LUMBO 1 - Biblia Ilagho Jiboie Kwa Wandu Wose

¹ Ulu ni lumbo luchumbie rose lwa Solomoni.

Lumbo lwa imbiri Muka

² Ado ndakwanisusughaa na momu ghwako, kwa kukaia lukundo lwako lwaboie kuchumba divei.

³ Mavuda kukushingie ghanukie nicha; irina jako jeefwanana nagho; waka wose weekukunda.

⁴ Nido cha kwako dighende, Mzuri ndenido na kuningira chumbenyi kwake; dichaboilwa chiaimweri, na kulukuma lukundo lwako kuchumba divei; si ishiniko jingi oho kukundwa ni waka.

⁵ Inyo waka wa Jerusalemu, ini ne wa chilu ela nifwano; neeka wa chilu sa hema ra Kedari, nighokie sa pazia ra hema ra Solomoni.

⁶ Msakenizighana kwa lumenyo angu niko wa chilu; neekabwa ni iruwa ngawuya wa chilu. Wanidu werenibonyereghe machu, wikaniwika nidumikeghe andenyi ya mbuwa ra mizabibu; ngalemwa ni kukulindia ini moni.

⁷ Nighorie mkundwa, ni hao kulishiragha ng'ondi rako? Kwaridimishiragha hao dime ghadi? Kwaki niendaakulola aghadi ya mfugho ra walisha wazima?

Mndwawomi

⁸ Kamanya kuseichi andu kwaro, ee muka kufwano kuchumba wose, ghenda kunughe chwau ra mfugho, kulishe ndaghina rako kaavui na hema ra walisha.

⁹ Naawuyakufwananisha na farasi ra waka mkundwa, riboilwagha ni farasi ra womi rikuruduagha magare gha Farao.

¹⁰ Iridia jako jaghokie jiseagha madumbunyi kwako, jaidia singonyi kwako sa lulu.

¹¹ Dichakubonyera mkufu ghwa dhahabu na mapambo gha feza.

Muka

¹² Ngelo mzuri orekoghe kochinyi kwake, marumba ghapo gherekoghe ghikinuka nicha chumbenyi.

¹³ Mkundwa wapo orekoghe ukinuka nicha, iji orelaleghe nyodonyi kwapo.

¹⁴ Mkundwa wapo ni sa ngada ya mboi ra isakenyi, riko mbuwenyi ra mizabibu ya En-gedi.

Mndwawomi

¹⁵ Kwaghokie kwaki huwu mkundwa! Kwaghokie nao! Meso ghako gheeghoka sa gha iringo.

Muka

¹⁶ Nakumoni kwaghokie mkundwa wapo; kwaawuyaniboia loli loli. Nyasi mbishi richakaia wuli ghodu.

¹⁷ Nyumba edu ichaaghwa na mbau ra mierezi; dari ichabonywa na mbau ra msumbesu.