LUKA 5 - Biblia Ilagho Jiboie Kwa Wandu Wose

Jesu kuwiwanga wanughi wa imbiri

¹ Nao iji orekoghe kimusi mbai mbai ya ndiwa ya Genesareti, wandu wengi wikacha na kumtindiria wikikunda kujisikira ilagho ja Mlungu.

² Ukawona mashua iwi mbai na mbai ya ndiwa, ela wawadi samaki ndewerekoghe andenyi anduangi, angu werefumieghe wikakaia wikirioghosha nyavu rawo.

³ Jesu ukajingia ishua jimu, najo ni ja Simoni, ukalomba ujisoghore kakula katini na ndoenyi, ukasea kidombo ishuonyi, ukiwifundisha wandu.

⁴ Hata iji wameria madedo ghake ukamzera Simoni, “Soghora ishua andu kumilie, murisere nyavu renyu mpate samaki.”

⁵ Simoni ukamzera, “Mwalimu, dabonyere kazi chee, hata ndedipatire kindo chingi; ela kwa ilagho jako, nicharisera nyavu.”

⁶ Wiendabonya huwo, wikapata samaki nyingi nandighi, hata nyavu rawo rikakunda kurashuka;

⁷ wikawikunyiria wangara wawo wiko ishua izima wiche wiwitesie. Nawo wikacha wikarichura mashua rose iwi hata rikakunda kuvululia.

⁸ Ela iji Simoni Petro orewonieghe agho, ukamdungia Jesu ngokoro ukighamba, “Kaia kula nani, angu ne mundu wa kaung'a ee Bwana.”

⁹ Angu uo andwamweri na wambao werekwanyeghe, wereshinikieghe nandighi kwa wundu ghwa ugho wungi ghwa samaki wereriwadieghe.

¹⁰ Na huwo koni Jakobo na Johane wana wa Zebedayo wereshinikieghe. Jesu ukamzera Simoni, “Kusakeobua, angu kufuma idana kuchakaia mmbwadi wandu.”

¹¹ Hata iji wameria kureda mashua rawo pwani, wikasigha vilambo vose wikamnugha.

Jesu kum'boisa mundu uko na sima

¹² Nao iji Jesu orekoghe muzi ghumu, ukacha mundu uchue sima; hata iji wammbona Jesu ukaghwa kiwushu wushu imbiri kwake ukamvoya ukimzera, “Bwana, ngera kwakunda kwadima kunielesha.”

¹³ Jesu ukaghughorua mkonu ghwake ukamuadada ukighamba, “Nakunda, eleshwa.” Nao shwa wori ija sima ikamsigha.

¹⁴ Ukamlaghira ukighamba, “Kusakemghoria mndungi, ela ghenda kukuwonyere kumoni kwa mkohani, sena kufunye kizongona kwa wundu ghwa kueleshwa kwako, sa iji koni Musa orelaghirieghe, kwa wundu ghwa wushuhuda kwa wandu.”

¹⁵ Ela wuvoro ghwa Jesu ghukachurikia kuera isanga jose; na izungu ibaa ja wandu jikamkwanyikia kumsikiria na kuboiswa makongo ghawo.

¹⁶ Nao ukaghenda andu kusewadie wandu, ukalomba Mlungu.

Jesu kum'boisa mkelemeri wa kupooza

¹⁷ Ituku jimu, Jesu orekoghe ukifundisha. Ahoeni korekoghe na Mafarisayo na walimu wa Sharia wiko kidombo, wafuma kula muzi ghwa Galilaya, Judea na Jerusalemu; na ndighi ra Bwana reboisa rerekoghe aeni kwake.

¹⁸ Nao ahoeni wandu wikamredia mundu uko na wukongo ghwa kupooza walala wulinyi, nawo wikikunda kumreda na kummbika imbiri ya Jesu,

¹⁹ wikasowa chia kwa wundu ghwa wandu kukaia wengi. Nao wikajoka aighu nyumbenyi, wikainja vigae, na kumsera mkongo aighu wulinyi aghadi ya ijo izungu, imbiri ya Jesu.

²⁰ Hata iji Jesu wajiwona irumirio jawo ukamzera, “Ee mundu, kwalekwa kaung'a rako.”

²¹ Nao walimu wa Sharia na Mafarisayo wikazoya kukukotia weni, “Nani uhu udedagha malagho gha masholio? Mlungu uekeri nuo udimagha kuleka kaung'a!”

²² Nao iji Jesu waghimanya maririkanyo ghawo, ukawikotia, “Kwaki mririkanyagha huwo ngolonyi konyu?

²³ Welee, iji jiangue kughora ni jiao, ni ja kughora, ‘Kaung'a rako ralekwa’ angu ni kughora, ‘Wuka kwende?’

²⁴ Ela nakunda mmanye angu Mwana wa Mdamu oko nandighi andoenyi releka kaung'a.” Niko ukamzera uja mkongo wa kupooza, “Wuka kughuduke wuli ghwako kughale.”

²⁵ Nao shwa wori ukawuka imbiri ya wose, ukaghuduka ugho wuli oreghulalieghe, ukaghala ukimkasa Mlungu.

²⁶ Na wose wikashinika wikamkasa Mlungu wikiobua na kughamba, “Idime, dawona maza ra mashiniko.”

Jesu kummbanga Lawi

²⁷ Nyuma ya agho, Jesu ukafuma ukammbona mmbwadi wushuru umu uwangwagha Lawi, wasea kidombo ofisinyi kwake. Jesu ukamzera, “Ninughe.”

²⁸ Nao ukasigha vose ukawuka ukamnugha.

²⁹ Lawi ukam'bonyera karamu mbaa nyumbenyi kwake, na wawadi wushuru wengi wikacha na kusea kidombo mezenyi andwamweri nawo.

³⁰ Mafarisayo na walimu wa Sharia wikawizughunukia wanughi wake wikighamba, “Kwaki mjagha chiaimweri na wawadi wushuru na wakaung'a?”

³¹ Nao Jesu ukawitumbulia, “Awa wiko banana ndewikunde mghanga ungi, ela ni awo wiko wakongo.

³² Ini serechieghe kuwiwanga wandu wa hachi anduangi, ela awo wiko wakaung'a wipate kuhea.”

Ikoto aighu ya kufunga tumu

³³ Nao wandu wamu wikamzera, “Wanughi wa Johane na wa Mafarisayo wadafunga na kulomba kalazi koni, ela wanughi wako wadaja na kunywa.”

³⁴ Jesu ukawizera, “Mwadima kuwibonya waghenyi wawangwa harusinyi wifunge tumu ngelo bwana arusi uko aeni?

³⁵ Ela matuku ghichacha, ngelo bwana arusi uchaainjwa kwawo, matuku agho niko wichaafunga tumu.”

³⁶ Na wokoni Jesu ukawineka mfwano ughu, “Ndekuwadie mndungi udumbuagha kiraka cha nguwo mbishi na kuchikumba nguwo ya kala; angu ukabonya huwo, ichakaia wameria kuirashua ija mbishi, na sena chija kiraka chichalemana na jija irasi.

³⁷ Hata ndekuwadie mndungi udungiriagha divei mbishi viribenyi va kala, angu ukabonya huwo, ija divei mbishi ichavirashua, divei ichadika, na viriba vichanoneka.

³⁸ Ela divei mbishi ni suti idungirilo viribenyi viwishi.

³⁹ Hata ndekuwadie mndungi nyuma ya kunywa divei ya kala uwuyaakunda kunywa divei mbishi anduangi; angu uchaghamba, ‘Divei ya kala yaboie.’”