu mkundwa! Meso ghako gheeghoka sa gha iringo a pazienyi kwako. Iridia jako jaawuyamichika sa iranu ja mburi, riseagha a lughongonyi lwa Gileadi.

² Maghegho ghako gheela sa ng'ondi ridumbulo mafuri rafuma kuoghoshwa. Ghose gheekatana nicha, ndekuwadie jingi jiseko.

³ Memu yako eeka sa uzi wa ngundu; yaghokie na ndighi ngelo kwawuyadeda. Madumbu ghako ghiang'ala-ng'ala nyuma ya pazia yako.

⁴ Singo yako eeka sa mnara ghwa Daudi, ghuaghilo kwa wundu ghowika maswagha, andu ngao elfu riadikwagha naro rose ni ngao ra mang'oni.

⁵ Nyodo rako iwi reeka sa masa gha shaa; wijagha a mboinyi.

⁶ Nichaghenda cha mighondinyi ya manemane, iyo mighondi ya marumba, hata ndoe iele na kira kusia.

⁷ Kwaghokie kwaki huwu mkundwa; ndekuwadie kakana ingi.

⁸ Nndoko diseanye kufuma mighondinyi ya Lebanoni bibi arusi wapo; nndoko disee kufuma Lebanoni. Ndedisee kufuma mdonyi ghwa Mghondi ghwa Amana, kufuma Mghondi ghwa Semiri na Herimoni; andu shimba na inge rikaiagha.

⁹ Kooningia ngolonyi putu wangolo, bibi arusi wapo; kuzighana kwako kwadameria ngolo yapo; kuwona lulu imweri ya lukange lwako kwadanimeria wangolo.

¹⁰ Lukundo lwako lwadanisingia kuchumba bibi arusi wapo, lwaboie kuchumba divei. Marumba ghako ghachumba ghose.

¹¹ Memu yako iadika wuki bibi arusi wapo; lumi lwako luadika mariwa na wuki kwapo. Nguwo rako reeka na irumba jose ja Lebanoni.

¹² Wangolo, bibi arusi wapo, ko mbuwa irighilo isanju, na ndoria irighilo andenyi.

¹³ Miwalwa yaro ni makomamanga; ghifunyagha matunda ghiboie, hena na nardo;

¹⁴ nardo na zafarani, kalamo na mdalasini; na midi yose ya marumba. Manemane, uudi, na kolezi valimwagha aho na midi yose ya marumba mecha.

¹⁵ Oho ko ndoria iko ambuwenyi; kiriwa cha machi ghiko moyo; dumeda duidagha kufuma Lebanoni.

Muka

¹⁶ Wuka ee mbeo ya kaskazinyi; choo ee mbeo ya kusinyi! Weta aighu ya mbuwa yapo, kuchure mbeo na marumba mecha; mkundwa wapo ndeche mbuwenyi kwake, uje matunda gharo, agheni ghiboie kuchumba ghose.